بۇگىن جەتىسۋ وبلىسىنىڭ اكىمى بەيبىت يساباەۆ سارقان اۋدانىنا جۇمىس ساپارىمەن بارىپ، الداعى شومىلۋ ماۋسىمىنا دايىندىق بارىسىمەن تانىستى. اتاپ ايتقاندا، بالقاش كولىن تازارتۋ ماسەلەسىن شەشۋ ماقساتىندا قۇرىلعان «بالقاش تازالىق» جاڭا كاسىپورنىندا بولدى. ايتا كەتۋ كەرەك، بۇل جۇمىس مەملەكەت باسشىسىنىڭ تۋريستىك ايماقتاردى رەتكە كەلتىرۋ تۋرالى تاپسىرماسىن ىسكە اسىرۋ اياسىندا جۇرگىزىلۋدە، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

اۋدان اكىمى عالىمجان مامانباەۆ مەكەمەنىڭ قىزمەتى مەن ماتەريالدىق-تەحنيكالىق بازاسى تۋرالى بايانداپ بەردى. بۇگىنگى تاڭدا «بالقاش تازالىق» شجق مكك-دا 36 جۇمىس ورنى قۇرىلعان. كوممۋنالدىق كاسىپورىندا جالپى سانى 22 ارنايى تەحنيكا بار، سونىڭ ىشىندە اسپالى جابدىقتارى بار تراكتورلار، فرونتالدى-شاعىن تيەگىشتەر، مانيپۋلياتور، ساموسۆال، ارالاس جول ماشيناسى، قوقىس تاسيتىن كولىكتەر، ۆاكۋمدىق اۆتوتسيستەرنا، سۋارۋ كولىگى، «گازەل» جۇك-جولاۋشىلار كولىگى، كوپفۋنكتسيونالدى ەكسكاۆاتور، تىركەمە، قايىق، جاعاجاي تازالاۋ ماشيناسى، پيكاپ جانە بەنزين تريتسيكلى سياقتى تەحنيكالاردى اتاۋعا بولادى.

– بۇل جاڭادان قۇرىلعان مەكەمە جازعى ماۋسىمدا بالقاش كولىنىڭ جاعالاۋىن كۇتىپ-ۇستاۋدى قامتاماسىز ەتەدى. اتاپ ايتساق، جاعاجايلاردى تازالايدى، قالدىقتاردى شىعارادى، جارىقتاندىرۋعا، كوگالداندىرۋعا جانە قوعامدىق سانيتارلىق توراپتاردى كۇتىپ ۇستاۋعا جاۋاپ بەرەدى. مامىر ايىنان باستاپ بۇل ارنايى تەحنيكانىڭ ءبارى بالقاش جاعالاۋىنا جىبەرىلەدى. جازعى شومىلۋ ماۋسىمىنان كەيىن قالعان ۋاقىتتا كاسىپورىن اۋدان كولەمىندە اباتتاندىرۋ، جولداردى سانيتارلىق تازالاۋ جانە قىسقى كۇتىپ ۇستاۋ جۇمىستارىن اتقارادى، – دەدى ول.

اۆتوپاركپەن جانە ونىڭ فۋنكتسيونالدى مۇمكىندىكتەرىمەن تانىسقان ءوڭىر باسشىسى تۋريستىك ماۋسىمدا كول جاعالاۋىنداعى سانيتارلىق تازالىق پەن اباتتاندىرۋدى قامتاماسىز ەتۋدىڭ ماڭىزدىلىعىن ەرەكشە اتاپ ءوتتى.

- بالقاش كولىنىڭ تۋريستىك الەۋەتى مول. ءبىز كولگە اپاراتىن جولدى جاڭارتتىق، جاعالاۋعا ءتيىستى ينجەنەرلىك ينفراقۇرىلىمداردى تارتتىق، لەپسى اۋىلىندا قاجەتتى الەۋمەتتىك نىساندار سالدىق، جاعالاۋدىڭ سانيتارلىق تازالىعىن ساقتاۋعا جاۋاپتى مەكەمە قۇرىپ بەردىك، تەحنيكاسى تۇگەندەلدى. قىسقاشا ايتقاندا، كول جاعالاۋىن دامىتۋعا بارلىق قاجەتتى جاعدايدى جاساپ جاتىرمىز. ەندىگى جەردە سىزدەردەن ساپالى، جۇيەلى جۇمىس قاتاڭ تالاپ ەتىلەدى. ءتۋريزمدى دامىتۋ – اۋداننىڭ باسىم باعىتتارىنىڭ ءبىرى بولۋى ءتيىس، - دەدى بەيبىت يساباەۆ.

ەسكە سالساق، وبلىستا «الاكول تازالىق» جانە «بالقاش تازالىق» جاڭا كوممۋنالدىق مەكەمەلەرى وتكەن جىلدىڭ سوڭىندا قۇرىلعان بولاتىن. ولار الاكول جانە بالقاش كولدەرىنىڭ جاعالاۋى ايماعىن كۇتىپ ۇستاۋعا جاۋاپ بەرەدى.

Abai.kz