قازاقستان جەردىڭ كىندىگىندە ورنالاسقانىمەن 4 مۇحيتتان دا شالعاي جاتىر.

ال جاھاندا تاۋار اتاۋلىنىڭ 80 پايىزى ءدال وسى سۋ جولى ارقىلى تاسىلادى. ءبىز باتىس پەن شىعىستى، وڭتۇستىك پەن سولتۇستىكتى جالعاساق تا وسى تۇستا ءالسىزبىز.

دەگەنمەن مۇحيتقا توتەلەي شىعىپ كەتۋگە مۇمكىندىك بار. بۇل ءۇشىن قازاقستان اۋعانستاندا جول سالادى. تەمىرجول وزبەكستان، اۋعانستان مەن پاكىستان ارقىلى ءۇندى مۇحيتىنا شىعادى. ەندى جوبا قالاي جۇزەگە اسادى؟

- قازاقستان اۋعانستاندا تەمىرجول سالادى. استانادا ءبىزدىڭ ەلدىڭ كولىك مينيسترلىگى وزبەكستان مەن بىرىككەن اراب امىرلىكتەرىنىڭ وكىلدەرىمەن كەزدەسىپ، ۇشجاقتى مەموراندۋمعا قول قويدى. قۇجاتقا ساي جۇمىس توبى قۇرىلىپ، الداعى ۋاقىتتا قۇرىلىستىڭ جاي-جاپسارىن تالقىلايدى. جاڭا جوبا ءۇندى مۇحيتىنا جول اشادى. قازىر بۇل باعىتتا كەدەرگى كوپ. سەبەبى اۋعانستاندا تەمىرجول جوق. ماسەلەن، سارىاعاشتان پاكىستان ايلاقتارىنا جۇك جەتكىزۋ ءۇشىن الدىمەن وزبەكستاندى پويىزبەن كەسىپ ءوتۋ كەرەك. ال اۋعان جەرىندە ول جۇكتى اۆتوكولىكتەرگە تيەۋ قاجەت. ودان كەيىن پاكىستان شەكاراسىندا كولىكتەن ءتۇسىرىپ، پويىزعا قايتا ارتۋعا تۋرا كەلەدى. سونىڭ سالدارىنان تاسىمال شىعىنى دا كوپ جانە جۇكتى جەتكىزۋ مەرزىمى دە ۇزاق بولىپ تۇر.

ەرسۇلتان ەرجانوۆ، قر كولىك مينيسترلىگى تەمىرجول جانە سۋ كولىگى كوميتەتىنىڭ باسقارما باسشىسى:

- بۇل جەردە بىزدە ءۇش مارشرۋت قاراستىرىلۋدا. وسى جاڭا ايتىپ كەتكەندەي، جۇمىس توبىنىڭ وتىرىسىندا ول ماسەلە قاراستارىلاتىن بولادى. ەڭ ءتيىمدى جانە ەڭ قىسقا مارشرۋتتاردى قارايتىن بولامىز. وزدەرىڭىز بىلەتىندەي، بىزدە قازىر اۋعانستان جەرىندە تەمىرجول جوق. ءبىزدىڭ باستى ماقسات – پاكىستاننىڭ تەڭىز پورتتارىنا شىعۋ.

ورتالىق ازيا – وڭتۇستىك ازيا دەپ اتالاتىن جوبا بىرنەشە جىل بويى تالقىلانىپ كەلدى. شىعىس ەۋروپاداعى جاعداي ۋشىققالى جوبانىڭ ماڭىزى ءتىپتى ارتتى. تاياۋ شىعىستاعى قاقتىعىس تا لوگيستيكانىڭ بۇرىنعى باعىتتارىن وزگەرتۋگە ماجبۇرلەپ وتىر. ال جاڭا جول بۇل ايماقتاردى اينالىپ ءوتىپ، الەمدىك نارىققا كەدەرگىسىز شىعۋعا مۇمكىندىك بەرەدى. باستىسى ءبىزدىڭ ەل بۇعان دەيىن دە اۋعان جەرىندەگى تەمىرجول قۇرىلىسىنا قاتىسقان ەدى.

ەرسۇلتان ەرجانوۆ، قر كولىك مينيسترلىگى تەمىرجول جانە سۋ كولىگى كوميتەتىنىڭ باسقارما باسشىسى:

- وسى جاقىندا حاۆگەرات ۋچاسكەسى اۋعانستاندا اشىلعان بولاتىن. شامامەن 130 كيلومەتردى قۇرايدى. 130 كيلومەتردىڭ 45 كيلومەترىن ءبيدىڭ ينترەگرا كونستاركشن كومپانياسى سوققان. ول دەگەن ۇزىن ەمەس، 120 شاقىرىم. ال مىناۋ مەموراندۋم اياسىندا قاراستىراتىن مارشرۋتىمىز، ول دەگەن تولىققاندى تەمىرجول ءدالىزى. وزبەكستاننان پاكىستانعا دەيىن جالعايتىن تەمىرجول ءدالىزى. 700 شاقىرىم، 800 شاقىرىم دەپ ايتساق، قاتەلەسپەيمىز.

ءيا، 800 شاقىرىم جاقىن جەر ەمەس. سوندىقتان ءۇش مەملەكەت قۇرىلىستى بىرلەسىپ جۇرگىزۋگە ۋاعدالاسىپ وتىر. مينيسترلىك وكىلىنىڭ ايتۋىنشا، جوبا كەلەسى جىلى باستاۋ الۋعا ءتيىس. باس-اياعى ەكى جىل ىشىندە تولىق سالىپ ءبىتىرۋ جوسپارى بار.

اۆتورلارى: نۇرقانات قاناپيا، دوسبول ءبايدىلدا

دەرەكوزى: 24.kz

Abai.kz