قازاقستان جازۋشىلار وداعىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «ادىلەتتى قوعامعا – شىنشىل ءسوز» اتتى كىتابىن تالقىلاۋعا ارنالعان جيىن ءوتتى.

باسقوسۋعا قازاقستان جازۋشىلار وداعى باسقارما توراعاسىنىڭ ورىنباسارلارى قاسىمحان بەگمانوۆ، عالىم قاليبەكۇلى، بەيبىت سارىباي جانە جازۋشى سماعۇل ەلۋباي، سىنشى ءاليا بوپەجانوۆا، جازۋشى قانات قايىم، اقىن ادىلعازى قايىربەكوۆ، اقىن پاتيگۇل ماقساتوۆا، جازۋشى جۇسىپبەك قورعاسبەك، اقىن مارالتاي رايىمبەكۇلى، اقىن ەرلان ءجۇنىس قاتىستى.  جيىندى اشىپ بەرگەن قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ:

– ادەبيەت پەن ءسوز ونەرىنىڭ باستى مۇراتى – ادامدى ادالدىققا تاربيەلەۋ. سوندىقتان «ادىلەتتى قوعامعا – شىنشىل ءسوز» دەگەن اتاۋدىڭ ءوزى ءبىز ءۇشىن ۇلكەن مانگە يە. شىن ءسوز ايتىلمايىنشا، ادىلەتتى قوعام دا قالىپتاسپايدى. مەملەكەت باسشىسىنىڭ ءار جىلدارداعى سوزدەرىنەن ەل تاعدىرىنا، ۇلتتىق قۇندىلىقتارعا، زاڭ مەن تارتىپكە، ۇرپاق تاربيەسىنە قاتىستى ازاماتتىق ۇستانىمىن انىق اڭعارۋعا بولادى. بۇل جيناق – بۇگىنگى قازاقستاننىڭ دامۋ جولىن، قوعام الدىنداعى مىندەتتەردى تۇسىنۋگە مۇمكىندىك بەرەتىن ماڭىزدى ەڭبەك.

قاسىم-جومارت كەمەلۇلى – مەملەكەت باسقارۋ ىسىمەن قاتار، ادەبيەت پەن مادەنيەتتىڭ قوعامداعى ايرىقشا ورنىن جاقسى تۇسىنەتىن مەملەكەت قايراتكەرى. ونىڭ قازاق ادەبيەتىنە، جازۋشىلار مەن اقىندارعا دەگەن قۇرمەتىن ءبىز ۇنەمى كورىپ كەلەمىز. مەملەكەت باسشىسىنىڭ اتالعان كىتاپتاعى: «مەن مەملەكەت باسشىسى جانە ازامات رەتىندە قازاق ادەبيەتىن ءاردايىم قولدايمىن» دەگەن ءسوزى – قالامگەر قاۋىم ءۇشىن ۇلكەن جاۋاپكەرشىلىك جۇكتەيتىن ءارى ۇلكەن سەنىم بىلدىرەتىن ءسوز. بۇل بىزگە، جازۋشىلارعا، ۇلكەن مىندەت جۇكتەيدى. مەملەكەت تاراپىنان كورسەتىلگەن قولداۋعا قالامگەرلەر دە ساپالى شىعارما ارقىلى جاۋاپ بەرۋى ءتيىس.

پرەزيدەنت ءوز سوزدەرىندە ادىلەتتىلىك، زاڭ ۇستەمدىگى، ەڭبەكقورلىق، جاۋاپكەرشىلىك، ۇلت­تىق بىرلىك، قوعامدىق كەلىسىم، ءبىلىم، عىلىم، مادەنيەت پەن رۋحانيات ماسەلەلەرىنە ۇنەمى نازار اۋدارىپ كەلەدى. بۇل ماسەلەلەردىڭ بارلىعى ادەبيەت ءۇشىن دە جات ەمەس. ويتكەنى ادەبيەت قوعامنان بولەك ءومىر سۇرمەيدى. قوعامدا قانداي وزگەرىس بولسا، ونىڭ ءىزى ادەبيەتتەن دە كورىنەدى.

