ۋرسۋلا فون دەر ليايەن: 10 جىل ىشىندە قازاقستان مەن ەو اراسىنداعى ساۋدا كولەمى ەكى ەسەدەن اسقان
مەملەكەت باسشىسى ەۋروپالىق كەڭەس پرەزيدەنتى انتونيۋ كوشتامەن جانە ەۋروپالىق كوميسسيا پرەزيدەنتى ۋرسۋلا فون دەر ليايەنمەن كەلىسسوزدەر جۇرگىزدى.
پرەزيدەنت قاسىم-جومارت توقاەۆ ەو كوشباسشىلارى انتونيۋ كوشتامەن جانە ۋرسۋلا فون دەر ليايەنمەن جۇرگىزگەن كەلىسسوزدەر بارىسىندا قازاقستان مەن ەۋروپالىق وداق اراسىنداعى بايلانىس ەكىجاقتى ىنتىماقتاستىق تاريحىنداعى ەڭ جوعارى دەڭگەيگە جەتكەنىن اتاپ ءوتتى.
– ءوزارا سەنىم مەن قۇرمەتكە نەگىزدەلگەن ءبىزدىڭ قارىم-قاتىناسىمىز شىنايى ستراتەگيالىق سيپاتقا يە بولدى. مەن بريۋسسەلگە سان قىرلى ىنتىماقتاستىعىمىزدى ورتاق مۇددەمىز بار بارلىق سالادا تەرەڭدەتۋ ماقساتىندا كەلدىم. جاڭا عانا قول قويىلعان ماڭىزدى كەلىسىم مەن مەموراندۋمدار ىقپالداستىقتى ودان ءارى نىعايتۋعا بەيىل ەكەنىمىزدىڭ ايقىن دالەلى. بۇگىنگى كەلىسسوز قورىتىندىلارى قازاقستان-ەۋروپا قارىم-قاتىناسىنىڭ جاڭا كەزەڭىنە جول اشادى دەپ سەنەمىن، – دەدى مەملەكەت باسشىسى.
قاسىم-جومارت توقاەۆ قازاقستان مەن ەو اراسىندا اسا جوعارى دەڭگەيدەگى تۇراقتى ساياسي ديالوگ جولعا قويىلعانىن ايتتى. سونداي-اق ەلىمىزدىڭ ايماقتا ءبىرىنشى بولىپ ەو-مەن كەڭەيتىلگەن سەرىكتەستىك جانە ىنتىماقتاستىق جونىندەگى كەلىسىمگە قول قويىپ، راتيفيكاتسيالاعانىن ەسكە سالدى.
مەملەكەت باسشىسى ساۋدا-ەكونوميكالىق جانە ينۆەستيتسيالىق بايلانىستاردى دامىتۋعا ايرىقشا نازار اۋداردى.
– بۇگىندە ەو قازاقستاننىڭ ءىرى ساۋدا جانە ينۆەستيتسيالىق سەرىكتەسى سانالادى. ەۋروپالىق كومپانيالار ەكونوميكامىزدىڭ ءتۇرلى سالاسىنا زور ۇلەس قوسىپ كەلەدى. ولاردىڭ تابىسى ەۋروپالىق بيزنەستىڭ قازاقستانعا دەگەن سەنىمىن بايقاتادى. ءبىز ەۋروپالىق وداقتىڭ ورتالىق ازياداعى سەنىمدى سەرىكتەسى بولعانىمىزدى ماقتان تۇتامىز. سونداي-اق ەۋروپالىق ينۆەستورلار ءۇشىن تۇراقتى ءارى تارتىمدى ينۆەستيتسيالىق كليمات جاساۋعا ۇمتىلامىز، – دەدى پرەزيدەنت.
ەۋروپالىق كوميسسيا پرەزيدەنتى ۋرسۋلا فون دەر ليايەننىڭ ايتۋىنشا، كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمگە قول قويىلعاننان بەرگى ون جىل ىشىندە ءوزارا ساۋدا كولەمى ەكى ەسەدەن اسقان
– مۇنىڭ ءوزى كوپ جايتتى اڭعارتادى. سونىمەن قاتار ءتۇرلى سالاداعى الەۋەتىمىز ءالى دە مول. ءبىز ساۋدا قاتىناستارىن، سونىڭ ىشىندە اۋىل شارۋاشىلىعى سالاسىن ارتاراپتاندىرۋعا مۇددەلىمىز. بۇدان بولەك، ءوزارا تاۋار اينالىمى مەن ينۆەستيتسياعا تىڭ سەرپىن بەرۋ ماقساتىندا ساۋدا-ساتتىقتاعى كەدەرگىلەردى ەڭسەرۋ ماسەلەلەرىن بىرلەسىپ تالقىلاۋىمىز قاجەت. تاعى ءبىر ماسەلە. ۆيزالىق رەجيمدى جەڭىلدەتۋ جانە رەادميسسيالاۋ جونىندەگى كەلىسىمدەر بويىنشا بەلسەندى جۇمىس قولعا الىنعان. بۇعان قاتىستى كەلىسسوزدەر اياقتالىپ كەلەدى، – دەدى ۋرسۋلا فون دەر ليايەن.
Abai.kz
