6 ماۋسىم كۇنى وتكەن ساياسي كەڭەستىڭ كەزەكتەن تىس وتىرىسىندا Amanat پارتياسى مەن جاڭادان قۇرىلعان «ادىلەت» پارتياسىنىڭ ىقتيمال بىرىگۋ ماسەلەسى قارالعان. بۇل تۋرالى BES.media باسىلىمىنا ءماجىلىس دەپۋتاتى، پارتيانىڭ ساياسي كەڭەسى بيۋروسىنىڭ مۇشەسى ەرلان سايروۆ مالىمدەگەن.

ونىڭ ايتۋىنشا، ساياسي كەڭەس مۇشەلەرىنىڭ باسىم بولىگى پرەزيدەنتتىك رەفورمالاردى قولدايتىن ەلەكتوراتتىڭ بىرنەشە ساياسي كۇشكە بولىنبەۋى قاجەت دەگەن پىكىردە.

قازىرگى ۋاقىتتا ساياسي كەڭەس مۇشەلەرىنىڭ كوپشىلىگى بىرىگۋ يدەياسىن قولداپ وتىر. تۇپكىلىكتى شەشىم پارتيا سەزىندە قابىلدانادى. دەگەنمەن، پروپرەزيدەنتتىك كوزقاراستاعى سايلاۋشىلاردىڭ بولشەكتەنبەۋى ماڭىزدى دەگەن ۇستانىم باسىم. سوندىقتان الداعى ۋاقىتتا پارتيالاردىڭ بىرىگۋى مۇمكىن، – دەدى ەرلان سايروۆ.

ازىرگە ەكى ساياسي ۇيىمنىڭ قوسىلۋى تۋرالى رەسمي شەشىم قابىلدانعان جوق. بۇل ماسەلە الداعى پارتيا سەزىندە قارالىپ، ناقتى قورىتىندى جاريالانباق.

قازىرگى تاڭدا قازاقستاندا رەسمي تۇردە سەگىز ساياسي پارتيا تىركەلگەن. ولار: Amanat, «اق جول», جالپىۇلتتىق سوتسيال-دەموكراتيالىق پارتيا (جسدپ), «رەسپۋبليكا», قازاقستان حالىق پارتياسى، «اۋىل», «بايتاق» جانە «ادىلەت».

جاڭا ساياسي ۇيىمنىڭ قۇرىلعانى تۋرالى 2026 جىلعى 15 ساۋىردە جاريالانعان بولاتىن. كەلەسى كۇنى پارتيانىڭ باستاماشىل توبى مەملەكەتتىك تىركەۋدەن ءوتۋ ءۇشىن قۇجاتتارىن ادىلەت مينيسترلىگىنە تاپسىردى.

پارتيا وكىلدەرى وزدەرىنىڭ نەگىزگى ۇستانىمدارى رەتىندە ساياسي جاڭعىرۋدى قولداۋدى، جاڭارتىلعان كونستيتۋتسيا قاعيداتتارىن جۇزەگە اسىرۋدى، زاڭ ۇستەمدىگىن نىعايتۋدى جانە ازاماتتاردىڭ قوعامدىق-ساياسي ومىرگە قاتىسۋ مۇمكىندىگىن كەڭەيتۋدى اتاعان.

«ادىلەت» پارتياسىنىڭ توراعاسى بولىپ پرەزيدەنت اكىمشىلىگىن بۇرىن باسقارعان ايبەك دادەباي سايلاندى. ساياسي كەڭەس قۇرامىنا «قازاقتەلەكوم» كومپانياسىنىڭ باسقارما توراعاسى باعدات مۋسين, بالا قۇقىقتارى جونىندەگى ۋاكىل دينارا زاكيەۆا, كاسىپكەر اندرەي لاۆرەنتەۆ, ساياساتتانۋشى مارات شيبۋتوۆ, قوعام قايراتكەرى راۋان كەنجەحانۇلى جانە استانا حالىقارالىق قارجى ورتالىعىنىڭ باسقارۋشى ديرەكتورى رەنات بەكتۇروۆ ەنگەن.

ەگەر بىرىگۋ تۋرالى شەشىم قابىلدانسا، بۇل قازاقستاننىڭ پارتيالىق جۇيەسىندەگى سوڭعى جىلدارداعى ەڭ ءىرى ساياسي وزگەرىستەردىڭ ءبىرى بولۋى مۇمكىن.

Abai.kz