ادىلەتتى قوعام، ەڭ الدىمەن، ادىلەتتى سانا قالىپتاسقان كەزدە ورنىعادى. ال ادىلەتتى سانانى قالىپتاستىرۋدا وتباسى، مەكتەپ، عىلىممەن قاتار ادەبيەتتىڭ دە ءرولى زور. جاس ۇرپاق كىتاپتان ەل تاريحىن، ادامگەرشىلىكتى، وتانشىلدىقتى، دوستىق پەن ادالدىقتى ۇيرەنەدى. سوندىقتان كىتاپ وقۋ مادەنيەتىن قالىپتاستىرۋ، ادەبيەتتى ناسيحاتتاۋ – مەملەكەتتىڭ رۋحاني قاۋىپسىزدىگىنە قاتىستى ماڭىزدى ماسەلە. وسى تۇرعىدان العاندا، «ادىلەتتى قوعامعا – شىنشىل ءسوز» كىتابىنىڭ قالامگەرلەر قاۋىمى ءۇشىن دە ءمانى ەرەكشە.

اسىرەسە قازىرگى جاھاندانۋ داۋىرىندە ۇلتتىق ادەبيەتكە دەگەن جاۋاپكەرشىلىك بۇرىنعىدان دا ارتا ءتۇستى. اقپارات اعىنى كۇشەيىپ، جاس ۇرپاقتىڭ تالعامى وزگەرىپ جاتقان كەزدە قازاق ادەبيەتى ءوز بيىگىن ساقتاپ قانا قويماي، جاڭا زاماننىڭ ماسەلەلەرىن دە باتىل كوتەرۋى كەرەك. ءبىز الەمدىك ادەبي ۇدەرىستەن تىس قالماۋىمىز قاجەت. قازاق قالامگەرلەرىنىڭ شىعارمالارىن شەت تىلدەرىنە اۋدارۋ، ۇلتتىق ادەبيەتتى حالىقارالىق كەڭىستىككە شىعارۋ – بۇگىنگى كۇننىڭ ماڭىزدى مىندەتتەرىنىڭ ءبىرى.

مەملەكەت باسشىسىنىڭ قازاق ادەبيەتىن قولداۋ جونىندەگى ۇستانىمى وسى باعىتتاعى جۇمىستارعا جاڭا سەرپىن بەرەدى دەپ ويلايمىن. قازاقستان جازۋشىلار وداعى دا وسى مىندەتتەردى جۇزەگە اسىرۋعا ءوز ۇلەسىن قوسۋعا دايىن. ءبىز جاس قالامگەرلەردى قولداۋ، ادەبي اۋدارمانى دامىتۋ، قازاق ادەبيەتىن حالىقارالىق دەڭگەيدە ناسيحاتتاۋ، كىتاپ وقۋ مادەنيەتىن ارتتىرۋ باعىتىنداعى جۇمىستاردى جالعاستىرا بەرەمىز»، – دەدى.

جيىن بارىسىندا وزگە دە اقىن-جازۋشىلار مەن ادەبيەت وكىلدەرى كىتاپتىڭ مازمۇنى مەن كوتەرگەن ماسەلەلەرى جونىندە پىكىر ءبىلدىرىپ، پرەزيدەنتتىڭ ەلدىڭ بولاشاعى، ۇلتتىق بىرلىك، مەملەكەتتىك ءتىل، جاستار تاربيەسى مەن رۋحاني قۇندىلىقتارعا قاتىستى ويلارىنا توقتالدى.

قاتىسۋشىلار «ادىلەتتى قوعامعا – شىنشىل ءسوز» جيناعىن مەملەكەت باسشىسى­نىڭ مەملەكەت قۇرۋ مەن قوعامدى دامىتۋ جونىندەگى كوزقاراستارىنىڭ قالىپتاسۋى مەن ساباقتاستىعىن كورسەتەتىن ماڭىزدى باسىلىم رەتىندە باعالادى. القالى جيىندا ايتىلعان پىكىرلەر توپتاماسى وقىرمان نازارىندا.

سماعۇل ەلۋباي: قۇندىلىقتار تاراۋ-تاراۋ بولىپ قامتىلعان!

پرەزيدەنتتىڭ «ادىلەتتى قوعامعا – شىنشىل ءسوز» كىتابىنا توبىقتاي-توبىقتاي ءتۇيىندى سوزدەر توپتاستىرىلعان ەكەن. بۇرىن-سوڭدى مۇنداي فورماداعى كىتاپ شىقپاعان ەدى. بۇگىنگى تاڭدا ەڭ كوپ ايتىلىپ جۇرگەن اسىل سوزدەرىمىزدىڭ ءبىرى – تاۋەلسىزدىك بولسا، ەندى ءبىر قاتارى – ادىلەتتىلىك، ادالدىق، تازالىق، مەملەكەتشىلدىك، پاتريوتيزم… جيناقتا وسى قۇندىلىقتاردىڭ ءبارى تاراۋ-تاراۋ بولىپ قامتىلعان.

