ولجاس بەكتەنوۆ قىتايدىڭ ءىرى كومپانيالارىنىڭ باسشىلارىمەن اوك، ونەركاسىپ، تسيفرلاندىرۋ جانە اۆتوموبيل جاساۋ سالاسىنداعى ىنتىماقتاستىقتى تالقىلادى. 

قىتايداعى «جازعى داۆوس» دۇنيەجۇزىلىك ەكونوميكالىق فورۋمىنىڭ 17-ءشى جىل سايىنعى كەزدەسۋى اياسىندا قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ ونەركاسىپ پەن تسيفرلاندىرۋ سالاسىندا جەتەكشى ورىندارعا يە قىتايلىق ءىرى كومپانيالاردىڭ باسشىلارىمەن كەزدەسۋلەر وتكىزدى. ولاردىڭ ىشىندە، Yulin Irrigation باس ديرەكتورى تسي يۋبو، Xiamen Wanli Stone ديرەكتورلار كەڭەسىنىڭ توراعاسى حۋ تسزينپەي، SuperX AI Technology Limited ديرەكتورلار كەڭەسىنىڭ توراعاسى ءارى CEO حۋان چەنحۋن، Jinyi Holding Group ديرەكتورلار كەڭەسىنىڭ توراعاسى  تسزين پەن، Guangzhou Automobile Group ديرەكتورلار كەڭەسىنىڭ توراعاسى فەن سينيا، CATL كومپانياسىنىڭ نەگىزىن قالاۋشى جانە ديرەكتورلار كەڭەسىنىڭ توراعاسى تسەن يۋيتسيۋن، CISDI Engineering ۆيتسە-پرەزيدەنتى يۋن ليۋ بار.

قازاقستان ءۇشىن باسىم سالالاردا – اوك، ونەركاسىپ، كومىر حيمياسى، اۆتوموبيل جاساۋ جانە داتا-ورتالىقتار قۇرۋدا جاڭا شەتەلدىك جوبالاردى ىسكە قوسۋ پەرسپەكتيۆالارىنا نازار اۋدارىلدى. مەملەكەت باسشىسى قاسىم-جومارت توقاەۆ قويعان مىندەتتەر شەڭبەرىندە شەتەل ينۆەستيتسيالارىن تارتۋ، وندىرىستەردى لوكاليزاتسيالاۋ جانە تەحنولوگيالار ترانسفەرتىنىڭ مۇمكىندىكتەرى قارالدى.

Yulin Irrigation كومپانياسىنىڭ باس ديرەكتورى تسي يۋبومەن كەزدەسۋدە قازاقستاندا زاماناۋي يرريگاتسيالىق تەحنولوگيالاردى ەنگىزۋ ماسەلەلەرى تالقىلاندى، ونىڭ ىشىندە قىزىلوردا وبلىسىندا يرريگاتسيالىق جابدىقتاردى قۇراستىرۋ جوباسى دا بار. سۋ رەسۋرستارىن ۇتىمدى پايدالانۋ جانە يرريگاتسيالىق ينفراقۇرىلىمدى دامىتۋ – قازاقستاننىڭ اۋىل شارۋاشىلىعى سالاسىنداعى مەملەكەتتىك ساياساتىنىڭ نەگىزگى باسىمدىقتارىنىڭ ءبىرى. ەلىمىز زاماناۋي سۋارۋ تەحنولوگيالارىن ەنگىزۋ ارقىلى اگرارلىق سەكتوردىڭ ونىمدىلىگىن ارتتىرۋعا مۇددەلى. Yulin Irrigation – قازىرگى زامانعى سۋارۋ جۇيەلەرىن ازىرلەۋگە، وندىرۋگە، ەنگىزۋگە جانە سەرۆيستىك قولداۋعا ماماندانعان قحر-داعى يرريگاتسيالىق جابدىقتاردى جەتەكشى وندىرۋشىلەردىڭ ءبىرى.

Xiamen Wanli Stone ديرەكتورلار كەڭەسىنىڭ توراعاسى حۋ تسزينپەيمەن كومىر حيمياسى، مەتاللۋرگيا جانە مينەرالدى شيكىزاتتى تەرەڭ وڭدەۋدەگى ىنتىماقتاستىق پەرسپەكتيۆالارى قاراستىرىلدى. جوبادا كومىردى جارتىلاي كوكس، سۋتەگى جانە جوعارى ساپالى مۇناي ونىمدەرىنە اينالدىراتىن، سونداي-اق موليبدەن، گەرماني جانە رەني سياقتى سيرەك مەتالداردى تەرەڭ وڭدەيتىن قوسىلعان قۇنى جوعارى «كومىر–ەلەكتر ەنەرگياسى–حيميا–مەتاللۋرگيا» ينتەگراتسيالانعان تىزبەگىن قۇرۋ كوزدەلگەن.

