بۇگىن قۇرىلتاي ۆيتسە-پرەزيدەنت پەن پرەمەر-ءمينيستردىڭ كانديداتۋرالارىن ماقۇلداپ، داۋىس بەردىى. دەپۋتاتتار جاڭا كونستيتۋتسيا ارقىلى العان وكىلەتتىكتەرىن العاش رەت پايدالاندى.

قۇرىلتاي توراعاسى ايبەك دادەباي: «بۇگىن ءبىز جاڭا كونستيتۋتسيا بەرگەن وكىلەتتىكتەردى العاش رەت پايدالانامىز. قۇرمەتتى ارىپتەستەر، كونستيتۋتسيانىڭ 46-بابىنىڭ ەكىنشى جانە ءتورتىنشى تارماقشالارىنا سايكەس، قازاقستان رەسپۋبليكاسىنىڭ پرەزيدەنتى قازاقستان رەسپۋبليكاسىنىڭ ۆيتسە-پرەزيدەنتى مەن پرەمەر-ءمينيسترىن قۇرىلتايدىڭ كەلىسىمىمەن، دەپۋتاتتاردىڭ جالپى سانىنىڭ كوپشىلىك داۋسىمەن قىزمەتكە تاعايىندايدى. سوعان بايلانىستى بۇگىنگى كۇن تارتىبىنە ەكى ماسەلە ەنگىزىلىپ وتىر»، – دەگەن ەدى.

سۋرەت: akorda.kz سايتىنان الىندى.

ۆيتسە-پرەزيدەنت – ەرلان قارين

ەرلان قارين مەملەكەت باسشىسىنىڭ ۇسىنۋىمەن قازاقستاننىڭ ۆيتسە-پرەزيدەنتى لاۋازىمىنا ۇسىنىلدى. وسىعان دەيىن ساياساتكەر پرەزيدەنت اكىمشىلىگى باسشىسىنىڭ ءبىرىنشى ورىنباسارى قىزمەتىن اتقارعان بولاتىن.

ەرلان كارين تۋرالى نە بەلگىلى؟

ەرلان قارين 1976 جىلى تۇركىستان وبلىسى، سايرام اۋدانىنىڭ اقسۋ اۋىلىندا دۇنيەگە كەلگەن. 1996 جىلى ق. جۇبانوۆ اتىنداعى اقتوبە ۋنيۆەرسيتەتىن «تاريح جانە گەوگرافيا» ماماندىعى بويىنشا ءبىتىرىپ، تاريح جانە گەوگرافيا مۇعالىمى بىلىكتىلىگىن الدى. 1999 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلوسوفيا جانە ساياساتتانۋ فاكۋلتەتىنىڭ اسپيرانتۋراسىن اياقتادى. ساياسي عىلىمدار كانديداتى.

مەملەكەتتىك قىزمەتى: 2019 جىلدىڭ ساۋىرىنەن 2020 جىلدىڭ شىلدەسىنە دەيىن – پرەزيدەنت كەڭەسشىسى، كەيىن مەملەكەت باسشىسىنىڭ كومەكشىسى بولدى. 2022 جىلعى 5 قاڭتاردا قازاقستاننىڭ مەملەكەتتىك حاتشىسى، ال سونىمەن بىرگە 14 ماۋسىمدا مەملەكەتتىك كەڭەسشى بولىپ تاعايىندالدى. 2026 جىلعى 30 ماۋسىمدا پرەزيدەنت اكىمشىلىگى باسشىسىنىڭ ءبىرىنشى ورىنباسارى قىزمەتىنە كەلدى.

ۆيتسە-پرەزيدەنت نەمەن اينالىسادى؟

ۆيتسە-پرەزيدەنت ينستيتۋتى قازاقستاننىڭ جاڭا كونستيتۋتسياسىندا قايتا پايدا بولدى. ونىڭ باستى مىندەتى – بيلىك ساباقتاستىعى مەن مەملەكەتتىك باسقارۋدىڭ تۇراقتىلىعىن قامتاماسىز ەتۋ. پرەزيدەنتتىڭ تاپسىرماسى بويىنشا ۆيتسە-پرەزيدەنت ونىڭ اتىنان قۇرىلتايمەن، ۇكىمەتپەن، باسقا دا مەملەكەتتىك ورگاندارمەن ءوزارا ءىس-قيمىل جاسايدى جانە حالىقارالىق قاتىناستاردا وكىلدىك ەتەدى. مەملەكەت باسشىسى وعان باسقا دا فۋنكتسيالاردى بەلگىلەي الادى.

ۆيتسە-پرەزيدەنت ءبىر مەزگىلدە دەپۋتات بولۋعا، باسقا اقى تولەنەتىن لاۋازىمداردى يەلەنۋگە، كاسىپكەرلىكپەن اينالىسۋعا نەمەسە ساياسي پارتيادا بولۋعا قۇقىلى ەمەس. نەگىزگى وكىلەتتىكتەردىڭ ءبىرى بيلىك ساباقتاستىعىمەن بايلانىستى. ەگەر قازاقستان پرەزيدەنتىنىڭ وكىلەتتىگى مەرزىمىنەن بۇرىن توقتاتىلسا، مەملەكەت باسشىسىنىڭ مىندەتىن اتقارۋ ۆيتسە-پرەزيدەنتكە وتەدى. وسىلايشا، تاعايىندالعان جاعدايدا ەرلان كارين اراعا 30 جىلداي ۋاقىت سالىپ قايتا جاڭعىرعان ينستيتۋتتىڭ العاشقى ۆيتسە-پرەزيدەنتى اتانباق.