كىمدە-كىم مەملەكەت باسشىسى قاسىم-جومارت توقاەۆتىڭ سوزدەرىنە سۇيەنگىسى كەلسە، ىزدەگەنىنىڭ ءبارىن وسى كىتاپتان تابا الادى. ەرەكشە نازار اۋدارىپ ايتقىمىز كەلەتىنى، پرەزيدەنتتىڭ قاي سوزىنە ۇڭىلسەڭىز دە شىنشىلدىعى كورىنىپ تۇرادى. ءاربىرى جۇرەكتەن شىققان. كىتاپتىڭ ماڭىزدىلىعى دا وسىندا. بۇل – شىندىق، ادىلەت ىزدەگەن كەز كەلگەن قازاق­ستاندىقتىڭ ۇستەلىنىڭ ۇستىندە جاتاتىن كىتاپ دەپ ويلايمىن. ويتكەنى مۇندا ءتىلىم، ەلىم، ادەبيەتىم، حالقىم دەگەن ءار قازاق ازاماتىنىڭ جان داۋىسى بار.

ءاليا بوپەجانوۆا: ءبارىمىز ءۇشىن دە كەرەك كىتاپ...

قازاق ءوزى ماقالداپ سويلەيتىن حالىقپىز عوي. كەز كەلگەن ۇزىن-سونار اڭگىمەنى قازاق ەكى اۋىز سوزبەن تۇيىندەپ ايتقان. قولىمىزداعى كىتاپقا مەملەكەت باسشىسىنىڭ جولداۋلارىندا، ۇندەۋلەرىندە، ءتۇرلى ماڭىزدى ساتتەردە سويلەگەن سوزدەرىنەن ويماقتاي ويلارى جيناقتالىپ الىنىپتى. جالپى، پرەزيدەنتىمىز ءبىلىمدى ادام عوي. تەگى دە مىقتى ەكەنىن حالقىمىز جاقسى بىلەدى. اكەسى – جازۋشى كەمەل اعانىڭ كوزىن كوردىك. تابيعاتىنان تازا كىسى بولاتىن.

مەملەكەت باسشىسىنىڭ مازمۇنى تەرەڭ ويلارى توپتاستىرىلعان بۇل كىتاپ جاستار ءۇشىن دە، ءبارىمىز ءۇشىن دە كەرەك كىتاپ دەپ ەسەپتەيمىن.

قانات قايىم: بىلىمدارلىق تۇنىپ تۇر

كىتاپتىڭ ەڭ ۇناعان تۇسى – پرەزيدەنت سوزدەرى 21 تاقىرىپ بويىنشا جۇيەلەنىپ توپتاستىرىلعان ەكەن. ىزدەگەنىڭدى جىلدام تاۋىپ الۋعا وتە ىڭعايلى. سوزدەردى وقي وتىرىپ مەملەكەت باسشىسىنىڭ جولداۋلارى مەن ۇندەۋلەرىن ويعا ورالتىپ قانا قويماي، بىلىمدارلىق پەن تەرەڭدىكتىڭ دە تۇنىپ تۇرعانىن تۇيسىندىك.

ادىلعازى قايىربەكوۆ: رۋحاني كەمەلدەنۋگە ۇمتىلماي وركەندەۋ بولمايدى!

مەن كىتاپتىڭ «تاريح. مادەنيەت. رۋحا­نيات» دەگەن بولىمىنە ەرەكشە نازار اۋداردىم. وسى باعىتتاعى پرەزيدەنتتىڭ تۇجىرىمدامالارى، ستراتەگياسى كوڭىلىمىزدەن شىعادى. ءبىر تاراۋدىڭ وزىندەگى «مادەنيەت – ۇلتتىڭ رۋحاني دەربەستىگىنىڭ كەپىلى»، «رۋحاني كەمەلدەنۋگە ۇمتىلماي وركەندەۋ بولمايدى»، «دومبىرا – قازاقتىڭ جانى، بولمىسىنىڭ ايناسى»، «تاريحي-مادەني مۇرامىزدى XXI عاسىرعا ساي جاڭعىرتىپ، جۇيەلى تۇردە دارىپتەۋىمىز قاجەت»، «اباي ءىلىمى ۇلتتىق بىرەگەيلىگىمىزدىڭ، ۇلتتىق بولمىسىمىزدىڭ وزەگى بولۋعا ءتيىس» دەگەن قاداۋ-قاداۋ ويلارى ۇلكەن ويلارعا جەتەلەيدى. جالپى، مەملەكەت باسشىسىنىڭ ۇلتقا، مەملەكەتكە، حالىققا قاتىستى كوزقاراستارىنىڭ جيناقتالىپ بەرگەنى قۋانتتى.