SuperX AI Technology Limited ديرەكتورلار كەڭەسىنىڭ توراعاسى ءارى CEO حۋان چەنحۋنمەن قازاقستاندا زاماناۋي دەرەكتەر ورتالىقتارىن قۇرۋ جوسپارى تالقىلاندى.

كومپانيا جي-ينفراقۇرىلىمدارعا جانە جوعارى تىعىزدىقتاعى دەرەكتەردى وڭدەۋ ورتالىقتارىنا ارنالعان شەشىمدەردى دامىتۋمەن اينالىسادى ءارى قازاقستاندا 2026-2029 جىلدارى كەزەڭ-كەزەڭىمەن ىسكە قوسىلاتىن، قۋاتى 1 گۆت-قا دەيىن جەتەتىن AI Data Center كلاستەرىن قۇرۋعا مۇددەلى. جي-كامپۋس سالۋ، ەنەرگيامەن جابدىقتاۋدى جانە تسيفرلىق ينفراقۇرىلىمدى دامىتۋ، سونداي-اق دەرەكتەردى وڭدەۋ ورتالىقتارى ءۇشىن سەرۆەرلىك جابدىقتار مەن تەحنولوگيالىق شەشىمدەردى جەتكىزىپ بەرۋ كوزدەلىپ وتىر.

ەكونوميكانىڭ بارلىق سەكتورلارىنا جاساندى ينتەللەكتىنى ەنگىزۋ جانە تسيفرلاندىرۋ قازاقستان ءۇشىن ستراتەگيالىق ماڭىزعا يە. پرەزيدەنت قاسىم-جومارت توقاەۆتىڭ تاپسىرماسى بويىنشا 2026 جىل تسيفرلاندىرۋ جانە جاساندى ينتەللەكت جىلى بولىپ جاريالاندى. سونداي-اق پرەزيدەنتتىڭ جارلىعىمەن ەلىمىزدىڭ تەحنولوگيالىق دامۋىنىڭ جاڭا باسىمدىقتارىن ايقىندايتىن 2029 جىلعا دەيىنگى «تسيفرلىق قازاقستان» جالپىۇلتتىق ستراتەگياسى بەكىتىلدى. كەزدەسۋ قورىتىندىسى بويىنشا پرەمەر-مينيستر ۇسىنىستى ەگجەي-تەگجەيلى زەردەلەۋ جانە ينۆەستورمەن ءوزارا ءىس-قيمىلدى ۇيلەستىرۋ ءۇشىن جۇمىس توبىن قۇرۋدى تاپسىردى.

Jinyi Holding Group ديرەكتورلار كەڭەسىنىڭ توراعاسى تسزين پەنمەن ارنايى يندۋستريالدى ايماق قۇرۋ جانە ينۆەستيتسيالىق ىنتىماقتاستىقتى كەڭەيتۋ ماسەلەلەرى قارالدى. حولدينگ ونەركاسىپتىك ينۆەستيتسيالار، لوگيستيكا جانە جاڭا ەنەرگەتيكا سالاسىندا جۇمىس ىستەيدى. Jinyi Holding Group قازاقستاندا ەكى ينۆەستيتسيالىق جوبانى جۇزەگە اسىرۋدا، ولار  – اقتوبەدەگى «جاسىل» مىس ونەركاسىبى زاۋىتى جانە باتىس قازاقستان وبلىسىنداعى يندۋستريالىق-لوگيستيكالىق حاب.

اقتوبە وبلىسىندا شەتەلدىك وندىرۋشىلەردى جەدەل لوكاليزاتسيالاۋ ءۇشىن دايىن ينجەنەرلىك ينفراقۇرىلىمى بار ءىرى يندۋستريالىق-لوگيستيكالىق پاركىن قۇرۋ باستاماسى بولەك تالقىلاندى. تەرەڭ وڭدەۋدى جانە ونەركاسىپتىك كووپەراتسيانى دامىتۋعا ىقپال ەتەتىن جوعارى قوسىلعان قۇنى بار دايىن ءونىمدى شىعارۋعا باعىتتالعان وندىرىسكە باسا نازار اۋدارىلدى.

Guangzhou Automobile Group ديرەكتورلار كەڭەسىنىڭ توراعاسى فەن سينيامەن كەزدەسۋگە قازاقستاندا اۆتوموبيل ءوندىرىسىن لوكاليزاتسيالاۋ پەرسپەكتيۆالارى ارقاۋ بولدى. GAC كومپانياسى – Fortune Global 500 رەيتينگىنە كىرەتىن قىتايدىڭ ءىرى اۆتوموبيل ءوندىرۋشىسى.

