ارمەنيا پرەمەرى نيكول پاشينيان بۇگىن ەرەۆاندى ۇقشۇ-دان شىعارۋ تۋرالى ماسكەۋدىڭ سوزدەرىنە جاۋاپ بەردى.

«ءبىز ۇقشۇ-داعى جۇمىسىمىزدى بەلسەندىرۋدى جوسپارلاپ وتىرعان جوقپىز دەپ كەسىپ ايتا الامىن... سونداي-اق ۇقشۇ ىشىندە ارمەنيانى ۇيىمنان شىعارۋ توڭىرەگىندە تالقىلاۋلار ءجۇرىپ جاتقانىنان حاباردارمىن. ەگەر ۇيىم ارمەنيانى ءوز قاتارىنان شىعارسا، مەن وتە قۋانىشتى بولار ەدىم. قالاي بولعاندا دا، بۇل ءبىزدى «شىعۋ كەرەك پە، الدە شىقپاۋ كەرەك پە» دەگەن ديلەممادان قۇتقارادى»، — دەدى ارمەنيا پرەمەر-ءمينيسترى پاشينيان.

بۇدان بولەك، ول ارمەنيا جاقىن ارادا ەو-عا مۇشەلىككە ءوتىنىم دايىنداۋ پروتسەسىن باستاۋدى كوزدەپ وتىرعانىن حابارلادى.

«رەفەرەندۋم وتكىزۋ ءۇشىن ارمەنيا ەو-عا كىرۋگە رەسمي ءوتىنىش ءبىلدىرۋى ءتيىس... جاقىن ارادا ءبىز بۇل پروتسەستى باستايمىز، اسىرەسە ەاەو-داعى ارىپتەستەرىمىزدىڭ ۇندەۋلەرىنە باسا نازار اۋدارامىز»، — دەپ قوستى ول.

Abai.kz