كەزدەسۋدە مەملەكەت باسشىسى ەلىمىزدىڭ ەكونوميكالىق ءوسىمىنىڭ نەگىزگى باعىتتارىنىڭ ءبىرى رەتىندە ايقىنداعان كولىك-لوگيستيكا سالاسىن دامىتۋ ماسەلەلەرى قارالدى.

ايبەك دادەبايدىڭ ايتۋىنشا، قۋاتتى بيزنەس پەن مەملەكەت، كاسىپكەرلەر جانە ساراپشىلار قوعامداستىعى ۇدايى ءوزارا ىقپالداسىپ وتىرمايىنشا، ەكونوميكا تۇراقتى دامىمايدى. سوندىقتان «ادىلەت» پارتياسىنىڭ ىسكەرلىك كەڭەسى ديالوگ قۇرۋعا جانە ورتاق شەشىمدەر ازىرلەۋگە ارنالعان تۇراقتى الاڭعا اينالادى.

«ءبىز ءۇشىن بيزنەس – تۇتاس ەكونوميكانىڭ قوزعاۋشى كۇشى. كاسىپكەرلەر تاۋەكەلگە بارىپ، جاڭا ءىس باستايدى، ءوندىرىس اشادى، ەلدى العا باستايدى. ءاربىر كاسىپورىن – بۇل جاڭا جۇمىس ورىندارى، وتباسىلاردىڭ تابىسى، بيۋدجەتكە تۇسەتىن سالىق دەگەن ءسوز. ال سول سالىقتىڭ ەسەبىنەن مەكتەپ تە، اۋرۋحانا دا، جول دا سالىنادى. وسىلايشا، تۇتاس وڭىرلەردىڭ تۇراقتىلىعى قالىپتاسپاق»، - دەدى ول.

بۇگىندە قازاقستان ەۋرازياداعى ەڭ ءىرى كولىك-ترانزيتتىك حابتاردىڭ ءبىرى رەتىندەگى پوزيتسياسىن نىعايتىپ كەلەدى. بىلتىرعى قورىتىندى بويىنشا سالا 20,4%-عا ءوسىپ، ونىڭ ءجىو-دەگى ۇلەسى 6,1%-عا جەتتى، ال ترانزيتتىك تاسىمال كولەمى 39 ملن توننادان استى.

پارتيا توراعاسىنىڭ ايتۋىنشا، كولىك پەن لوگيستيكا – ەكونوميكالىق ءوسىمنىڭ جاڭا تابىس كوزى. ال ترانزيت جەكە تابىسى، ەكونوميكاعا قوساتىن ۇلەسى جانە جۇمىس ورىندارى بار دەربەس ەكونوميكالىق سالاعا اينالىپ كەلەدى.

«ترانزيت ەندى تەك جولدار، تەمىرجولدار مەن تەرمينالدار ماسەلەسى عانا ەمەس. ول ءوز تابىسى، جۇمىس ورىندارى، ەكونوميكالىق وسىمگە قوساتىن ۇلەسى بار دەربەس ەكونوميكا سالاسىنا اينالىپ كەلەدى. ءبىز ءۇشىن بۇل تەك جۇك تاسىمالداناتىن باعىت ەمەس. بۇل – ءوز ءوندىرىسىمىزدى دامىتۋ، ەكسپورت كولەمىن ارتتىرۋ جانە ەلىمىزدىڭ بارلىق وڭىرىندە جاڭا تابىس كوزدەرىن قۇرۋ مۇمكىندىگى»، - دەدى ايبەك دادەباي.

«قازاقستان اۆتوكولىكشىلەر وداعى» زتب اتقارۋشى ديرەكتورى مۇرات امرين كولىك سالاسى پارتيامەن تۇراقتى ديالوگ ورناتۋعا جانە زاڭنامالىق باستامالاردى بىرلەسىپ ازىرلەۋگە مۇددەلى ەكەنىن اتاپ ءوتتى.

