الماتىدا ۇلتتىق دومبىرا كۇنىن مەرەكەلەۋ قارساڭىندا وتكەن ءباسپاسوز ءماسليحاتىندا قۇرمانعازى اتىنداعى قازاق ۇلتتىق كونسەرۆاتورياسىنىڭ مايتالمان پەداگوگتارى مەن ونەر يەلەرى دومبىرانىڭ ۇلتتىق مادەنيەتتى ساقتاۋداعى ءرولى مەن قازىرگى جاي-كۇيى تۋرالى وي ءبولىستى. ساراپشىلاردىڭ ايتۋىنشا، بۇگىندە دومبىرانىڭ داۋىرلەگەن جاڭا كەزەڭى باستالدى، ال اسپاپقا دەگەن قىزىعۋشىلىق ەلىمىزدە دە، شەتەلدە دە جىل ساناپ ارتىپ كەلەدى.

قازاقستاننىڭ حالىق ءارتيسى ايگۇل ۇلكەنباەۆا قوعامداعى كوزقاراستىڭ تۇبەگەيلى وزگەرگەنىن اتاپ ءوتتى. ول بۇرىن دومبىرانى وزگە اسپاپتاردان تومەن قوياتىن كەزەڭدەر بولعانىن، بىراق بۇگىندە جاعداي مۇلدە باسقا ەكەنىن ايتتى. ونىڭ سوزىنشە، 2018 جىلى ۇلتتىق دومبىرا كۇنىنىڭ بەكىتىلۋى، وتكىزىلەتىن كونتسەرتتەر مەن الەۋمەتتىك جەلىلەردەگى كونتەنت دومبىرانىڭ مارتەبەسىن بيىكتەتە ءتۇستى. قازىر ۇلتتىق اسپاپقا شەتەلدىكتەر دە ەرەكشە قىزىعۋشىلىق تانىتۋدا.

ءوز كەزەگىندە «قۇرمەت» وردەنىنىڭ يەگەرى ابدۋلحاميت رايمبەرگەنوۆ بابالاردان قالعان ون مىڭنان استام كۇي مەن ءان – ولمەس مۇرا ەكەنىن ەسكە سالدى. ول بۇگىندە مەملەكەتتىك قولداۋدىڭ ارقاسىندا عىلىمي ىزدەنىستەر مەن ارحيۆتىك دەرەكتەردىڭ، سونىڭ ىشىندە قازانعاپ كۇيشىگە قاتىستى زەرتتەۋلەردىڭ كەڭىنەن جاريالانىپ جاتقانىن اتاپ ءوتتى. ا. رايمبەرگەنوۆ جىلدار بۇرىن ايماقتاردا دومبىرا ۇيرەتۋ ادىستەمەسىن ەنگىزگەندە بالالاردىڭ اسپاپتى ۇستاۋدان ۇيالعانىن، ال قازىر مەكتەپ وقۋشىلارىنىڭ دومبىرانى ماقتانىشپەن الىپ جۇرگەنىن، بۇل ۇلتتىق ونەردىڭ ناعىز قايتا ورلەۋى ەكەنىن جەتكىزدى.

كونسەرۆاتوريا پروفەسسورى كاريما ساحارباەۆا بولسا، دومبىرانىڭ كاسىبي دەڭگەيدە دامۋىنا احمەت جۇبانوۆتىڭ سىڭىرگەن ەڭبەگى وراسان ەكەنىن باسا ايتتى. «بيىل 120 جىلدىعى تويلانىپ جاتقان ا. جۇبانوۆ دومبىرا ونەرىنىڭ نەگىزىن قالاپ، وركەستر قۇردى، كونسەرۆاتوريا اشتى. وسىنىڭ ارقاسىندا اۋىزشا ءداستۇر عىلىمي تۇرعىدا جۇيەلەندى»، — دەدى ول. كاريما ساحارباەۆا بۇگىندە كونسەرۆاتوريا تۇلەكتەرىنىڭ كومپوزيتور، ديريجەر رەتىندە جاڭا تۋىندىلار جازىپ، ەلىمىزدىڭ تۇكپىر-تۇكپىرىندە دومبىرا ۇيىرمەلەرىنىڭ اشىلۋىنا مۇرىندىق بولىپ جۇرگەنىن ماقتانىشپەن تىلگە تيەك ەتتى.

بۇل ويدى دوتسەنت ەرجان جامەنكەەۆ تە قۋاتتاپ، ون بەس جىل بۇرىن بەس مىڭ كۇي تۋرالى ايتىلسا، بۇگىندە ولاردىڭ سانى ون مىڭنان اسقانىن العا تارتتى. ونىڭ ايتۋىنشا، مۇنداي باي ءداستۇر ەشبىر كورشى ەلدە جوق. سونىمەن قاتار ەرجان جامەنكەەۆ بولاشاقتا دومبىرانىڭ جيىرمادان استام ءتۇر-ءتۇرىن كەڭىنەن ناسيحاتتاۋ جانە زاماناۋي دومبىراشىنىڭ رەپەرتۋارىنا الەمدىك كلاسسيكانى ەنگىزۋ ماسەلەلەرى كونسەرۆاتوريادا تالقىلانىپ جاتقانىن ءسوز ەتتى.

باسقوسۋ سوڭىندا ساراپشىلار ۇلتتىق دومبىرا كۇنىنىڭ ماڭىزى جىل سايىن ارتا بەرەتىنىنە سەنىم ءبىلدىرىپ، قازاقستاندىقتاردى مەرەكەمەن قۇتتىقتادى. دومبىرانىڭ تەك وتكەننىڭ ەمەس، جارقىن بولاشاقتىڭ دا اسپابى بولىپ قالا بەرەتىنىن باسا ايتتى.

Abai.kz