بۇگىن جۋرناليست، اۋدارماشى، جازۋشى دۇيسەنالى الىماقىن ءوزىنىڭ الەۋمەتتىك جەلىدەگى پاراقشاسىنا استانا قالاسىنداعى قالامگەرلەر الەياسىندا بولعان كەلەڭسىز وقيعانىڭ ۆيدەوسىن جاريالادى.

وندا بەلگىسىز بويجەتكەندەر الاش ارىستارىنا، قازاقتىڭ كورنەكشى قالامگەرلەرىنە ارنالعان ەسكەركىشتىڭ موينىنا ءمىنىپ، ەسىرىك قىلىقتار جاساعان.

بۇل بەينە جازبا الەۋمەتتىك جەلىلەر مەن باق-قا دەرەۋ تاراپ، قوعام نارازىلىعىن تۋدىردى. الەۋمەتتىك جەلى قولدانۋشىلارى ۆانداليزم ارەكەتتەرىن جاساعان بويجەتكەندەردىڭ تارتىپتىك جازاعا تارتىلۋىن تالاپ ەتۋدە.

ال ۆيدەو اۆتورى دۇيسەنالى الىماقىن: «قالامگەرلەر اللەياسىندا دەمالىپ وتىر ەدىم. كەنەتتەن مىناداي كەلەڭسىز ىسكە كۋاگەر بولدىم. اشۋ قىسىپ قاسىنا جەتىپ بارىپ «بۇل تۇلعالاردىڭ كىم ەكەنىن بىلەسىڭدەر مە؟» دەسەم, كوزدەرى ادىرايىپ: «چتو, چتو»، - دەۋدەن ارى اسپادى. بۇل باسىنۋ ما الدە ناداندىق پا?»، - دەپ جازدى.

وسى وقيعاعا بايلانىستى، ءبىز، Abai.kz اقپاراتتىق پورتالى استانا قالاسىنىڭ پوليتسيا دەپارتامەنتىنە سۇراۋ سالدىق. استانا قالاسى پوليتسيا دەپارتامەنتىنىڭ ءباسپاسوز قىزمەتىنە بولعان جايدى بايانداپ، قوعامدىق ءتارتىپتى بۇزىپ، الاش ارىستارىنىڭ ەسكەرتكىشىن «قورلاعانداردىڭ» جاۋاپقا تارتىلۋىن تالاپ ەتتىك.

استانا پوليتسياسىنىڭ ءباسپاسوز قىزمەتى بىزگە بىلاي دەپ جاۋاپ قايتاردى:

«ءيا، ءبىز بولعان جايدان حاباردارمىز. قازىر ءتارتىپ بۇزعان تۇلعالاردى ىزدەستىرۋ جۇمىستارى جۇرگىزىلۋدە. ءىس استانا پوليتسياسىنىڭ نارازىنا الىنعان. ءسوزسىز، كەز كەلگەن قۇقىق بۇزۋشىلىق جاۋاپسىز، جازاسىز قالمايدى. قر زاڭناماسىندا كورسەتىلگەندەي، ەسكەرتكىشتى «قورلاعان» تۇلعالار انىقتالىپ، جاۋاپتىلىققا تارتىلاتىن بولادى»، - دەدى.

نۇرگەلدى ابدىعانيۇلى

Abai.kz