قاسىمحان بەگمانوۆ: ادىلەتتى قازاقستان قۇرۋداعى ءبىر باعدارشامىمىز ىسپەتتى

«ادىلەتتى قوعامعا – شىنشىل ءسوز» كىتابىن زور قىزىعۋشىلىقپەن وقىپ شىقتىم. جيناقتىڭ ءار ءبولىمى ءبىر-ءبىرىن تولىقتىرىپ تۇر ەكەن. ەڭ العاشقى «ۇلت ساياساتى» تاراۋىندا «حالقى مىقتى ەل عانا قۋاتتى مەملەكەت قۇرا الادى» دەگەن تۇجىرىمدى ايتىپ، حالىققا ارقا سۇيەيدى پرەزيدەنتىمىز. بۇنىڭ استارىندا ۇلكەن وي جاتىر. «حالقى مىقتى بولماي – سالتى مىقتى بولمايدى، سالتى مىقتى بولماي – حالقى مىقتى بولمايدى» دەگەن اتالى سوزبەن استاسىپ تۇر. كىتاپ ادىلەتتى قازاقستان قۇرۋداعى ءبىر باعدارشامىمىز ىسپەتتى بولارىنا سەنەمىن. سونىمەن قاتار جيناقتى وقي وتىرىپ، مەملەكەت باسشىسىنىڭ حالقىن شىنايى جاقسى كورەتىنىن، ەلگە جاناشىر ەكەنىن انىق كورەمىز. پرەزيدەنت وسى كىتابى ارقىلى ۇلتتىڭ جاڭا ساپاسىن قالىپتاستىرۋ، ادام كاپيتالىن دامىتۋ، مەملەكتشىلدىك پەن بىلىمدىلىكتى دارىپتەۋ ماسەلەلەرىن دە ورىندى قوزعاعان. ويتكەنى ادامنىڭ تاعدىرى – مەملەكەتتىڭ تاعدىرى ەكەنى راس.

پاتيگۇل ماحساتوۆا: وي وربىتۋىمىزگە سەرپىن بەرەتىندەي ەڭبەك

حالقىمىزدا «دانالار ءسوزى – اقىلدىڭ كوزى» دەگەن ماقال بار عوي. وسى كىتاپتى مەن اقىلدىڭ كوزى دەپ سانايمىن. مەملەكەت باسشىسىنىڭ عىلىم مەن ءبىلىم، تسيفرلاندىرۋ، جاساندى ينتەللەكت، تازا قازاقستان تۋرالى ويلارى قاتتى ۇنادى. بۇكىل الەم قول سوزعان تسيفرلاندىرۋ جۇيەسىنەن ءبىز دە كەشەۋىلدەپ قالماۋىمىز كەرەك ەكەنىن دە قاداپ ايتقانىن وتە دۇرىس دەپ ەسەپتەيمىن. جيناقتى پاراقتاي ءجۇرىپ، ءوزىمىزدىڭ دە وسىندا قامتىلعان تاقىرىپتار اياسىندا وي وربىتۋىمىزگە سەرپىن بەرەتىندەي ەڭبەك. پرەزيدەنت ءبىلىمدى ۇرپاق بولماسا، ەلدىڭ كەلەشەگى دە بۇلىڭعىر ەكەنىن دايەكتى جەتكىزگەن. ۇستازدار مەن عالىمدار، جازۋشىلار جايلى ويلارى دا ۇنادى. تازا قازاقستان تۇجىرىمىن العا تارتقاندا سىرتقى تازالىققا عانا ەمەس، ىشكى ادامدىق تازالىققا، مادەنيەتكە باسا نازار اۋدارتقانى دا وتە وزەكتى. كىتاپتاعى پرەزيدەنتتىڭ ءار ويى – افوريزمگە اينالاتىن سوزدەر.

