استانادا قازاقستانداعى رەسەيدىڭ مادەنيەت كۇندەرى اياسىندا رەسەي كينوسى فەستيۆالى باستالدى. فەستيۆال باعدارلاماسى 26 ساۋىرگە دەيىن جالعاسىپ، ەكى ەل اراسىنداعى مادەني-گۋمانيتارلىق بايلانىستاردى ودان ءارى نىعايتۋعا باعىتتالعان.

ءىس-شارانىڭ اشىلۋىندا «روسكينو» باس ديرەكتورى ەلزا انتونوۆا رەسەي فەدەراتسياسىنىڭ مادەنيەت ءمينيسترى ولگا ليۋبيموۆانىڭ قۇتتىقتاۋ حاتىن وقىپ بەردى.

«قازاقستانداعى رەسەي كينوسى فەستيۆالىنىڭ وتكىزىلۋى ونەر مەن كينەماتوگرافيا ارقىلى ىنتىماقتاستىعىمىزدى ارتتىرا تۇسۋگە جول اشادى. بۇل جوبا مادەني الماسۋدى جانداندىرىپ، حالىقتار اراسىنداعى ءوزارا تۇسىنىستىك پەن رۋحاني ۇندەستىكتى تەرەڭدەتە تۇسەدى»، – دەلىنگەن قۇتتىقتاۋ حاتتا.

ەلزا انتونوۆا «روسكينو» جىل سايىن الەمنىڭ بىرقاتار ەلىندە رەسەي كينوسى فەستيۆالدەرىن وتكىزەتىنىن، الايدا قازاقستانداعى فەستيۆالدىڭ ورنى ايرىقشا ەكەنىن اتاپ ءوتتى. ونىڭ ايتۋىنشا، باعدارلاماعا بۇگىندە رەسەيدە پروكاتقا شىعىپ، قالىڭ كورەرمەننىڭ جوعارى باعاسىنا يە بولعان جانە زاماناۋي رەسەيلىك كينونىڭ جانرلىق الۋاندىعىن كورسەتەتىن فيلمدەر ەنگىزىلگەن.

ش.ايمانوۆ اتىنداعى «قازاقفيلم» اق پرەزيدەنتىنىڭ مىندەتىن اتقارۋشى ايدار وماروۆ مۇنداي جوبالار ەكى ەل اراسىنداعى مادەني بايلانىستاردى بايىتىپ، ۇلتتىق كينونى ىلگەرىلەتۋگە تىڭ سەرپىن بەرەتىنىن اتادى.

فەستيۆالدىڭ اشىلۋىندا «پەرۆىي نا وليمپە» سپورت دراماسى كورسەتىلدى. ءتورت كۇن بويى كورەرمەندەرگە ءارتۇرلى جانرداعى جەتى رەسەيلىك فيلم تەگىن ۇسىنىلادى. باعدارلاماعا سونداي-اق «اۆياتور»، «بۋراتينو»، «چەبۋراشكا 2»، «كراسنىي شەلك»، «تري كوتا. پۋتەشەستۆيە ۆو ۆرەمەني» جانە «اۆگۋست» فيلمدەرى ەنگەن.

فەستيۆال اياسىندا دەلەگاتسيا وكىلدەرىمەن كەزدەسۋلەر مەن شىعارماشىلىق ماماندىقتا وقيتىن قازاقستاندىق ستۋدەنتتەرگە ارنالعان شەبەرلىك ساباقتارى جوسپارلانعان. كورەرمەندەرمەن كەزدەسۋگە «اۆياتور» فيلمىندە ويناعان اكتريسا داريا كۋكارسكايا مەن «پەرۆىي نا وليمپە» كارتيناسىندا ءرول سومداعان اكتەر انتون ساۆۆاتيموۆ قاتىسادى.

Abai.kz