الماتىدا «الماتى – 2025 جىلعى تۇركى الەمىنىڭ جاستار استاناسى» جوباسى اياسىندا ۇيىمداستىرىلعان تۇركى مەملەكەتتەرى ۇيىمىنىڭ حالىقارالىق جاستار كەمپينگى جۇمىسىن جالعاستىرۋدا. باعدارلامانىڭ ەكىنشى كۇنى ەكولوگيا، تۇراقتى دامۋ، تسيفرلىق ترانسفورماتسيا جانە تۇركى ەلدەرىنىڭ جاس كوشباسشىلارى اراسىنداعى ىنتىماقتاستىقتى نىعايتۋ ماسەلەسىنە ارنالدى.

ءىس-شاراداعى باستى وقيعا – «تازا قازاقستان» جالپىۇلتتىق باستاماسىن قولداۋ ماقساتىندا ۇيىمداستىرىلعان «Turkic Youth Tree of Unity» حالىقارالىق ەكولوگيالىق اكتسياسى بولدى. قازاقستان، تۇركيا، ءازىربايجان، قىرعىزستان، وزبەكستان جانە تۇرىكمەنستاننان كەلگەن كەمپينگ قاتىسۋشىلارى بىرلەسىپ اعاش ەگىپ، ونى بىرلىك، دوستىق جانە قورشاعان ورتانى ساقتاۋداعى ورتاق جاۋاپكەرشىلىكتىڭ بەلگىسى رەتىندە تانىتتى. بۇل اكتسيا جاستاردىڭ ەكولوگيالىق مادەنيەتتى قالىپتاستىرۋعا، تابيعاتقا جاناشىرلىقپەن قاراۋعا قوسقان ناقتى ۇلەسى بولىپ، سونداي-اق بۇگىنگى تاڭدا تۇركى الەمى ەلدەرىنىڭ جاستار ساياساتىنىڭ ماڭىزدى باعىتىنا اينالعان تۇراقتى دامۋ قۇندىلىقتارىن دارىپتەدى.

سۋرەت: شارا ۇيىمداستىرۋشىلارىنان الىندى.

«ەكولوگيالىق جاۋاپكەرشىلىك ءار ادامنىڭ جەكە ىسىنەن باستالادى. بۇگىندە تۇركى مەملەكەتتەرىنىڭ جاستارى ەلىنىڭ بولاشاعىن تالقىلاپ قانا قويماي، ناقتى ىستەرى ارقىلى قورشاعان ورتاعا قامقورلىق جاساۋعا دايىن ەكەنىن كورسەتۋدە. وسىنداي باستامالار حالىقتار اراسىنداعى دوستىقتى نىعايتىپ، جاس ۇرپاقتىڭ بويىندا جاسامپازدىق مادەنيەتىن قالىپتاستىرۋعا ىقپال ەتەدى دەپ سەنەمىن»، – دەدى الماتى قالاسى جاستار ساياساتى باسقارماسىنىڭ باسشىسى ازيز قاجدەنبەك.

باعدارلاما اياسىندا «Digital Turkic Youth» فورۋمى ءوتىپ، وندا قاتىسۋشىلار جاساندى ينتەللەكتىنى دامىتۋ، تسيفرلىق داعدىنى جەتىلدىرۋ جانە بولاشاق ەكونوميكاسىنىڭ تالاپتارىنا ساي جاس مامانداردى دايارلاۋ جايىن تالقىلادى.

سۋرەت: شارا ۇيىمداستىرۋشىلارىنان الىندى.

تۇستەن كەيىن «اشىق ءارى ادىلەتتى قوعامدى دامىتۋداعى جاستاردىڭ ءرولى» اتتى سەسسيا ۇيىمداستىرىلىپ، وندا ازاماتتىق بەلسەندىلىك، زاڭ ۇستەمدىگى، جاستاردىڭ شەشىم قابىلداۋ ۇدەرىستەرىنە قاتىسۋى جانە قوعامدىق ينستيتۋتتاردى دامىتۋ جايى ءسوز بولدى.

سونىمەن قاتار، جاستاردىڭ اشىق ءارى ادىلەتتى قوعام قالىپتاستىرۋداعى رولىنە، ولاردىڭ قوعامدىق ۇدەرىستەرگە بەلسەندى ارالاسۋىنا جانە جاڭا كوشباسشىلىق قابىلەتىن دامىتۋعا ەرەكشە نازار اۋدارىلدى. ءىس-شارا ءتۇرلى ەلدەردىڭ وكىلدەرىن ۇلتتىق ءداستۇرى، شىعارماشىلىعى مەن مادەني مۇراسى ارقىلى جاقىنداستىرعان Cultural Night مادەني كەشىمەن قورىتىندىلاندى.

«بۇل كەمپينگكە قاتىسۋ ءبىز ءۇشىن باۋىرلاس حالىقتاردىڭ مادەنيەتىمەن تانىسىپ قانا قويماي، قوعامعا پايدا اكەلەتىن ورتاق باستامالاردى بىرگە جۇزەگە اسىرۋعا مۇمكىندىك بەرەدى. ەكولوگيالىق اكتسيا ءبىزدىڭ بىرلىگىمىز بەن بولاشاق الدىنداعى ورتاق جاۋاپكەرشىلىگىمىزدىڭ سيمۆولىنا اينالدى»، – دەدى قىرعىزستاننان كەلگەن كەمپينگ قاتىسۋشىسى.

حالىقارالىق جاستار كەمپينگى تۇركى مەملەكەتتەرىنىڭ جاس كوشباسشىلارى اراسىندا اشىق ديالوگ جۇرگىزۋگە، تاجىريبە الماسۋعا جانە بىرلەسكەن باستامالاردى دامىتۋعا ارنالعان ماڭىزدى الاڭ رەتىندە جۇمىسىن جالعاستىرىپ وتىر. ال 14 ماۋسىمدا قاتىسۋشىلاردى ءىس-شارا قورىتىندىلانىپ، «الماتى – 2025 جىلعى تۇركى الەمىنىڭ جاستار استاناسى» جوباسى رەسمي تۇردە جابىلادى. وسى ءراسىم بارىسىندا جاستار استاناسىنىڭ مارتەبەسى كەلەسى قالاعا تابىستالادى.

Abai.kz