ەلىمىزدە ءبىلىم مەن پاراساتتىڭ سيمۆولىنا اينالعان ايتۋلى مەرەكە – ۇلتتىق كىتاپ كۇنى ەكىنشى جىل قاتارىنان سالتاناتتى تۇردە اتاپ وتىلۋدە. مەملەكەت باسشىسى قاسىم-جومارت توقاەۆ اتاپ وتكەندەي، كىتاپ وقۋ ءۇردىسى ۇلتتىق دۇنيەتانىمىمىزدىڭ اجىراماس بولىگىنە، ۇلتتىڭ وزىق قاسيەتىنە اينالۋى ءتيىس. بيىل بۇل مەرەكە ەرەكشە مازمۇنعا يە بولدى، سەبەبى العاش رەت رەسپۋبليكالىق دەڭگەيدە كىتاپحاناشىلار كۇنى ۇلتتىق كىتاپ كۇنىمەن بىرگەكەڭ كولەمدە تويلانىپ، رۋحانيات شىراقشىلارىنىڭ ەڭبەگىنە لايىقتى قۇرمەت كورسەتىلدى. كىتاپحاناشى – تەك كىتاپ ساقتاۋشى ەمەس، ول وقىرمان مەن ءبىلىم اراسىنداعى التىن كوپىر، قوعامنىڭ ينتەللەكتۋالدىق الەۋەتىن كوتەرۋشى تۇلعا.

سۋرەت: قر ۇلتتىق كىتاپحاناسىنان الىندى.

مەرەكە اياسىندا قر ۇلتتىق كىتاپحاناسىنىڭ سيرەك قورىندا وقىرماندار نازارىنا بىرەگەي كورمەلەر ۇسىندى. «قورداعى قولتاڭبالار» اتتى تاقىرىپتىق كورمە ۇلتتىق قازىنامىزدىڭ تەرەڭدىگىن پاش ەتتى. مۇندا حح عاسىردىڭ زاڭعار تۇلعالارىنىڭ ءوز قولتاڭباسىمەن كىتاپحانا قورىنا تارتۋ ەتكەن 215-تەن استام ەڭبەگى قويىلدى. كورمەدە ءسابيت مۇقانوۆ، عابيت مۇسىرەپوۆ، جۇمەكەن ناجىمەدەنوۆ، اقسەلەۋ سەيدىمبەك سياقتى ادەبيەت الىپتارىنىڭ، حاليفا التاي مەن احات قۇدايبەردىۇلى سەكىلدى رۋحانيات قايراتكەرلەرىنىڭ، سونداي-اق ولجاس سۇلەيمەنوۆ پەن اقۇشتاپ باقتىگەرەەۆا سىندى زامان زاڭعارلارىنىڭ قولتاڭبالى تۋىندىلارى ورىن الدى. سونىمەن قاتار، كىتاپحانا ءىسىنىڭ دامۋىنا ۇلەس قوسقان نىعمەت ءسابيتوۆ پەن ۇشكۇلتاي سۋبحانبەردينا سەكىلدى عالىمداردىڭ ەڭبەكتەرى دە جۇرتشىلىق نازارىنا ۇسىنىلدى.

سۋرەت: قر ۇلتتىق كىتاپحاناسىنان الىندى.

بۇعان قوسا ۇيىمداستىرىلعان «الاقانداي اسىل مۇرا» كورمەسى كىتاپ مادەنيەتىنىڭ سان قىرلى الەمىن اشا ءتۇستى. كولەمى شاعىن بولعانىمەن، تاريحي قۇندىلىعى جوعارى بۇل بولىمدە XVII-XX عاسىرلار ارالىعىنداعى قۇران كارىمنىڭ سيرەك نۇسقالارى، ەۋروپانىڭ العاشقى عىلىمي باسىلىمدارى مەن مينياتيۋرالىق كىتاپتار جيناقتالعان. وقىرماندار مۇحتار اۋەزوۆتىڭ، جۇبان مولداعاليەۆتىڭ جانە الەمدىك كلاسسيكتەر پۋشكين مەن چەحوۆتىڭ كىشكەنتاي ءپىشىندى كىتاپتارىن تاماشالادى. كەيبىر باسىلىمداردىڭ بەزەندىرىلۋى دە تاڭعالدىردى. تابيعي يانتاردان جاسالعان ەلەمەنتتەر، اۋديوكاسسەتا پىشىنىندەگى مۇقابالار مەن ەرەكشە ماتەريالدار كىتاپتىڭ تەك ءبىلىم كوزى ەمەس، ونەر تۋىندىسى ەكەنىن دالەلدەي ءتۇستى.

سۋرەت: قر ۇلتتىق كىتاپحاناسىنان الىندى.

سونىمەن قاتار، قازاق كسر-ءنىڭ ەڭبەك سىڭىرگەن كىتاپحاناشىسى بەلگىلى قوعام قايراتكەرى ءنازيرا قوجاحمەتقىزى داۋلەتوۆانىڭ تۋعانىنا 100 جىل تولۋىنا ارنالعان «كىتاپحاناعا ارنالعان عۇمىر» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى. كونفەرەنتسيا اياسىندا «ۇلتتىق كىتاپ جولى. ۇسىنىستىق بيبليوگرافيالىق كورسەتكىش»، «نازيرا داۋلەتوۆا» بيبليوگرافيالىق كورسەتكىشى جانە «قازاقستانداعى كىتاپحانا ءىسىنىڭ تاريحى» كىتابىنىڭ ەكىنشى باسىلىمىنىڭ تۇساۋى كەسىلدى. جيىن بارىسىندا كىتاپحانا ءىسىنىڭ زاماناۋي باعىتتارى مەن جاساندى ينتەللەكت مۇمكىندىكتەرى تالقىلانىپ، سالانىڭ بولاشاق دامۋ جولدارى ايقىندالدى. بۇگىندە كىتاپحانالار تەك كىتاپ وقيتىن ورىن عانا ەمەس، زاماناۋي يننوۆاتسيالار مەن تسيفرلىق تەحنولوگيالار ورتالىعىنا اينالىپ وتىر. وسىنداي يگى باستامالار ارقىلى قوعامدا وقۋ مادەنيەتى نىعايىپ، ۇلتتىق رۋحاني قۇندىلىقتارعا دەگەن قىزىعۋشىلىق جاڭا دەڭگەيگە كوتەرىلەرى ءسوزسىز.

قر ۇلتتىق كىتاپحاناسى

ءباسپاسوز قىزمەتى

Abai.kz