قاسىم-جومارت توقاەۆ شانحايدا قحر-دىڭ جوعارى تەحنولوگيالىق كومپانيالارىنىڭ باسشىلارىمەن دوڭگەلەك ۇستەل وتكىزدى. مەملەكەت باسشىسى قازاقستان مەن قىتايدىڭ قازاق-قىتاي قارىم-قاتىناستارىنىڭ جاڭا «التىن وتىز جىلدىعىنا» قادام باسقانىن، ال ەكىجاقتى ىنتىماقتاستىقتىڭ ساپالىق تۇرعىدان مۇلدەم جاڭا دەڭگەيگە كوتەرىلگەنىن اتاپ ءوتتى.

پرەزيدەنت قىتايدىڭ قازاقستان ەكونوميكاسىنا $30 ميللياردتان استام ينۆەستيتسيا سالعانىن، ال وتكەن جىلدىڭ قورىتىندىسى بويىنشا ءوزارا ساۋدا-ساتتىق كولەمى رەكوردتىق $49 ميللياردقا جەتكەنىن ەرەكشە اتاپ ءوتتى. ەلىمىزدە قىتاي كاپيتالىنىڭ قاتىسۋىمەن 8,5 مىڭنان استام كاسىپورىن تابىستى جۇمىس ىستەپ جاتىر، سونداي-اق گاز-حيميا، وڭدەۋ، توقىما جانە اۆتوموبيل ونەركاسىبى سالالارىندا بىرلەسكەن جوبالار جۇزەگە اسىرىلۋدا.

مەملەكەت باسشىسى قازاقستاننىڭ تسيفرلىق ترانسفورماتسياسىنىڭ باسىمدىقتارىن تانىستىرىپ، جاساندى ينتەللەكتىنى دامىتۋعا جانە قازاقستان مەن بۇكىل ورتالىق ازيانىڭ تسيفرلىق ينفراقۇرىلىمىنىڭ نەگىزگى تىرەگىنە اينالۋى ءتيىس ەكىباستۇزداعى Data Center Valley جوباسىنا ەرەكشە نازار اۋداردى.

ەلىمىزدىڭ كولىك-لوگيستيكالىق الەۋەتىن دامىتۋعا ەرەكشە ەكپىن بەرىلدى. پرەزيدەنتتىڭ ايتۋىنشا، قىتاي مەن ەۋروپا اراسىنداعى تەمىرجول تاسىمالىنىڭ شامامەن 85%-ى قازاقستان ارقىلى جۇزەگە اسىرىلادى. ەۋرازيانىڭ بىرىڭعاي تسيفرلىق كولىك كەڭىستىگىن قالىپتاستىرۋ ءۇشىن قازاقستان كەدەندىك، لوگيستيكالىق جانە كوممەرتسيالىق قىزمەتتەردى بىرىڭعاي تسيفرلىق ورتاعا بىرىكتىرەتىن Smart Cargo پلاتفورماسىن دامىتۋدا.

سونىمەن قاتار پرەزيدەنت اسا ماڭىزدى مينەرالدار سالاسىنداعى ىنتىماقتاستىق پەرسپەكتيۆالارىن، جاساندى ينتەللەكت پەن تسيفرلىق تەحنولوگيالاردى قولدانا وتىرىپ اگروونەركاسىپتىك كەشەندى دامىتۋدى، سونداي-اق ەۋرازياداعى تالانتتاردىڭ، تەحنولوگيالار مەن ينۆەستيتسيالاردىڭ جاڭا ورتالىعى رەتىندە الاتاۋ قالاسىن Digital by Default قاعيداتى بويىنشا قۇرۋدى بەلگىلەپ بەردى.

جيىن سوڭىندا قاسىم-جومارت توقاەۆ قازاقستاننىڭ قىتايلىق ينۆەستورلار ءۇشىن قولايلى جاعداي جاساۋعا دايىن ەكەنىن راستاپ، ەلىمىزدىڭ تەك كاپيتال تارتۋدى عانا ەمەس، سونىمەن قاتار تەحنولوگيالاردى بىرلەسىپ ازىرلەۋدى، عىلىمي-زەرتتەۋ ورتالىقتارىن، جاڭا وندىرىستىك تىزبەكتەردى قۇرۋدى جانە ءبىلىم ەكونوميكاسىن دامىتۋدى ماقسات ەتەتىنىن اتاپ ءوتتى.

Abai.kz