ەڭ كونە دەنە شىنىقتىرۋ-سپورت قوعامى «مەكتەپكە جول» رەسپۋبليكالىق قايىرىمدىلىق اكتسياسىنا جىل سايىن بەلسەندى تۇردە قاتىسىپ كەلەدى.

بۇل جولى توتەنشە جاعدايلار مينيستىرلىگى قىزمەتكەرلەرىنىڭ وتباسىلارىنا ەرەكشە كوڭىل ءبولىندى.

قوعامنىڭ الماتىداعى ستاديونىندا توتەنشە جاعدايلار مينيستىرلىگى قىزمەتكەرلەرىنىڭ از قامتىلعان جانە كوپبالالى وتباسىلارىنان شىققان ونداعان بالا — بولاشاق ءبىرىنشى سىنىپ وقۋشىلارى — سالتاناتتى جاعدايدا قوعام اپپاراتىنىڭ باسشىسى گۇلايىم ماحاتقىزى مەن تانىمال گيمناست ميلاد كاريميدىڭ قولىنان مەكتەپكە قاجەتتى زاتتارعا تولى سومكەلەر الدى.

سومكەلەردىڭ ىشىندە كەڭسە تاۋارلارى: قالامدار، داپتەرلەر، وقۋلىقتار، قارىنداشتار، سونداي-اق «دينامو» قوعامىنىڭ ايگىلى ەمبلەماسى بەينەلەنگەن سپورتتىق كوستيۋمدەر بولدى.

ءوز سوزىندە گۇلايىم ماحاتقىزى از قامتىلعان وتباسىلارعا، جەتىم بالالارعا، اتا-اناسىنىڭ قامقورلىعىنسىز قالعان نەمەسە ومىرلىك قيىن جاعدايعا تاپ بولعان بالالارعا كومەك كورسەتۋ دينامولىقتار ءۇشىن ۇلكەن مارتەبە ءارى ابىرويلى مىندەت ەكەنىن اتاپ ءوتتى.

بۇل — بيىلعى جىلى وتكىزىلگەن العاشقى وسىنداي ءىس-شارا ەمەس. بۇگىنگى اكتسيا «دينامو» قوعامى مەن كۇشتىك قۇرىلىمدار اراسىنداعى ەرەكشە بايلانىستىڭ جانە ءوزارا قولداۋدىڭ تاعى ءبىر ايقىن دالەلى بولدى.

بالالاردىڭ قۋانىشتارىن اتا-انالارى دا ءبولىستى.

«ءبىز، اتا-انالار جانە توتەنشە جاعدايلار مينيستىرلىگى قىزمەتكەرلەرى، قولداۋ كورسەتكەنى ءۇشىن «دينامو» قوعامىنا العىسىمىزدى بىلدىرەمىز. تاعى دا زور العىسىمىزدى ايتامىز!»

Abai.kz