بۇگىن، 23 تامىزدا، قۇرىلتاي دەپۋتاتتارىن سايلاۋ كۇنى الماتى وبلىسىنىڭ تۇرعىندارى مەن قوناقتارى قوعامدىق كولىك قىزمەتىن تەگىن پايدالانا الادى. تەگىن جول ءجۇرۋ مۇمكىندىگى قالاارالىق باعىتتاردى قوسپاعاندا، بارلىق اۆتوبۋستاردى قامتيدى.

اۆتوبۋستار جولاۋشىلاردى ادەتتەگى باعىتتارى بويىنشا بەلگىلەنگەن كەستەگە سايكەس تاسىمالدايدى. تەگىن جول ءجۇرۋ قوناەۆ جانە الاتاۋ قالالارىندا، ىلە، قاراساي، جامبىل، ۇيعىر، تالعار جانە ەڭبەكشىقازاق اۋداندارىندا ۇيىمداستىرىلعان.

اتاپ ايتقاندا، قوناەۆتا توعىز باعىت بويىنشا جول ءجۇرۋ تەگىن. ولار: №1 قوناەۆ – ارنا، №2 “كاپشاعاي رەسۋرس” جشس مۇناي بازاسى – 12-شاعىناۋدان، №3 “اتك”شاعىناۋدانى – قالالىق كوپبەيىندى اۋرۋحانا، №4 سترويتەل ساياجاي سەرىكتەستىگى – قارلىعاش شاعىناۋدانى، №7 سۇزگىلەۋ ستانتسياسى – 8–10-شاعىناۋداندار، №8 رمم 64192 اسكەري ءبولىمىنىڭ 2-جەلىسى – قالالىق اۋرۋحانا، سونداي-اق №9پ، №10پ جانە №11پ قالا ماڭى باعىتتارى.

جاڭا الاتاۋ قالاسىندا №1 Gate City شاعىناۋدانى – كوكتوبەك اۋىلى جانە №2 قۇيعان شاعىناۋدانى – Gate City شاعىناۋدانى باعىتتارى بويىنشا تەگىن قاتىناۋعا بولادى.

ال ىلە اۋدانىندا №301, №302, №303, №305 جانە №306 مارشرۋتتارىندا جولاۋشىلار تەگىن تاسىمالدانادى.

قاراساي اۋدانىندا قاسكەلەڭ قالاسىنىڭ №1 جانە №2 قالالىق باعىتتارى، سونداي-اق №3, №5, №6, №7 جانە №9 مارشرۋتتارى تەگىن قىزمەت كورسەتەدى.

جامبىل اۋدانىندا جەتى باعىت بويىنشا تەگىن جول ءجۇرۋ قاراستىرىلعان. بۇل مارشرۋتتار ۇزىناعاشتى ىنتىماق، جاڭاقۇرىلىس، قاينازار، قارعالى، قازىبەك بەكەتى، بەسمويناق جانە دەگەرەس ەلدى مەكەندەرىمەن بايلانىستىرادى.

ۇيعىر اۋدانىندا №1 جانە №2 اۋىلىشىلىك مارشرۋتتاردا جول ءجۇرۋ اقىسى الىنبايدى.

تالعار اۋدانىندا 12 باعىت بويىنشا تەگىن قاتىناۋ ۇيىمداستىرىلعان. ونىڭ ىشىندە تالعار قالاسىن بايبۇلاق، قىزىلقايرات، تالدىبۇلاق، ورمان جانە باسقا دا ەلدى مەكەندەرمەن بايلانىستىراتىن مارشرۋتتار بار.

تەگىن مارشرۋتتاردىڭ ەڭ كوپ سانى ەڭبەكشىقازاق اۋدانىندا قاراستىرىلعان. بۇل باعىتتار ەسىك پەن شەلەك قالالارىن جاقىن ماڭداعى ەلدى مەكەندەرمەن، سونىڭ ىشىندە اقتوعان، قورام، قاراجوتا، تاۋكاراتۇرىق، مالىباي، نۇرلى، نۇرا، المالى، تالدىبۇلاق، بايدىبەك بي، امانگەلدى جانە ورنەك اۋىلدارىمەن بايلانىستىرادى.

تەگىن جول ءجۇرۋ مۇمكىندىگى تۇرعىندارعا قوسىمشا شىعىنسىز سايلاۋ ۋچاسكەلەرىنە جەتىپ، داۋىس بەرگەننەن كەيىن قوعامدىق كولىكپەن ءوز باعىتتارى بويىنشا ءارى قاراي جۇرۋىنە مۇمكىندىك بەرەدى.

Abai.kz