Microsoft كومپانياسىنىڭ نەگىزىن قالاۋشى بيلل گەيتس ءوزىنىڭ جەكە سايتىندا ادامزاتقا جاساندى ينتەللەكتتىڭ (جي) قاۋپىنە قاتىستى كولەمدى ەسسە-ۇندەۋ جاريالادى.

70 جاستاعى بيلل گەيتس ءوزىنىڭ جەكە ۆەب-سايتىندا جاريالانعان كولەمى 6000 سوزگە جۋىق ەسسەسىندە ەسكەرتۋ جاسادى. ول جاپپاي جۇمىسسىزدىق پەن ەكونوميكالىق كۇيزەلىستەردىڭ ورىن الۋى مۇمكىن ەكەنىن بولجاپ، سونداي-اق جي-ءدىڭ قىلمىسكەرلەردىڭ قولىنا ءتۇسۋىنىڭ ىقتيمال سالدارىن ەگجەي-تەگجەيلى سيپاتتادى.

ول الەمنىڭ بارلىق ەلدەرىنىڭ باسشىلارىن تەحنولوگيانىڭ كولەڭكەلى قىرلارىمەن بايلانىستى ماسەلەلەردى شەشۋ ءۇشىن دەرەۋ ىنتىماقتاستىققا كىرىسۋگە شاقىردى.

«تەڭدىك تۇرعىسىنان العاندا، جي ادامزات تاريحىندا بۇرىن-سوڭدى ويلاپ تابىلعان ەڭ ۇلى تەڭەستىرۋشىگە دە، ادىلەتسىزدىكتىڭ ەڭ ءىرى قاينار كوزىنە دە اينالۋى مۇمكىن. مىندەت اۋقىمدى. ءتىپتى ەڭ قولايلى جاعدايدىڭ وزىندە جي-ءدىڭ جاڭا داۋىرىنە ءوتۋ ادامزات تاريحىنداعى ەڭ الاساپىران كەزەڭدەردىڭ بىرىنە اينالادى»، – دەپ ەسكەرتتى گەيتس.

ءوز ەسسەسىندە گەيتس جي سالاسىنداعى پروگرەسس «اقىلعا سىيمايتىن جىلدامدىقپەن» دامىپ كەلە جاتقانىن ايتتى.

«جاساندى ينتەللەكت العاش رەت ادامنىڭ تانىمدىق قابىلەتىن الماستىرىپ قانا قويماي، ودان اسىپ ءتۇسۋى مۇمكىن»، – دەپ جازدى گەيتس. ونىڭ ايتۋىنشا، كوپ ۇزاماي «جي كوپتەگەن مىندەتتەردى ورىنداۋدا ادامداردان ەداۋىر اسىپ تۇسەتىن بولادى».

«وكىنىشكە قاراي، قازىر ءبىز بۇعان دايىن ەمەسپىز. كوشباسشىلار، ساراپشىلار مەن قوعامداستىقتار بۇل سىن-قاتەرلەردى ءتيىستى دەڭگەيدە ەڭسەرىپ جاتىر دەگەن دالەل كورىپ وتىرعان جوقپىن. جي داۋىرىنە ءوتۋدى جەڭىلدەتەتىن ناقتى جوسپار جوق»، – دەپ قوستى گەيتس.

ونىڭ ايتۋىنشا، جي ءداۋىرى دەربەس كومپيۋتەرلەر رەۆوليۋتسياسىنان ايتارلىقتاي ەرەكشەلەنەدى. دەربەس كومپيۋتەرلەردىڭ ادامداردىڭ ەڭبەككە بەيىمدەلۋ ءتاسىلىن تۇبەگەيلى وزگەرتۋىنە شامامەن 20 جىل قاجەت بولعان ەدى. جي ول ۋاقىتتى مەيلىنشە قىسقارتادى.

ءابدىراشيت باكىرۇلى

Abai.kz