ەلدەگى اۋەجاي قاۋىپسىزدىگى 95,7% بولدى. بۇل تۋرالى بۇگىن ۇكىمەت وتىرىسىندا كولىك ءمينيسترى نۇرلان ساۋرانباەۆ ءمالىم ەتتى. 

— قازاقستان يكاو تالاپتارىنا جوعارى دەڭگەيدە سايكەس كەلەدى. اۋەجاي قاۋىپسىزدىگى 95,7%، اۋە كومپانيالارىنىڭ قاۋىپسىزدىك دەڭگەيى 82%. وسى ناتيجەلەردىڭ ارقاسىندا ەلىمىز اۆياتسيالىق قاۋىپسىزدىك بويىنشا الەمدەگى ەڭ ۇزدىك 20 مەملەكەتتىڭ قاتارىنا كىردى. قاۋىپسىزدىكتى ودان ءارى ارتتىرۋ ماقساتىندا اۋە اپاتتارىن تەرگەۋ ورتالىعى قۇرىلدى، — دەدى نۇرلان ساۋرانباەۆ.

ونىڭ سوزىنە قاراعاندا، اۆياتسيالىق اكىمشىلىككە حالىقارالىق دەڭگەيدەگى ساراپشىلار تارتىلدى.

— يكاو-مەن بىرلەسىپ 2050 جىلعا دەيىنگى ءتيىستى جوسپار ازىرلەنىپ جاتىر، ونى وسى جىلدىڭ سوڭىنا دەيىن قابىلدايمىز، — دەدى مينيستر.

«قازاقستاننىڭ اۆياتسيالىق اكىمشىلىگى» اق-نىڭ باس اتقارۋشى ديرەكتورى مايكل دەنيەل ازاماتتىق اۆياتسيا سۋبەكتىلەرىن تەكسەرۋگە قاتىستى تۇسىنىك بەردى.

— قازاقستاندا اۋە كەمەلەرىن پايدالاناتىن 104 وپەراتور جۇمىس ىستەپ تۇر. بۇگىندە قازاقستان رەسپۋبليكاسىنىڭ مەملەكەتتىك اۋە كولىگى تىزىلىمىندە 973 اۋە كەمەسى تىركەلگەن. ەلدە 25 اۋەجاي، اۋە كەمەلەرىنە تەحنيكالىق قىزمەت كورسەتۋ جانە جوندەۋ جونىندە 28 ۇيىم، 21 اۆياتسيالىق وقۋ ورتالىعى سەرتيفيكاتتالعان، — دەدى مايكل دەنيەل ۇكىمەت وتىرىسىندا.

ونىڭ ايتۋىنشا، «قازاقستاننىڭ اۆياتسيالىق اكىمشىلىگى» اق 2025 جىلى مەن 2026 جىلدىڭ ءبىرىنشى توقسانىندا ازاماتتىق اۆياتسيا سالاسى سۋبەكتىلەرىنە 1202 تەكسەرۋ جۇرگىزىپ، 1234 سەرتيفيكات پەن كۋالىك بەردى.

— وسى تەكسەرىستەردىڭ ناتيجەسىندە جەتى اۋە كومپانياسىنا قاتىستى سەرتيفيكاتتاردى ۋاقىتشا توقتاتۋ نەمەسە قايتارىپ الۋ جونىندە شەشىم قابىلداندى. ال تورت اۆياتسيالىق وقۋ ورتالىعىنىڭ جۇمىسى توقتاتىلدى. سونىمەن قاتار 8 اەرودرومعا قاتىستى 15 شەكتەۋ ەنگىزىلدى، — دەدى ول.

2025 جىلى قازاقستاندىق اۋە كومپانيالار 15 ملن جولاۋشى تاسىمالداعان. بيىلعى العاشقى 4 ايدا جولاۋشىلار سانى 4 ملن-نان استى.

پرەمەر-مينيستر ولجاس بەكتەنوۆ قازاقستاننان تىكەلەي جۇرەتىن حالىقارالىق رەيستەردى كوبەيتۋدى تاپسىردى.

Abai.kz