«بۇل — اقپاروۆا مەن ايتباەۆ تەلەفون ارقىلى اۋىزشا شەكتەي سالاتىن قۇقىق ەمەس!» اتتى ماقالامىزدا كوتەرىلگەن ماسەلە بويىنشا — اتاجۇرتىنا ورالعان قانداستارىمىزدىڭ بالالارىن مەكتەپ ديرەكتورلارى مەن ءبىلىم بولىمدەرى مەكتەپكە قابىلداماي جاتقانى تۋرالى ماسەلگە بايلانىستى، بۇگىن قر وقۋ-اعارتۋ ءمينيسترىنىڭ ءبىرىنشى ورىنباسارى شىنار اقپاروۆانىڭ قابىلداۋىندا بولىپ، اتالعان جاعداي بويىنشا اڭگىمەلەستىك.

جاقسىنىڭ جاقسىلىعىن ايتۋ — پارىز!

شىنار قۋانىشقىزى وتە جىلى قابىلدادى. قاراپايىم، الدى كەڭ ادام ەكەن. الدەبىرەۋلەر قۇساپ، «مەنى نەگە سىنايسىڭ؟!»،-دەپ شىتىناپ، شاقشيعان جوق. ەركىن وتىرىپ، اشىق سويلەستىك.

ءيا، شىنار قۋانىشقىزى ءمينيستردىڭ ءبىرىنشى ورىنباسارى بولىپ كەلگەلى ءبىر-اق جىل بولىپتى.

شىنار حانىمنىڭ ءبىر جىلدىڭ ىشىندە بارلىق ماسەلەدەن حاباردار بولىپ كەتۋى دە مۇمكىن ەمەس قوي، ول جاعىن دا تۇسىنىستىكپەن قاراۋعا بولدى.

بىراق، اتالعان «بۇل — اقپارۆا مەن ايتباەۆ تەلەفون ارقىلى اۋىزشا شەكتەي سالاتىن قۇقىق ەمەس» اتتى «اشىق حات» اقپاروۆانىڭ نازارىن كوشى-قون، ونىڭ ىشىندە قانداس بالالار مەن ولاردىڭ اتا-اناسىنىڭ بۇزىلىپ جاتقان قۇقىعىنا بىردەن اۋدارعانى كورىنىپ تۇر.

ءبىراز ماسەلەنى ءوزىم اۋىزشا ايتىپ، جان-جاقتى تۇسىندىرۋگە تىرىستىم.

بىرلەسكەن بۇيرىقتىڭ بۇكىل زاڭدى ىستەن شىعارىپ، بيلىك ينستيتۋتتارىن جۇمىس ىستەۋدەن قالدىرعانىن جانە كوشى-قون سالاسىنىڭ زاڭمەن ەمەس، تۇسىنىكپەن باسقارىلىپ قالعانىن، سونىڭ كەسىرىنەن قاسىم-جومارت اعانىڭ بەدەلىنە نۇقسان جەتىپ جاتقانىن شەگەلەپ تۇرىپ جەتكىزدىم.

ءوز كەزەگىندە، شىنار اقپاروۆا بۇگىن نە ەرتەڭ ون جەتى وبلىس پەن ءۇش قالانىڭ وقۋ-اعارتۋ باسقارمالارىنىڭ باسشىلارىن جيىپ، قازاقستان رەسپۋبليكاسىنىڭ ازاماتى بولىپ تابىلمايتىن ۇلتى قازاق ادامداردىڭ بالالارىن تۇگەل مەكتەكەن قابىلداۋ تۋرالى تاپسىرما بەرەتىن بولدى.

بۇل تاپسىرمانى وقۋ-اعارتۋ ءمينيسترى جۇلدىز سۇلەيمەنوۆا حانىم بەرىپتى.

سونداي-اق، مينيستر جۇلدىز سۇلەيمەنوۆانىڭ اتىنا جازعان تومەندەگى ۇسىنىستاردى بەردىم.

جۇلدىز دوسبەرگەنقىزى مەن شىنار قۋانىشقىزىنا العىسىم شەكسىز!

راحمەت سىزدەرگە!

سونىمەن بىرگە، شىنار اقپاروۆاعا تەلەفون شالدىرىپ، قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆانىڭ قابىلداۋىنا كىرۋگە مۇمكىندىك الدىم.