جوبانى جۇزەگە اسىرۋ GAC اۆتوموبيلدەرىن قازاقستان نارىعىنا ديستريبۋتسيالاۋدان جەرگىلىكتى وندىرىسكە كوشۋگە مۇمكىندىك بەرەدى. 2026-2028 جىلدارى ىشتەن جانۋ قوزعالتقىشتارى مەن گيبريدتى كۇشتىك قوندىرعىلارى بار مودەلدەردى قوسا العاندا، 17 مىڭ ماشينا شىعارۋ جوسپارلانۋدا.

قازاقستان ءۇشىن اككۋمۋلياتورلىق باتارەيالار مەن ەنەرگيا جيناقتاۋ جۇيەلەرىنىڭ جاڭا تەحنولوگيالىق ءوندىرىسىن قۇرۋ مۇمكىندىكتەرى CATL كومپانياسىنىڭ نەگىزىن قالاۋشى جانە ديرەكتورلار كەڭەسىنىڭ توراعاسى تسەن يۋيتسيۋنمەن تالقىلاندى.

شيكىزاتتى قايتا وڭدەۋدەن باستاپ دايىن اككۋمۋلياتورلاردى، ەنەرگيانى ساقتاۋ جۇيەلەرىن شىعارۋعا، سونداي-اق پايدالانىلعان باتارەيالاردى كادەگە جاراتۋعا دەيىن قوسىلعان قۇنى جوعارى بىرلەسكەن جوبالاردى جۇزەگە اسىرۋ پەرسپەكتيۆالارى قارالدى. CATL – ەلەكتروموبيلدەر مەن ەنەرگيانى ساقتاۋ جۇيەلەرىنە ارنالعان الەمدەگى ەڭ ءىرى اككۋمۋلياتور ءوندىرۋشىسى، ول تارتقىش اككۋمۋلياتورلار نارىعىندا 39,2% جاھاندىق ۇلەستى الادى.

CISDI Engineering ۆيتسە-پرەزيدەنتى يۋن ليۋمەن كەزدەسۋدە وتاندىق مەتاللۋرگيانى تەحنولوگيالىق جاڭعىرتۋ جانە وزىق ينجەنەرلىك شەشىمدەردى ەنگىزۋ ماسەلەلەرى تالقىلاندى. قازاقستاننىڭ مەتاللۋرگيالىق الەۋەتىن نىعايتۋداعى ماڭىزدى قادام بولاتىن شويىندى ارتىق كۇكىرتتەن ارىلتۋ جونىندەگى جوبانى ساپالى ءارى ۋاقتىلى جۇزەگە اسىرۋعا ەرەكشە نازار اۋدارىلدى. تاراپتار سونداي-اق CISDI Engineering كومپانياسىنىڭ ەلىمىزدە جاڭا قۇيۋ-جايمالاۋ كەشەنىن سالۋعا ينجينيرينگتىك ارىپتەس رەتىندە قاتىسۋ مۇمكىندىگىن قاراستىردى. كومپانيا – مەتاللۋرگيالىق ينجينيرينگ، اۋقىمدى مەتاللۋرگيالىق نىسانداردى كەشەندى جوبالاۋ جانە جۇزەگە اسىرۋ سالاسىنداعى مويىندالعان الەمدىك كوشباسشىلاردىڭ ءبىرى.

بيزنەسپەن كەزدەسۋلەر قورىتىندىسىندا ولجاس بەكتەنوۆ قازاقستان ۇزاق ۋاقىت جۇمىس ىستەۋگە، ءوندىرىستى لوكاليزاتسيالاۋعا، تەحنولوگيالار ترانسفەرتى مەن قوسىلعان قۇنى جوعارى ءونىم شىعارۋعا باعدارلانعان ينۆەستورلار ءۇشىن اشىق ەكەنىن اتاپ ءوتتى. پرەمەر-مينيستر قازاقستان قىتاي كومپانيالارىنىڭ ەلىمىزدىڭ ەكونوميكاسىنا ينۆەستيتسيا سالۋعا دەگەن قىزىعۋشىلىعىن ۇزاقمەرزىمدى ستراتەگيالىق ارىپتەستىكتىڭ نەگىزى رەتىندە قاراستىراتىنىن ايتتى. ۇكىمەت جوبالاردىڭ تۇراقتى جۇمىس ىستەۋى جانە ولاردىڭ ودان ءارى كەڭەيۋى ءۇشىن قاجەتتى جاعدايلار جاساۋعا دايىن. سالالىق مەملەكەتتىك ورگاندارعا جانە Kazakh Invest ۇلتتىق كومپانياسىنا ينۆەستيتسيالىق باستامالاردى ودان ءارى سۇيەمەلدەۋ جانە ولاردى جۇزەگە اسىرۋدىڭ پراكتيكالىق ماسەلەلەرىن پىسىقتاۋ تاپسىرىلدى.

Abai.kz