«كولىك بيزنەسى «ادىلەت» پارتياسىنىڭ باعىتىن قولدايدى، سەبەبى ول ادىلدىك، اشىق ديالوگ جانە بۇگىندە ەلىمىزدىڭ تۇكپىر-تۇكپىرىندەگى كاسىپكەرلەردى تولعاندىرعان ماسەلەلەردى ءىس جۇزىندە شەشۋ قاعيداتتارىنا نەگىزدەلىپ وتىر. ءدال وسىنداي ءتاسىل ەكونوميكانىڭ بەلسەندى قاتىسۋشىلارىن پارتيا توڭىرەگىنە توپتاستىرۋعا جانە سالالاردى دامىتۋعا باعىتتالعان ناقتى ۇسىنىستار قالىپتاستىرۋعا مۇمكىندىك بەرەدى»، - دەدى مۇرات امرين.

كەزدەسۋگە قاتىسۋشىلار تەمىرجول تاريفتەرىن قالىپتاستىرۋ، ينۆەستيتسيا تارتۋ، حالىقارالىق اۆتوموبيل تاسىمالدارىن، جۇك اۆياتسياسىن دامىتۋ جانە سالانى ودان ءارى تسيفرلاندىرۋ ماسەلەلەرىن تالقىلادى. مەملەكەت پەن بيزنەس اراسىنداعى ءوزارا ىقپالداستىق مودەلىنە ەرەكشە نازار اۋدارىلدى.

«سولاي بولا تۇرا، بيزنەس دەگەنىمىز تەك كاسىپورىندار عانا ەمەس، ەڭ الدىمەن سول كاسىپورىنداردا ەڭبەك ەتەتىن ادامدار. سوندىقتان ءبىز ءۇشىن ەڭبەك ۇجىمدارى، ماماندار مەن ينجەنەرلىك كادرلار تاپ بولاتىن ماسەلەلەردى كورۋ ماڭىزدى. مىندەتتەر تۇسىنىكتى بولۋى كەرەك: مەملەكەت بازالىق ينفراقۇرىلىمدى دامىتىپ، ەرەجە بەلگىلەيدى، ال بيزنەس ينۆەستيتسيا سالادى، قىزمەت كورسەتەدى جانە جۇك اعىنى ءۇشىن باسەكەگە تۇسەدى»، - دەپ تۇيىندەدى پارتيا توراعاسى.

ىسكەرلىك كەڭەس تۇراقتى جۇمىس ىستەۋى ءۇشىن ەكونوميكانىڭ ءارتۇرلى سالاسىن قامتيتىن جەتى تەڭ توراعا ايقىندالدى. ولاردىڭ قاتارىنا Qarmet جانە Allur Group جەتەكشىسى اندرەي لاۆرەنتەۆ، «قازاقتەلەكوم» اق كولىكباسقارما توراعاسى باعدات مۋسين، كاسىپكەر گەننادي زەنچەنكو، قازاقستان ينۆەستورلار وداعىنىڭ باسقارما توراعاسى رۋستام ءجۇرسىنوۆ، قازاقستاندىق سالىق كەڭەسشىلەرى قاۋىمداستىعىنىڭ مۇشەسى ايجان بالاكەشوۆا، قازاقستاننىڭ جەڭىل ونەركاسىپ كاسىپورىندارى قاۋىمداستىعىنىڭ ۆيتسە-پرەزيدەنتى يننا اپەنكو، سونداي-اق ERG مەنەدجەرلەر كەڭەسىنىڭ مۇشەسى جانە Integra Construction KZ باقىلاۋ كەڭەسىنىڭ توراعاسى شاحمۇرات ءمۇتالىپ ەندى.

كەزدەسۋ قورىتىندىسى بويىنشا ايبەك دادەباي ىسكەرلىك كەڭەس تۇراقتى جۇمىس ىستەيتىن الاڭعا اينالاتىنىن اتاپ ءوتتى. وندا كاسىپكەرلىكتى، ەكونوميكانىڭ ءتۇرلى سالاسىن دامىتۋ جانە مەملەكەت پەن بيزنەس اراسىنداعى ءوزارا ىقپالداستىقتى جەتىلدىرۋ جونىندەگى باستامالار ازىرلەنەدى.

پارتيانىڭ قىزمەتى تۋرالى قوسىمشا جاڭالىقتاردى رەسمي Telegram-ارنامىزدان وقي الاسىزدار: https://t.me/adilet_partiyasy