ناسىمجان جامبەكقىزىنا دا بولعان جاعدايدى اۋىزشا بايانداپ بەردىم.

ەندى بالالاردىڭ قۇقىقتارىن قورعاۋ كوميتەتىنە رەسىمي حات جازىپ، بۇل ماسەلەنى كەشەندى تۇردە قولعا الاتىن بولامىز…

بىراق، ءبىر ماسەلەنى باسا ايتا كەتەيىن!

اتاجۇرتىنا ورالعان قانداستارىمىزدىڭ بالالارى مەكتەپكە قابىلدانۋمەن بۇل ماسەلەنى شەشىلدى دەپ ايتۋعا ءالى ەرتە!

ول ءۇشىن، تومەندەگى ۇسىنىستار تۇگەل شەشىلۋى كەرەك!

بەكەر وبالى قانە، شىنار اقپاروۆا وعان قارسى ەمەس، قۇلشىنىپ وتىر.

ال، مەن وعان كومەكتەسۋگە 24/7 دايىنمىن!

وسىعان ۋادەلەستىك.

بىرلەسىپ جۇمىس ىستەيتىن بولدىق!

ەندى ءبىر اڭگىمە.

نەگىزى، مەن بىرەۋگە ورىنسىز تيىسۋدەن، بىرەۋدى، اسىرەسە، بيلىك وكىلدەرىن قيسىنسىز سىناۋدان اۋلاق اداممىن.

بيلىك وكىلدەرىنە بايلانىستى ايتار بولسام، تۋىنداعان ماسەلە تۋرالى، شەشۋ جولدارىن ۇسىنا وتىرىپ، سىپايىلاپ تۇرىپ، ءۇش حات جازام. ءبىر ەمەس، ءۇش مارتە حات جازام…

تىڭداماسا، ۇشتەن كەيىن اشىققا شىعارۋعا، ايعايعا باۋعا تۋرا كەلەدى.

سەبەبى، مەن كوتەرگەن ماسەلەنىڭ ءبارى ادام قۇقىعانا، تاعدىرىنا قاتىستى زاڭدار تۋرالى.

زاڭ دۇرىس بولۋ كەرەك جانە اتقارۋشى بيلىك ونى بۇلجىتپاي ورىنداۋى ءتيىس!

بۇل — بۇگىنگى قاسىم-جومارت اعا جولعا قويعان زاڭ مەن ءتارتىپ قاعيداتىنىڭ باستى تالابى!

مەن — اۋىت مۇقيبەك — سول زاڭ مەن ءتارتىپ قاعيداتىنىڭ سولداتىمىن!

ال، وسى قانداس بالاردىڭ ماسەلەسى بويىنشا، قاعيداتتى زاڭعا سايكەستەندىرۋ تۋرالى جۇلدىز سۇلەيمەنوۆاعا ءۇش مارتە حات جازدىم.

ءتىپتى، 3 تامىز كۇنى قاعيداتتى دۇرىستاۋعا قاراماي، «ءبىلىم تۋرالى» زاڭنىڭ 66-بابى نەگىزىندە قانداس بالالاردى مەكتەپكە قابىلداي بەرۋ تۋرالى ۇسىنىس جاسادىم.

ول حات جۇلدىز سۇلەيمەنوۆا مەن شىنار اقپاروۆانىڭ ەكەۋىنە دە تىركەلدى.

تىڭداعان جوق!

بەر جاعىندا وتىرعاندار ەسكى جاۋاپتى قايتالاپ بەرە سالدى.

سونىمەن، سوڭى — مىناۋ بولدى…

جاسىراتىنى جوق، ءبىز زاڭدىق باسقارۋ شەڭبەرىنەن شىعىپ قالدىق. بۇيرىقپەن، تۇسىنىكپەن باسقارىلاتىن دەڭگەيگە جەتتىك!

جازباشا بۇيرىقتى قويىپ، ادام قۇقىعىن تەلەفون ارقىلى شەكتەي بەرەتىن بولدىق…

بۇل — وتە قاۋىپتى جاعداي!

سوندىقتان، قۇرمەتتى اتقارۋشى بيلىك پەن وزگە دە ورگان باسشىلارى، اۋىت مۇقيبەكتىڭ حاتى مەن ۇسىنىستارىنا باسا نازار اۋدارىپ جۇرىڭىزدەر!!

ءتۇبى، مەن ايتقانعا كەلەسىزدەر!

