ەلوردا دا وتكەن ءباسپاسوز ءماسليحاتىندا قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى ەلىمىزدەگى بارشا جاماعاتتى ۇلتتىق كيىمدەرىمىزدى كيىپ، ايت مەرەكەسىن داستۇرىمىزگە ساي ۇلتتىق ناقىشتارمەن وتكىزۋگە، يگى باستامالارىمىزعا بەلسەندى تۇردە اتسالىسۋعا شاقىردى.

«جىل باسىندا ەلىمىزدەگى بارشا ءدىن قىزمەتكەرلەرىنە جولداعان باعدارلىق باياندامامدا قوس ۇلىق مەيرامدارىمىز – قۇربان ايت پەن ورازا ايتتى داستۇرىمىزگە ساي قوعامدىق دەڭگەيدە اتاپ ءوتۋ قاجەتتىگىن جەتكىزدىم. اللا قالاسا، ايت كۇندەرى «قۇربان ايت – ۇلىق مەرەكە» تاقىرىبىندا رەسپۋبليكالىق دەڭگەيدە يگى ءىس-شارالار ۇيىمداستىرىلادى.

وبلىستىق، قالالىق جانە اۋداندىق مەشىتتەردىڭ اۋلاسىندا كيىز ۇيلەر تىگىلىپ، ۇلتتىق سپورت تۇرلەرىنەن ارنايى سايىستار ۇيىمداستىرىلادى. جەر-جەردە مادەني-رۋحاني كەشتەر وتكىزىلەدى. وسى رەتتە ەلىمىزدەگى بارشا جاماعاتتى ۇلتتىق كيىمدەرىمىزدى كيىپ، ايت مەرەكەسىن داستۇرىمىزگە ساي ۇلتتىق ناقىشتارمەن وتكىزۋگە، يگى باستامالارىمىزعا بەلسەندى تۇردە اتسالىسۋعا شاقىرامىن» دەپ اتاپ ءوتتى ناۋرىزباي قاجى تاعانۇلى.

27 مامىر – قۇربان ايت مەيرامىنىڭ العاشقى كۇنى. وسى كۇنى وقىلاتىن قۇربان ايت نامازىنىڭ ەلىمىز بويىنشا ازىرلەنگەن كەستەسىن نازارلارىڭىزعا ۇسىنامىز. ايت قۇتتى بولسىن، اعايىن!

ەلىمىز بويىنشا ايت نامازىنىڭ كەستەسى

سۋرەت: muftyat.kz سايتىنان الىندى.

Abai.kz