كەشەگى AI & Digital Bridge فورۋمىنداعى پرەزيدەنت ءسوزىن جالعاستىرا تالداساق، نازار اۋداراتىن ءۇش ماسەلە بار.

دونالد ترامپتىڭ باستاماسىمەن جاسالعان سۋپەرينتەللەكت تۋرالى كەلىسىم، قازاقستاننىڭ ميلليارد دوللاردان اسقان IT-قىزمەتتەر ەكسپورتى جانە تسيفرلىق شەشىمدەرىمىزدىڭ 100-دەن اسا ەلدە قولجەتىمدى بولۋى. وسى ۇشەۋى تەحنولوگيالىق دامۋدىڭ اۋقىمىن دا، وعان جۇكتەلەتىن جاۋاپكەرشىلىكتى دە كورسەتەدى.

قاسىم-جومارت توقاەۆ امەريكانىڭ جەتەكشى تەحنولوگيالىق كومپانيالارى ترامپتىڭ باستاماسىمەن سۋپەرينتەللەكت تۋرالى كەلىسىمگە قول قويعانىنا توقتالدى. پرەزيدەنت مۇددەلى ەلدەر وسى ءتاسىلدى مۇقيات زەردەلەپ، جاھاندىق دەڭگەيدە قولدانۋ مۇمكىندىگىن قاراستىرا الاتىنىن ايتتى. مۇنداعى ماڭىزدى ۇستانىم جاساندى ينتەللەكتىنىڭ مۇمكىندىگى ۇلعايعان سايىن، ونى دامىتۋعا قويىلاتىن جاۋاپكەرشىلىك تە ارتاتىنىن كوزدەيدى. تەحنولوگيانىڭ جىلدامدىعىنا قىزىعۋمەن قاتار، ونىڭ قانداي قاعيدالارمەن جۇمىس ىستەيتىنىن دە كەلىسۋ قاجەت.

قازاقستان ءۇشىن بۇل اڭگىمەنىڭ پراكتيكالىق ءمانى بار. ويتكەنى ءبىز دە حالىقارالىق تەحنولوگيا نارىعىنا ءونىم ۇسىنىپ وتىرمىز.

«وتكەن جىلى قازاقستاندىق IT-قىزمەتتەر ەكسپورتى 1 ميلليارد دوللاردان استى. تسيفرلىق شەشىمدەرىمىز الەمنىڭ 100-دەن اسا ەلىندە قولجەتىمدى»، – دەدى مەملەكەت باسشىسى.

ءبىر ميلليارد دوللار. وسى ساننىڭ ارتىندا مامانداردىڭ ءبىلىمى، ينجەنەرلەردىڭ ەڭبەگى، كاسىپكەرلەردىڭ تاۋەكەلى تۇر. شەتەلدىك تاپسىرىس بەرۋشى قازاقستاندىق كوماندانىڭ قىزمەتىنە اقشا تولەسە، دەمەك، ءبىزدىڭ مامان ونىڭ ماسەلەسىن شەشە العان. ءبىلىمنىڭ ەكونوميكالىق قۇنى وسىلاي قالىپتاسادى. ول ەكسپورتتىق تۇسىمگە، جالاقىعا، بيزنەستىڭ ءوسۋ مۇمكىندىگىنە اينالادى.

ال 100-دەن اسا ەلدە قولجەتىمدى بولۋ سول ءبىلىمنىڭ گەوگرافيالىق شەكارادان وتە العانىنىڭ بەلگىسى. ارينە، بۇل بارلىق نارىقتا بىردەي ورنىعىپ ۇلگەردىك دەگەندى بىلدىرمەيدى. بىراق قازاقستاندىق تسيفرلىق ونىمدەردىڭ حالىقارالىق اۋقىمعا شىعا الاتىنىن كورسەتەدى. ەندىگى مىندەت وسى مۇمكىندىكتى تۇراقتى سۇرانىسقا، ۇزاقمەرزىمدى كەلىسىمشارتتارعا اينالدىرۋ بولىپ تۇر.

سوندىقتان پرەزيدەنتتىڭ جەتكەن مەجەمەن شەكتەلمەي، ستارتاپتارعا ناقتى قولداۋ كورسەتۋ تۋرالى ءسوزى ورىندى. ونەركاسىپتىڭ قاجەتتىلىكتەرىنە نەگىزدەلگەن مىندەتتەر ءتىزىمىن جاساپ، سوعان ساي AI Challenge وتكىزۋ ۇسىنىسى دا وسىعان قىزمەت ەتەدى. كوماندا ناقتى وندىرىستىك ماسەلەنى شەشىپ، جوباسى كاسىپورىنعا ەنگىزىلسە، ونىڭ كەلەسى تاپسىرىس بەرۋشىگە ۇسىناتىن دالەلدەنگەن تاجىريبەسى بولادى.

ايبار ولجاەۆ

Abai.kz