بەلگىلى جۋرناليست ءومىرجان ابدىحالىق Freedom bank ءموبيلدى قوسىمشاسىن سەبەپسىز بۇعاتتاعانىن ايتىپ، الەۋمەتتىك جەلىگە جازدى.

ونىڭ سوزىنشە، وقيعا 24-ماۋسىمدا بولعان.

«كەشكە بانك قوسىمشاسىنا قالاماقى جىبەردى. فريدوم قوسىمشاسىنان قاراجاتتى kaspi.kz قوسىمشاسىنا اۋدارۋعا بىرنەشە رەت تالپىنىس جاسادىم: كارتا نومىرىمەن جىبەرىلمەي، "قاتەلىك پايدا بولدى", "30 سەكۋندتان كەيىن قايتالاپ كورىڭىز" دەپ ەسكەرتۋ شىعا بەردى. ءسويتىپ، تەلەفون ءنومىرى بويىنشا اۋدارماق بولعان فريدوم بانك قوسىمشاسىن بۇعاتتاپ تاستادى. بىردەن بانكتىڭ «595» جەدەل جەلىسىنە حابارلاستىم»، – دەيدى ول.

تۇتقانى كوتەرگەن ادام whatsapp مەسسەندجەرىندەگى چات بوتقا سىلتەگەن. ال چات-بوتقا جازعانىندا قاجەتتى قۇجاتتاردىڭ ءتىزىمىن، بانك تۋرالى زاڭعا سىلتەمەلەر جانە ءوز قولىمەن جازىلعان ءوتىنىشتىڭ ۇلگىسىن جىبەرگەن.

"چات-بوتپەن ماسەلە شەشىلمەيتىنىن ءبىلدىم. ءسويتىپ، 25 ماۋسىمدا تۇستە Freedom bank استانا قالاسى قابانباي باتىر كوشەسى 9/2 مەكەنجايىندا ورنالاسقان بولىمشەسىنە باردىم. ەلۆيرا ەسىمدى بانك قىزمەتكەرى ءوتىنىش جازۋىمدى سۇرادى – جازدىم. سوسىن kaspi.kz-تەن سوڭعى 6 ايداعى ەسەپشوت كوشىرمەسىن، سوڭعى 6 ايداعى زەينەتاقى اۋدارىمدارىن الدىردى، بەردىم. «مۇنىڭ ءبارى نە ءۇشىن؟» دەگەنىمدە، بانك قىزمەتكەرى "بىلمەيمىن" دەدى. بۇل ەكى جەكە بانك جانە زەينەتاقى دەرەكتەرىمدى جوعارىداعى بانك قىزمەتكەرىنىڭ whatsapp-ىنا جىبەردىم", - دەيدى جۋرناليست.

ءبارىن قابىلداپ العان سوڭ، ەلۆيرا «ءوتىنىشىڭىزدى الماتىداعى باس كەڭسەگە جىبەردىم، ولار قارايدى، سوسىن سىزگە حابارلاسادى" دەگەن. بىراق قاشان حابارلاساتىنىن بىلمەيتىنىن، بالكىم، 3-7 كۇن ارالىعى بولىپ قالارىن ايتقان.

«مۇنى ەستىگەندە بانك كارتاچكاسى ءبىر اپتادا شىعاتىن 2000-شى جىلدارعا تۇسكەندەي ەسەڭگىرەپ قالا جازدادىم. شىنىمدى ايتسام، بۇعاتتاۋدى بانك بولىمشەسى قاجەتتى قۇجاتتاردى قاراپ، ءوتىنىشتى الىپ، دەرەۋ شەشىپ بەرەدى دەپ ويلاعام. شىعا ساپ، «595»-كە قايتا قوڭىراۋ شالدىم دا بانك قوسىمشاسى جونىندەگى بولىمگە قوسۋىن سۇراپ ەم، «ولارعا قوسا المايمىز» دەيدى. «نەگە؟» دەسەم، «كۇتەسىز، وزدەرى حابارلاسادى» دەيدى. سوڭعى سوزدەرىن ەستۋگە جۇيكەم جەتپەي، تۇتقانى قويا سالدىم»، – دەيدى ول.

ءومىرجان ابدىحالىق بانك قوسىمشاسى نە سەبەپتى بۇعاتتالعانىن ەشكىم تۇسىندىرمەگەنىنە ناليدى. زەينەتاقى جانە وزگە بانكتەگى دەرەكتەرىن نە ءۇشىن العاندارىن دا تۇسىندىرمەگەن. بەرىلگەن ءوتىنىشتىڭ قاشان قارالىتىنى، ول قانشا ۋاقىت الاتىنى بەلگىسىز، ەشكىم بىلمەيدى.

«قىسقاسى، جۋرناليستەر كۇنى قارساڭىندا Freedom bank وسىنداي اۋرە-سارساڭعا ساپ، جۇيكە تالشىقتارىمدى ءبىر-بىرلەپ ءۇزدى»، – دەيدى جۋرناليست.