جۇسىپبەك قورعاسبەك: جاسقا دا، جاسامىسقا دا پايدالى جيناق

كىتاپتىڭ باستى قۇندىلىعى – حالىقتىڭ مەملەكەتتىڭ باستى قوزعاۋشى كۇشى ەكەنىن ناقتىلاپ بەرگەن. مەملەكەت باسشىسى ءار تۇجىرىمى ارقىلى مىقتى حالىق – مىقتى مەملەكەتتىڭ تەتىگى ەكەنىن جەتكىزگەن. «اققۋ، شورتان ءھام شايان» سىندى قوعامدا ءتۇرلى تارتىستار ورىن الىپ تۇر عوي. سونىڭ اربىرىندە ۇلتتىڭ ءرولى العا شىعۋ كەرەك. پرەزيدەنتتىڭ كەلەڭسىزدىكتەرگە جول بەرمەۋ تۋرالى تۇجىرىمدارى دا ءار ازاماتتىڭ قاپەرىندە جۇرەتىندەي سوزدەر. پرەزيدەنت قوعامنىڭ بارلىق سالاسىندا تولىق ادام ىلىمىنە باس ۇرساق، كەمدىك كورمەيتىنىمىز تۋراسىندا دا جان-جاقتى جەتكىزگەن. سونىڭ ىشىندە ءدىن باعىتىندا دا دۇرىس رەفورما جۇرگىزگەن ءجون.
كىتاپتا پرەزيدەنتتىڭ كوپ دۇنيەدە «وققا كەۋدەسىن توسىپ تۇرعانى» بايقالادى.تالاي شەتىن تاقىرىپتارعا بارىپ، اشىق تۇردە جاۋا­بىن بەرگەن. جاسقا دا، جاسامىسقا دا پايدالى جيناق.

عالىم قاليبەك: ۇلتتىق يدەولوگيانى نەگىز ەتكەن تۇجىرىمدار!

كىتاپتا قازىرگى قازاقستاننىڭ وتكەنى، بۇگىنى، كەلەشەگى، جۇرگىزىپ وتىرعان ساياساتى جايلى مەملەكەت باسشىسىنىڭ ويلى تۇجىرىمدارى جيناقتالىپ، «كىم بولامىز؟»، «قايدا بارا جاتىرمىز؟»، «قانداي ەل بولامىز؟» دەگەن سۇراقتارعا جاۋاپ بەرەدى. پرەزيدەنتتىڭ: «مەنىڭ ومىرلىك ۇستانىمىم – تۋعان ەلىمنىڭ مۇددەلەرىن قورعاۋ. بۇل مىندەتتى ايقاي شىعارماي، ۇستامدىلىق تانىتىپ، سابىرلىلىقپەن دايەكتى تۇردە ورىنداۋعا بولادى»، – دەگەن ءسوزىنىڭ ءوزى كوپتىڭ كوكەيىندەگى مىڭ-سان سۇراققا ورىندى جاۋاپ.

ۇلتتىق يدەولوگيانى كوپ ايتامىز. ال ونىڭ تەرەڭىنە ۇڭىلە بەرمەيمىز كوبىندە. بۇل جايىندا مەملەكەت باسشىسى: «ادىلەتتى، تازا، قاۋىپسىز، قۋاتتى قازاقستاندى قۇرىپ جاتىرمىز»، – دەپ ءبىر اۋىز سوزبەن ۇلتتىق يدەولوگيانى نەگىز ەتكەن بولاشاعىمىزدى ايقىنداپ بەرگەن.

مارالتاي رايىمبەكۇلى: ءار قازاقتىڭ تورىندە تۇراتىن قۇندى ەڭبەك

ەشنارسەنىڭ كەزدەيسوق بولمايتىنى سياقتى «ادىلەتتى قوعامعا – شىنشىل ءسوز» كىتابىنىڭ جارىق كورۋى تەگىن ەمەس. بۇل يگى­لىكتىڭ قۇرىلتايدىڭ قۇرىلۋىمەن قاتار كەلىپ جاتقانى دا – زاڭدىلىق.
اتالعان كىتاپ – اكىم-قارالاردىڭ ۇستەلىندە عانا ەمەس، ءار قازاقتىڭ تورىندە تۇراتىن، كىتاپحاناسىنا قوسىلعان قۇندى ەڭبەك. ءبىزدىڭ مىندەتىمىز – جيناقتىڭ ىشىندەگى بارىن بازارلاپ، قاجەتكە جاراتۋ. كىتاپ نە ءۇشىن شىعادى؟ حالىققا قىزمەت ەتۋ ءۇشىن شىعادى عوي. حالىقتىڭ قولىندا توزسىن دەپ تىلەيمىن.

