كورشى قىرعىز ەلىندە وتىن تاپشىلىعى سەزىلە باستاعان سىڭايلى. قىرعىزستان بيلىگى ەلىمىزدىڭ ەنەرگەتيكا مينيسترلىگىنە رەسمي ءوتىنىش جولداپ، بەنزين جەتكىزىپ بەرۋدى سۇراعان. استانا بۇل ءوتىنىشتى ۇستەل ۇستىنە قويىپ، قىزۋ تالقىلاۋدى باستاپ كەتتى.

بۇل قادام قازاقستاننىڭ ىشكى نارىعىنا قالاي اسەر ەتەدى؟ وزىمىزدە جانارماي باعاسى قىمباتتاپ كەتپەي مە؟ جاعدايدى تالداپ كورەيىك.

شۇعىل ءوتىنىش جانە استانانىڭ پوزيتسياسى ۇكىمەتتە وتكەن بريفينگتە ەنەرگەتيكا ۆيتسە-ءمينيسترى قايىرحان تۇتقىشباەۆ بىشكەكتەن رەسمي سۇرانىستىڭ تۇسكەنىن راستادى.

«قىرعىز تاراپىنان رەسمي ساۋال كەلىپ ءتۇستى، قازىر ونى قاراستىرىپ جاتىرمىز. بارلىق شەشىمدەر تەك ۇلتتىق مۇددەلەر مەن ىشكى نارىقتىڭ تەڭگەرىمىن (بالانسىن) ەسكەرە وتىرىپ قابىلدانادى»، – دەدى ۆيتسە-مينيستر.

ءبىر قىزىعى، ءدال وسى تۇتقىشباەۆ بۇعان دەيىن شەتەلدىك كولىكتەردىڭ قازاقستانعا كىرۋىن تاۋلىگىنە 1 رەتكە دەيىن شەكتەپ، ەلدەن جانارمايدى زاڭسىز تاسۋعا توسقاۋىل قويىلعانىن مالىمدەگەن ەدى. ەندى، مىنە، كورشى ەل زاڭسىز ەمەس، زاڭدى تۇردە وتىن ءبولۋدى سۇراپ وتىر. دەگەنمەن، مينيسترلىك ەگەر قىرعىزستانعا بەنزين بەرىلەتىن بولسا، بۇل ءبىزدىڭ ىشكى نارىققا ەشقانداي نۇقسان كەلتىرمەيتىنىن جانە باعانىڭ وسۋىنە اكەلمەيتىنىن ايتىپ، حالىقتى تىنىشتاندىرۋعا تىرىستى.

بىشكەك جان-جاقتان بالاما ىزدەۋدە قىرعىزستان بيلىگى مۇناي ونىمدەرىنىڭ يمپورتىندا ىركىلىستەر پايدا بولعاندىقتان، وتىن تاسىمالداۋدىڭ بالاما كوزدەرىن شۇعىل ىزدەستىرۋگە كوشكەن. ولار تەك قازاقستانعا عانا ەمەس، سونىمەن بىرگە:

• رەسەي،
• بەلارۋس،
• ازەربايجان،
• وزبەكستان جانە تۇركمەنستانعا دا وسىنداي رەسمي وتىنىشتەر جولداعان.

بۇعان قوسا، ەنەرگەتيكا مينيسترلىگى سوڭعى كەزدەرى ىشكى ءموز-دەرىنە ۋكرايندىق درونداردىڭ سوققىسىنان كەيىن وتىن تاپشىلىعىن سەزىنە باستاعان رەسەي تاراپىنان قازاقستانعا ەشقانداي رەسمي سۇرانىس تۇسپەگەنىن ناقتىلادى.

ءتۇيىن: ورتالىق ازياداعى ەنەرگەتيكالىق كارتا قايتا سىزىلىپ جاتقانداي. قازاقستان ءبىر جاعىنان شەكاراداعى «سۇر» كونتراباندانى بۋىندىرىپ جاتسا، ەكىنشى جاعىنان كورشىسىنە رەسمي تۇردە كومەك قولىن سوزۋ ماسەلەسىن ويلانىپ وتىر. ەڭ باستىسى – بۇل «جانارماي ديپلوماتياسى» قاراپايىم قازاقستاندىقتاردىڭ قالتاسىنا سوققى بولىپ تيمەۋى ءتيىس. استانا كورشىسىنە كومەكتەسە وتىرىپ، ءوز ىشكى بالانسىن ساقتاپ قالا الا ما؟ ناعىز ديپلوماتيالىق ەمتيحان ەندى باستالدى.

ايماقتاعى ەنەرگەتيكالىق تەكەتىرەستەر، ۇكىمەتتىڭ جابىق وتىرىسىنداعى شەشىمدەر مەن جانارماي باعاسىنا قاتىستى ەڭ سوڭعى مالىمەتتى Abai.kz اقپاراتتىق پورتالى ۇسىنادى. نارىقتىڭ باستى تامىر سوعىسىن بىزبەن بىرگە باقىلاڭىزدار!

ءابىل-سەرىك الىاكبار

Abai.kz