كەلىپ تە جاتىرسىزدار…

ۇسىنىستار:

قۇرمەتتى جۇلدىز دوسبەرگەنقىزى!

مەن اقمولا جانە وزگە وبلىستارداعى مەكتەپكە تۇسە الماي وتىرعان قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار بالالارىنىڭ قولىما تۇسكەن ءتىزىم ءتىزىمىن وسى حاتقا قوسىپ، سىزگە جىبەرەم، تەز ارادا شەشىم قابىلداپ، الداعى دۇيسەنبىدەن باستاپ ولاردى مەكتەپكە قابىلداتىڭىز.

ەكىنشى، ماعان 5 قىركۇيەك كۇنى WhatsApp جەلىسى ارقىلى: «قوسشى قالاسىنىڭ ءبىلىم بولىمىنە جۇما كۇنگى تۇسكەن اقپارات بويىنشا، وقۋشىلاردى قابىلدادى. بىراق، ول بالالار اۋادا /وقيدى/, نوۆد-عا تىركەلمەيدى، حودودايستوۆا بەرىلمەيدى، مۇعالىمدەر ارناۋلى قاعاز كۇندەلىك ۇستايدى، 1 توقسان عانا وقيدى...» - دەگەن اقپارات كەلىپ ءتۇستى.

اتالعان اقپاراتتىڭ شىن-وتىرىگىن تەكسەرىڭىز جانە قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار بالالارى سىرتتاي ەمەس، تۇگەلىمەن نوۆد-عا تىركەلىپ، حودودايستوۆاسىن الىپ وقيتىن بولسىن!

ءۇشىنشى، بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆامەن بىرلەسە وتىرىپ، ارىپتەسىڭىز ىشكى ىستەر ءمينيسترى ەرجان سادەنوۆە شىعىپ، قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىنداعى مەكەپتەردە ءبىلىم الىپ جاتقان بالالارى مەن ولاردىڭ اتا-اناسىنىڭ ۆيزاسىن اشۋعا، ۇزارتۋعا جانە ولاردى تۇرعان جەرىنە قاراماستان بەلگىلەنگەن تارتىپپەن قۇجاتتاندىرۋعا ىقپال ەتىڭىز!

ەگەر، ۆيزاسىنىڭ مەرزىمى ءوتىپ كەتكەندەر بولسا، ولارعا ەسكەرتۋ بەرۋ جازاسىن قولدانۋ كەرەك دەپ ەسەپتەيمىن.

سەبەبى، ولار بالاسىن تاستاپ، كەلگەن ەلىنە قايىپ كەتە المايدى عوي. ولاردى وسىنداي اكىمشىلىك قۇقىق بۇزۋشىلىققا ءماجبۇر ەتكەن – №468 بۇيرىقتى «ءبىلىم تۋرالى» زاڭعا ۋاعىندا سايكەستىرمەگەن ءسىزدىڭ ارەكەتسىزدىگىڭىز بەن ءۇش ءمينيستردىڭ شىعارعان «بىرلەسكەن بۇيرىعى»!

سونىڭ كەسىرىنەن، «بالا قۇقىعى تۋرالى» زاڭداعى بالانىڭ ءوز اتا-اناسىمەن بiرگە تۇرۋعا قۇقىعى بۇزىلۋدا...

ءۇشىنشى، تەز ارادا مەن ۇسىنعان جوبانى ەسكەرە وتىرىپ، اتالعان №468 بۇيرىقتى «ءبىلىم تۋرالى» زاڭعا سايكەستىرىپ جاساڭىز!

ايتپەسە، قاسىم-جومارت اعانى ۇياتقا قالدىراسىز!

ەگەر، وسى ۇسىنىستارىم ورىندالماسا، وندا بۇيرىققا ەمەس، زاڭعا سىلتەمەي وتىرىپ، ءوز قولىڭىزبەن جاۋاپ بەرىڭىز!

مەن سىزگە كومەكتەسۋگە جانە وسىلاي قولداۋعا 24/7 دايىنمىن!!!

ەسكەرتۋ: 38 وتباسىنىڭ 59 بالاسىنىڭ ءتىزىمى قوسا تىركەلدى.

قۇرمەتپەن، اۋىت مۇقيبەك،

«ەرەن ەڭبەگى ءۇشىن» مەدالىنىڭ، «قۇرمەت» وردەنىنىڭ يەگەرى

Abai.kz