ەرلان ءجۇنىس: ەلدىك ۇستانىمنىڭ ەۆوليۋتسياسى بار

كىتاپقا پرەزيدەنتتىڭ بىرنەشە جىلعى وي-پىكىرلەرى جيناقتالعان عوي. اسىرەسە پرەزيدەنت ومىرىندەگى اكە تاعىلىمى ەرەكشە كورىنىس تاپقانىن اڭعاردىم. العاش قىتايعا وقۋعا اتتانعاندا «نە ىستەيسىڭ؟ نە ۇيرەنەسىڭ؟» دەگەن اكە سۇراعىنا «قىتاي ءتىلىن ۇيرەنەم»، – دەپ ءتىل قاتقان ەكەن مەملەكەت باسشىسى. سوندا: «شەگىنە، كەمەلىنە جەتكىزىپ ۇيرەن»، – دەپ عۇمىرلىق اقىل ايتقان ەكەن جازۋشى كەمەل توقاەۆ ۇلىنا. ەل پرەزيدەنتىنىڭ كەيىنگى عۇمىرىنداعى بارلىق ساياسي ۇستانىمدارىندا بولسىن، ساياسي باستامالارىندا بولسىن، ياعني باستاعان دۇنيەنى سوڭىنا جەتكىزۋ جولىندا اكە ۇلاعاتى ايرىقشا ساقتالعان سەكىلدى. پرەزيدەنتىمىزدىڭ كەشەگى ستۋدەنت شاعىنان بۇگىنگى بيىگىنە دەيىنگى قالىپتاسۋ تۇجىرىمداماسىن كورەمىز بۇل كىتاپتان. ءاربىر جاس كورۋى كەرەك، سەزىنۋى كەرەك، ءبىلۋى كەرەك ەلدىك ۇستانىمنىڭ ەۆوليۋتسياسى بار مۇندا. مەملەكەتتىڭ ءار كەزەڭدەگى كۇردەلى شاقتارىندا مەملەكەت باسشىسى سويلەگەن سوزدەردەن، ۇندەۋلەردەن، جولداۋلاردان، وزگە دە ماڭىزدى تۇجىرىمداردان الىنعان ويلار، سانادا تيكتونيكالىق قوزعالىس تۋعىزعان تەزيستەر جيناقتالعان. مەملەكەتشىل تۇلعانىڭ بولمىسى تانىلادى كىتاپتان.

بەيبىت سارىباي: تۇتاس حالىق وقيتىن ويلار قاعباسى

كىتاپتا مەملەكەت باسشىسى تاراپىنان ايتىلعان مايەك سوزدەر، ءتۇرلى شاقتاردا سويلەنگەن سوزدەردىڭ توبىقتاي ءتۇيىنى، ەڭ ءبىر مارجاندارى تەرىپ الىنعان. جيناقتى وقي وتىرىپ، پرەزيدەنتىمىزدىڭ ۇستانعان ۇستانىمىن، كوڭىل كۇيىن، پاراسات-پايىمىن، باعىت-باعدارىن، تۇگەل سەزىنە الامىز. سول تۇرعىدان قاراعان كەزدە بۇل كىتاپتى، ەڭ ءبىرىنشى، مەملەكەتتىك قىزمەتكەرلەر ءتۇيسىنىپ وقىسا دەيمىز. باعىت-باعدار، ماقسات ورتاق بولعاندىقتان جاۋاپتى قىزمەتتەگى تۇلعالار دا مەملەكەت باسشىسىمەن ءبىر رۋحتا بولعانى دۇرىس قوي. سونىمەن قاتار «بۇگىن سانالى ۇرپاقتى تاربيەلەي الساق، ەرتەڭ زامان كوشىنىڭ باسىندا جۇرەمىز» دەيدى ەل پرەزيدەنتى. بولاشاعىمىزدى تاربيەلەپ وتىرعان ۇستازدار، بىلىممەن سۋسىنداپ جۇرگەن ستۋدەنتتەر، تۇتاس حالىق وقيتىن كىتاپ.

Abai.kz