كيەۆ پەن مينسك اراسىنداعى ديپلوماتيالىق تەكەتىرەس جاڭا دەڭگەيگە كوتەرىلدى. ۋكراينا پرەزيدەنتى ۆلاديمير زەلەنسكيدىڭ الەكساندر لۋكاشەنكوعا قويعان قاتال شارتتارىنان كەيىن، بريۋسسەل دە ءوز پوزيتسياسىن اشىق ءبىلدىردى. ەۋروكوميسسيا وكىلى انيتا حيپپەر ۋكراينانىڭ ءوز جەرىن قورعاۋعا تولىق قۇقىعى بار ەكەنىن مالىمدەپ، كيەۆتىڭ ۋلتيماتۋمىن رەسمي تۇردە قولدادى.

بۇل گەوساياسي تەكەتىرەستىڭ ارتىندا نە تۇر؟ ەكى وتتىڭ ورتاسىندا قالعان مينسكىنى نە كۇتىپ تۇر؟ تالداپ كورەيىك. وسى رەتتە ماڭىزدى حالىقارالىق وقيعالارعا قاتىستى جەدەل اقپاراتتى «اباي كز» اقپارات پورتالى ۇسىنادى.

زەلەنسكيدىڭ ۋلتيماتۋمى: «ءبىر اپتا ۋاقىت بار، ايتپەسە ءوزىمىز جويامىز»

19 ماۋسىمدا ۆلاديمير زەلەنسكي مينسكىدەن ۋكراينا شەكاراسىنا جاقىن ورنالاسقان برەست جانە گومەل وبلىستارىنداعى رەترانسلياتور مۇنارالارىن تەز ارادا دەمونتاجداۋدى تالاپ ەتتى. كيەۆتىڭ مالىمدەۋىنشە، بۇل قۇرىلعىلار رەسەيلىك كاميكادزە-دروندار مەن زىمىرانداردىڭ سوققىسىن ناقتى باعىتتاۋعا (كوررەكتيروۆكا) كومەكتەسىپ وتىر. زەلەنسكي بۇل ماسەلەنىڭ بۇعان دەيىن مينسكىگە بەيرەسمي تۇردە بىرنەشە رەت جەتكىزىلگەنىن، بىراق ناتيجە بولماعان سوڭ جاريا مالىمدەمە جاساۋعا ءماجبۇر بولعانىن ايتتى. ول لۋكاشەنكوعا ءدال ءبىر اپتا (26 ماۋسىمعا دەيىن) ۋاقىت بەردى. «ەگەر ول مۇنى ىستەمەسە، ونى ءوزىمىز جاسايمىز»، — دەپ ەسكەرتتى ۋكراينا پرەزيدەنتى.

بريۋسسەلدىڭ جاۋابى: «ۋكراينانىڭ ءوزىن قورعاۋعا قۇقىعى بار»

ەۋروكوميسسيا بۇل جاعدايدا كيەۆتىڭ سوققى جاساۋ قاۋپىن ايىپتاعان جوق، كەرىسىنشە، ونى «ءوزىن-ءوزى قورعاۋ» (سامووبورونا) كونتسەپتسياسىنا ساي دەپ تاپتى. انيتا حيپپەردىڭ ايتۋىنشا:

• بەلارۋس رەجيمى رەسەيدىڭ اسكەري اگرەسسياسىنا كومەكتەسۋدى ءالى دە توقتاتقان جوق.
• مينسك تەك ۋكرايناعا عانا ەمەس، ەۋرووداق شەكاراسىندا دا ميگراتسيالىق داعدارىس ۇيىمداستىرىپ، اۋە كەڭىستىگىن بۇزىپ، تۇراقتى تۇردە ارانداتۋشىلىقيا جاساپ كەلەدى. وسىعان بايلانىستى ەۋرووداق لۋكاشەنكو رەجيمىنە قارسى سانكتسيالاردى كۇشەيتۋگە جانە الداعى ۋاقىتتا ودان دا قاتال شارالار قولدانۋعا دايىن ەكەنىن جەتكىزدى.

رەسەي ارمياسىنىڭ جانارماي بازاسى

رەترانسلياتورلاردان بولەك، كيەۆ بەلارۋس بيلىگىنە تاعى ءبىر ەسكەرتۋ جاسادى: رەسەي ارمياسىنا مۇناي ونىمدەرى مەن جانارماي جەتكىزۋدى توقتاتۋ. زەلەنسكي بۇل باعىتتا ازىرگە تىكەلەي اسكەري قاۋىپ توندىرمەگەنىمەن، «ءبىز ءبارىن كورىپ وتىرمىز» دەپ، مينسكىنىڭ ەكونوميكالىق كومەگى دە باقىلاۋدا ەكەنىن اڭعارتتى.

ءتۇيىن: زەلەنسكيدىڭ ۋلتيماتۋمى اياقتالۋعا جاقىن، ال كرەمل بۇل تالاپتى «اگرەسسيۆتى مالىمدەمە» دەپ اتاپ، جاقىن ارادا پۋتين مەن لۋكاشەنكو بۇل ماسەلەنى تالقىلايتىنىن حابارلادى. ەگەر مينسك قۇرىلعىلاردى وشىرمەسە، شەكارا ماڭىنداعى نىساندارعا تىكەلەي درون نەمەسە زىمىران سوققىلارى جاسالۋى عاجاپ ەمەس. بۇل سوعىس ورتەنىڭ بەلارۋس اۋماعىنا دا شارپۋىنا اكەلۋى مۇمكىن بە؟

لۋكاشەنكو زەلەنسكيدىڭ تالابىن ورىنداپ، مۇنارالاردى الىپ تاستاي ما، الدە بۇل جاعداي سوعىستىڭ جاڭا شەكاراعا جايىلۋىنا سەبەپ بولا ما؟

ءابىل-سەرىك الىاكبار

Abai.kz