دۇيسەنبى كۇنى قۇرىلتايدىڭ 141 دەپۋتاتى ەرلان قاريندى ۆيتسە-پرەزيدەنت لاۋازىمىنا بەكىتۋ تۋرالى توقاەۆتىڭ ۇسىنىسىن ماقۇلداپ داۋىس بەرگەن.

سۋرەت: primeminister.kz سايتىنان الىندى.

پرەمەر-مينيستر – ولجاس بەكتەنوۆ

پرەزيدەنت قاسىم-جومارت توقاەۆ قۇرىلتايدىڭ قاراۋىنا قازاقستاننىڭ پرەمەر-ءمينيسترى لاۋازىمىنا ولجاس بەكتەنوۆتىڭ كانديداتۋراسىن ەنگىزدى.

بۇعان دەيىن قۇرىلتايدىڭ ءبىرىنشى سەسسياسىندا توقاەۆ الدىمەن جاڭا پارلامەنتتىڭ باسشىلىق قۇرامى قالىپتاستىرىلۋى ءتيىس ەكەنىن، سودان كەيىن عانا دەپۋتاتتارعا ۆيتسە-پرەزيدەنت پەن پرەمەر-ءمينيستردىڭ كانديداتۋرالارىن ۇسىناتىنىن حابارلاعان بولاتىن.

جاڭا كونستيتۋتسياعا سايكەس، پرەزيدەنت قۇرىلتايدا وكىلدىك ەتەتىن ساياسي پارتيالاردىڭ فراكتسيالارىمەن كونسۋلتاتسيا وتكىزگەننەن كەيىن پرەمەر-مينيستر كانديداتۋراسىن دەپۋتاتتاردىڭ قاراۋىنا ەنگىزەدى. قۇرىلتاي تاعايىنداۋعا كەلىسىم بەرۋى ءتيىس. شەشىم قۇرىلتاي دەپۋتاتتارىنىڭ جالپى سانىنىڭ كوپشىلىك داۋسىمەن قابىلدانادى.

جاڭا قۇرىلتايدا 145 دەپۋتات بار. سوعان بايلانىستى كەلىسىم الۋ ءۇشىن كانديدات كەمىندە 73 داۋىس جيناۋى قاجەت.

ەگەر قۇرىلتاي كانديداتۋرانى قولداسا، پرەزيدەنت بۇل ادامدى ءوزىنىڭ جارلىعىمەن پرەمەر-مينيستر ەتىپ تاعايىندايدى. ەگەر كەلىسىم بەرىلمەسە، تاعايىنداۋ پروتسەدۋراسى اياقتالمايدى: پرەزيدەنت كونستيتۋتسيادا بەلگىلەنگەن ءتارتىپتى ەسكەرە وتىرىپ، كانديداتۋرانى قايتا ەنگىزۋى قاجەت بولادى. پرەمەر-مينيستر تاعايىندالعاننان كەيىن ۇكىمەتتىڭ جاڭا قۇرامىن جاساقتاۋ باستالادى.

پرەزيدەنت پرەمەر-ءمينيستردىڭ ۇسىنىسى بويىنشا ۇكىمەتتىڭ قۇرىلىمىن ايقىندايدى. ۇكىمەت مۇشەلەرىن پرەزيدەنت قۇرىلتايمەن كونسۋلتاتسيالاردان سوڭ، پرەمەر-ءمينيستردىڭ ۇسىنۋى بويىنشا تاعايىندايدى.

بۇل رەتتە سىرتقى ىستەر، كورعانىس جانە ىشكى ىستەر مينيسترلەرىن پرەزيدەنت دەربەس ءوزى تاعايىندايدى.

بەكتەنوۆ پرەمەر-مينيستر قىزمەتىندە قالدى!

ونىڭ كانديداتۋراسىن قۇرىلتاي دەپۋتاتتارىنىڭ باسىم بولىگى قولداپ، داۋىس بەردى. پالاتاداعى داۋىس بەرۋ قورىتىندىسى بويىنشا 137 دەپۋتات بەكتەنوۆتىڭ كانديداتۋراسىن قولداسا، جەتى دەپۋتات قالىس قالعان. وسىلايشا، ولجاس بەكتەنوۆ جاڭادان جاساقتالاتىن ۇكىمەتتى دە ارى قاراي باسقاراتىن بولدى.

ولجاس بەكتەنوۆتىڭ ۇكىمەتى

ولجاس بەكتەنوۆتىڭ ۇكىمەتى جاڭا قۇرىلتاي الدىندا وكىلەتتىگىن تاپسىردى. كابينەتتىڭ جاڭا قۇرامى قالىپتاسقانعا دەيىن قولدانىستاعى ۇكىمەت ءوز مىندەتتەرىن اتقارۋدى جالعاستىرا بەرەدى.

Abai.kz