اباي كۇنى قارساڭىندا الماتى قالاسىندا اشىق اسپان استىنداعى ساحنادا «اباي الەمى» اتتى مەرەكەلىك كەش وتەدى. كەش بارىسىندا قازاقستان رەسپۋبليكاسى مادەنيەت جانە اقپارات مينيسترلىگىنىڭ «ۇلتتىق كينونى قولداۋ مەملەكەتتىك ورتالىعى» قولداۋىمەن تۇسىرىلگەن «العاشقى كىتاپ» اتتى دەرەكتى دوكۋدراماسىنىڭ العاشقى كورسەتىلىمى بولادى.

دەرەكتى فيلم قازاقتىڭ نەشە عاسىرلىق رۋحاني تاريحىنداعى تاڭ قالارلىق ۇلى وقيعا - 1909 جىلى پەتەربور قالاسىندا يلياس بوراگانسكي باسپاسىنان جارىق كورگەن ابايدىڭ تۇڭعىش كىتابىنىڭ قيلى تاعدىرىن بايان ەتەدى.

پرەمەرا سوڭى الماتى قالاسى اكىمدىگىنىڭ مادەنيەت باسقارماسى ۇيىمداستىرعان اباي مۇراسىن ناسيحاتتاعان كونتسەرتتىك باعدارلاماعا ۇلاسادى.

تالعات كۇزەمباەۆ، ليديا كادەنوۆا، ەرلان ءبىلال، دارحان سۇلەيمەنوۆ، اسان ءماجيت، دينارا كەمەلحان، ەردەن جاقسىبەك، «الاشۇلى» توبى مەن حور كاپەللاسىنىڭ قاتىسۋىمەن مۋزىكالىق-پوەتيكالىق قويىلىم بولادى.

كەش ارى قاراي اباي كۇنىنە ارنالعان، ۇلى اقىن-اعارتۋشىنىڭ اندەرى شىرقالىپ، سوزدەرى وقىلاتىن «Almaty summer fest» فەستيۆالىنە جالعاسادى. فەستيۆالگە ماقپال ءجۇنىسوۆا، جانار دۇعالوۆا، اسحات تارعىن، نۇرلان بەردىباەۆ، سەرىك يساحان، Ayarai, Birzhan Demeuuly, Nurtore, Magsoul, «Kesh you»، «6ellucci»، «IL Canto»، ت.ب. قاتىسادى.

مەرەكەلىك كەش سوڭىندا مىڭداعان استام ادام اشىق اسپان استىندا اباي اندەرىن بىرگە شىرقايدى.

Abai.kz