جەتىسۋ وبلىسىندا بيىلعى جازعى ماۋسىمدا وبلىسقا بولجاممەن 2 ميلليوننان استام تۋريست كەلەدى. وسى جىلى سالادا 7 مىڭ ادام جۇمىسپەن قامتىلادى، ونىڭ 1 200-ءى تۇراقتى جۇمىسقا ورنالاستىرىلادى. جالپى، جەتىسۋ وبلىسىنىڭ تۋريستىك دامۋى 5 باسىم باعىتتاعى دەستيناتسيالارعا نەگىزدەلگەن. ولار – الاكول مەن بالقاش كولدەرى، «التىنەمەل» مەن «جوڭعار الاتاۋى» ۇلتتىق پاركتەرى، سونداي-اق جوڭعار الاتاۋىنىڭ تاۋ جوتاسى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

وبلىس اكىمىنىڭ ءبىرىنشى ورىنباسارى الىبەك جاقانباەۆتىڭ ايتۋىنشا، مەملەكەت باسشىسىنىڭ تاپسىرماسىنا سايكەس وڭىردە دەربەس تۋريزم باسقارماسى قۇرىلدى. «الاكول تازالىق» جانە «بالقاش تازالىق» كوممۋنالدىق كاسىپورىندارى قۇرىلىپ، 43 بىرلىك تەحنيكامەن، 87 شتات بىرلىگىمەن قامتىلدى. جالپى سۋ پايدالانۋدىڭ قاعيدالارى بەكىتىلدى.

بۇل رەتتە الاكول جانە بالقاش كولدەرى جاعالاۋىندا ينفراقۇرىلىم دامىتىلۋدا:

- بەسكول جانە اقشي اۋىلدارى ارالىعىندا 57 كم ەلەكتر جەلىسى مەن 2 قوسالقى ستانتسيانىڭ قۇرىلىسى اياقتالىپ، ەلەكترمەن جابدىقتاۋ ماسەلەسى تولىعىمەن شەشىلدى. اقشي اۋىلىندا 69,7 كم كارىز جەلىلەرى سالىندى، تازارتۋ قوندىرعىلارىنىڭ قۇرىلىسى جۇرگىزىلۋدە، اياقتالۋ مەرزىمى – وسى جىلدىڭ قاراشا ايى. وتكەن جىلدان بەرى جاعالاۋدى بەكىتۋ بوگەتىن سالۋ جۇمىستارى ءجۇرىپ جاتىر، بۇگىنگە 2,2 كم سالىندى، جۇمىستار جالعاسۋدا. كول جاعالاۋىنداعى قوقىس شىعارۋ ماسەلەسىن شەشۋ ءۇشىن 10 گەكتار جەرگە تۇرمىستىق قاتتى- قالدىقتار پوليگونىنىڭ جوبالاۋ-سمەتالىق قۇجاتتاماسى ازىرلەندى، - دەدى ءا. جاقانباەۆ.

بالقاش جاعالاۋىن دامىتۋ ماقساتىندا كولگە اپاراتىن 137 شاقىرىم جول قايتا جاڭعىرتىلىپ، پايدالانۋعا بەرىلدى. لەپسى اۋىلىنان كول جاعالاۋىنا دەيىن ەلەكتر جانە سۋ جەلىلەرى تارتىلدى. قازىرگى ۋاقىتتا كول جاعالاۋىنداعى ينجەنەرلىك - كوممۋنيكاتسيالىق جەلىلەردىڭ قۇرىلىسى اياقتالۋ ساتىسىندا. سول سياقتى جاعالاۋدا 3 كوممۋنالدىق جاعاجاي سالىنادى، ونىڭ 2-ءۋى بيىل اياقتالادى. سونداي-اق، لەپسى ستانتسياسىندا جاڭا تەمىرجول ۆوكزالى تامىز ايىندا قولدانىسقا بەرىلەدى.

جالپى، الاكول، بالقاش جاعالاۋلارىندا ءتيىستى تالاپتارعا سايكەس قوقىس كونتەينەرلەرى، كيىم اۋىستىراتىن ورىندار، بيودارەتحانالار، قۇتقارۋ مۇنارالارى، بۋي جەلىلەرى جانە پيرس ورناتىلدى.

ەكولوگيالىق تۋريزم جايىنا توقتالساق، «التىنەمەل» ۇلتتىق پاركىندە جەكە ينۆەستيتسيالار ەسەبىنەن، ال توپولەۆكا اۋىلىندا جەرگىلىكتى بيۋدجەت ەسەبىنەن ۆيزيت-ورتالىقتار اشىلدى. جاسىلكول كولىنە اپاراتىن جولدىڭ قۇرىلىسى وسى جىلى اياقتالادى. بۇرقانبۇلاق سارقىراماسىنا اپاراتىن 31 كم اۆتوموبيل جولى قايتا جاڭارتىلۋدا.

اتاپ وتسەك، وبلىس اۋماعىندا جالپى سىيىمدىلىعى 22 مىڭ توسەك-ورىن بولاتىن 393 ورنالاستىرۋ ورنى جۇمىس ىستەيدى. كورسەتىلەتىن تۋريستىك قىزمەتتەردىڭ كولەمى 9 ملرد.تەڭگەدەن اسادى. سونداي-اق، جەكە ينۆەستيتسيالار ەسەبىنەن 21 دەمالىس ورنى سالىنۋدا.

جالپى، وبلىستا ءتۋريزمدى دامىتۋ جانە تۋريستەرگە جاعداي جاساۋ جۇمىستارى وبلىس اكىمىنىڭ تۇراقتى باقىلاۋىندا.

جەتىسۋ وبلىسى اكىمىنىڭ ءباسپاسوز قىزمەتى

Abai.kz