قازاقستاندا 2026-2027 وقۋ جىلىنا جالپى سانى 89 457 مەملەكەتتىك ءبىلىم گرانتى بولىنبەك. مۇنى 26 مامىردا ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك حابارلادى.

سونىڭ ىشىندە:

باكالاۆرياتقا - 75 371 گرانت;

ماگيستراتۋراعا - 11 007 گرانت;

دوكتورانتۋراعا - 3 079 گرانت بولىنەدى.

بيلىك گرانت بولۋدە ەلدىڭ 2030 جىلعا دەيىنگى ەڭبەك نارىعى بولجامىنا سۇيەنگەنىن ايتادى.

رەسمي دەرەككە سايكەس، اتالعان كەزەڭدە قازاقستانعا 883 مىڭنان استام مامان، ونىڭ ىشىندە شامامەن 530 مىڭى ينجەنەرلىك سالادا قاجەت بولماق. سونداي-اق 185 مىڭ پەداگوگ جانە 168 مىڭعا جۋىق باسقا باعىتتاعى كادرلارعا سۇرانىس بار.

گرانتتاردىڭ 60 پايىزى ينجەنەرلىك-تەحنيكالىق جانە اگرارلىق ماماندىقتارعا، 21 پايىزى پەداگوگيكا سالاسىنا بولىنگەن. مينيسترلىك بۇل ساياسات ەڭبەك نارىعى سۇرانىسىن جابۋدى كوزدەيدى دەدى.

Abai.kz