اقش استاناسى ۆاشينگتوندا قازاقتىڭ كورنەكتى جازۋشىسى مۇحتار ماعاۋيننىڭ بەيىتىنە قۇلپىتاس قويىلىپ، ونىڭ ەسىمىمەن اتالاتىن مادەني-اعارتۋ ورتالىعىنىڭ اشىلۋ سالتاناتى ءوتتى.

ۆاشينگتوندا قازاقتىڭ ۇلى جازۋشىسى، زەرتتەۋشىسى ءارى تاريحشىسى مۇحتار ماعاۋيننىڭ بەيىتىنىڭ باسىنا قۇلپىتاس ورناتىلىپ، امەريكاداعى «مۇحتار ماعاۋين اتىنداعى قازاق ۇلتتىق مادەني-اعارتۋ ورتالىعىنىڭ» رەسمي تانىستىرىلىمى ءوتتى، دەپ حابارلايدى Todayinfo اقپارات اگەنتتىگى.

بۇل تۋرالى Kazakh American Association وكىلى ساپاربەك ناعاشىبەك جازدى.

"مۇحتار ماعاۋين بۇكىل سانالى عۇمىرىن قازاق حالقىنا ارنادى. ول 85 جاسقا كەلگەنشە 27 تومدىق ەڭبەگىن جازىپ، قازاقتىڭ بەس عاسىرلىق تاريحىن رۋحاني تۇرعىدا تۇگەندەپ بەردى. بولاشاق ۇرپاق اتامىزدىڭ ۇلى ەڭبەگىن ءالى تالاي باعالايتىنى ءسوزسىز. قازاق تاريحىندا وسىنشاما كىتاپتار جازعان جازۋشى بولماعان.

ماعاۋين اتامىزدىڭ ەڭبەكتەرى باسقا ۇلتپەن، جۇرتپەن تەرەزەمىز تەڭ ەكەنىن، باي تاريحىمىز بار ەكەنىن ۇعىندىردى. باسىمىزدى تىك كوتەرىپ، قازاقپىن دەپ ايتۋعا سەنىم بەردى. اللانىڭ قالاۋىمەن، وسىنداي دانىشپان تۇلعانىڭ توپىراعى امەريكا جەرىنە بۇيىرىپتى. مۇحتار ماعاۋين جاتقان جەر دە ەندى قازاق ءۇشىن كيەلى مەكەن دەپ قابىلدانارى ءسوزسىز. قازاق قالاي بەرلينگە بارعاندا مۇستافا شوقايدى ىزدەسە، ەندى سولاي امەريكا استاناسىنا كەلگەندە ماعاۋين باسىنا كەلەمىن دەپ نيەت ەتەرى اقيقات.

قازاق تاريحىنان ءبىر ۋنيۆەرسيتەت بەرەتىن ءبىلىمدى جازىپ كەتكەن ۇلى تۇلعا بىلىمدە، تاريحتا، كىتاپتا شەكارا جوقتىعىن كورسەتىپ تۇرعانداي. قايدا توپىراق بۇيىرعانى جاي شارتتىلىق. ال، ورىندالعان ميسسيا، ارتىنان قالعان ەڭبەك، مىنە ول – شەكسىز! ماڭگىلىك!

وسى ەڭبەكتەرى ءۇشىن ءبىز، قازاق حالقى، مۇحتار ماعاۋينگە قارىزدارمىز. قازاققا وسىنداي تۇلعانى بەرگەن اللاعا سانسىز شۇكىر، شەكسىز ماداق بولسىن".

Abai.kz