قاراعاندىلىقتار «تازا قازاقستان» باعدارلاماسى اياسىندا وتكەن رەسپۋبليكالىق اعاش ەگۋ سەنبىلىگىن بەلسەندى تۇردە قولدادى. 

مەملەكەت باسشىسى قاسىم-جومارت توقاەۆ اۋقىمدى ەكولوگيالىق اكتسياعا باستاماشى بولىپ، قاتىسۋشىلارعا ۇندەۋ جولدادى.

بۇل كۇنى قاراعاندىدا قازاقستان تاۋەلسىزدىگىنىڭ 10 جىلدىعى اتىنداعى ەتنوپارك كوگالداندىرۋدىڭ نەگىزگى الاڭىنا اينالدى.

مۇندا بەس مىڭعا جۋىق ادام — قوعام بەلسەندىلەرى، جاستار، ەرىكتىلەر جانە قورشاعان ورتاعا بەيجاي قارامايتىن تۇرعىندار جينالدى.

ولار قاراعاي، قايىڭ جانە تەرەكتىڭ ءبىر جارىم مىڭ ءتۇپ كوشەتىن وتىرعىزدى.

وبلىس اكىمى ەرماعانبەت بولەكپاەۆ قاتىسۋشىلارعا تۋعان جەرگە دەگەن جاناشىرلىعى مەن جايلى، جاسىل قالالىق ورتا قالىپتاستىرۋعا قوسقان ۇلەسى ءۇشىن العىس ءبىلدىردى.

– ەل پرەزيدەنتىنىڭ باستاماسىمەن ەكى جىل بۇرىن «تازا قازاقستان» ۇلتتىق جوباسى ىسكە قوسىلدى. وبلىس تۇرعىندارى وعان بەلسەندى قاتىسۋدا: اعاش ەگەدى، قوقىس جينايدى، اۋلالارىن رەتكە كەلتىرەدى. بيزنەس وكىلدەرى دە شەت قالعان جوق — كاسىپورىن ۇجىمدارى بۇل باستامانى قولدادى. الداعى ۋاقىتتا دا بارلىعىمىز بىرلەسىپ جۇمىستى جالعاستىرامىز. جالپى، بيىل وبلىس بويىنشا شامامەن 60 مىڭ اعاش ەگۋ جوسپارلانىپ وتىر. ءاربىر كوشەتكە دۇرىس كۇتىم قاجەت، بۇل رەتتە مامانداردىڭ ۇسىنىمدارى اسا ماڭىزدى، – دەدى ەرماعانبەت بولەكپاەۆ.

ەكولوگيالىق مادەنيەتتى قالىپتاستىرۋدا جاستارعا ۇلكەن ءرول جۇكتەلەدى.

بۇل تۋرالى ءوز ۇندەۋىندە پرەزيدەنت قاسىم-جومارت توقاەۆ تاعى ءبىر مارتە اتاپ ءوتتى.

قاراعاندى وبلىسى بويىنشا «جاسىل ەل» رەسپۋبليكالىق شتابىنىڭ جەتەكشىسى سۇلتان شايماعانبەت ءاربىر ەكولوگيالىق اكتسياعا قاتىسۋ ءىز-ءتۇزسىز وتپەيتىنىنە سەنىمدى.

– بۇگىن مۇندا جاستار كوپ جينالدى. «تازا قازاقستان» — وتە ماڭىزدى يدەولوگيالىق باستاما. اعاش ەككەن جاستار ونىڭ ءارى قارايعى كۇتىمى، ءوسۋىن قاداعالاۋ جونىندە ويلانادى. بۇل ولاردى وسىمدىكتەر تۋرالى كوبىرەك بىلۋگە، ولاردى دۇرىس وتىرعىزىپ، ءوسىرۋ جولدارىن مەڭگەرۋگە ىنتالاندىرادى، – دەدى جاسىل قوزعالىس كوشباسشىسى.

ەتنوپاركتە سونداي-اق قارقارالى ۇلتتىق پاركىنەن اكەلىنگەن 200 ءتۇپ ىرعاي كوشەتى ەگىلدى.

وسى باستاما ارقىلى قىزمەتكەرلەر «تازا قازاقستان» حالىقارالىق «ساياباقتار مارشى» ەكولوگيالىق اكتسياسىمەن ۇندەسىپ جاتقانىن كورسەتتى.

Abai.kz