125 ەلدەن 8 067 ءوتىنىم، 25 فيناليست جانە $2 ملن جۇلدە قورى. ەلوردادا العاشقى Astana AI Film Festival اياقتالدى. وتىنىمدەر سانى بويىنشا ول جاساندى ينتەللەكت كومەگىمەن تۇسىرىلگەن فيلمدەردىڭ الەمدەگى ەڭ ءىرى حالىقارالىق بايقاۋىنا اينالدى.

گران-ءپريدى لاتۆيادان كەلگەن Nikolay Shestak «The First Honest Day» ءفيلمى ءۇشىن يەلەندى. ونىڭ تۋىندىسىندا ادامنىڭ ءىس-ارەكەتى ونىڭ بەينەسىن تىكەلەي وزگەرتەدى: جامان قىلىقتار ونى ۇسقىنسىز ەتسە، جاقسى ىستەر ونى جاقسى جاققا وزگەرتەدى. اۆتور $450 مىڭ كولەمىندەگى جۇلدە قاراجاتىن جاڭا فيلمدەر تۇسىرۋگە جۇمساماق.

قازاقستاندىق مىرزاحان جۇماحان دا جەڭىمپازدار قاتارىندا. ونىڭ «It Was Just a Joke» كومەدياسى ۇزدىك كەيىپكەر نوميناتسياسىندا جەڭىسكە جەتتى. سيۋجەتتە قاراپايىم ءازىل يت پەن ونىڭ يەسىنىڭ اعاسى اراسىنداعى جانجالعا ۇلاسىپ، اقىرىندا ناعىز سوعىسقا اينالادى.

ەكىنشى ورىن مەن $200 مىڭ جۇلدەنى ءۇندىستاننان Abhik Banerjee «SITARA» ءفيلمى ءۇشىن الدى. ءۇشىنشى ورىن جانە $100 مىڭ يسپانيادان Ernest Desumbila-نىڭ «Looking For Perseida» تۋىندىسىنا بۇيىردى.

فيناليستەردىڭ جۇمىستارىن حالىقارالىق قازىلار القاسى باعالادى. ونىڭ قۇرامىنا يۋنەسكو-نىڭ بۇرىنعى باس ديرەكتورى ودري ازۋلە، قىتاي كينويندۋسترياسىنىڭ وكىلدەرى جانە ينۆەستور بالادجي سرينيۆاسان كىردى. ىرىكتەۋ بارىسىندا ەڭ الدىمەن اۆتورلىق يدەيا مەن ءفيلمنىڭ تۇتاستىعىنا ءمان بەرىلدى.

جالپى جۇلدە قورى – $2 ملن: ونىڭ ءبىر ميلليونى جۇلدەلەرگە، تاعى ءبىر ميلليونى پەرسپەكتيۆالى AI-كوماندالارعا ينۆەستيتسيا سالۋعا جانە قازاقستانداعى ءوندىرىستى دامىتۋعا باعىتتالادى.

فەستيۆال 1–3 قازان ارالىعىندا ءوتتى. فيناليستەردىڭ جۇمىستارى استانادا ۇلكەن ەكراندا كورسەتىلدى. بۇگىن ءدال وسى جەردە الەمنىڭ تۇكپىر-تۇكپىرىنەن مىڭداعان ءوتىنىم جينالعان بايقاۋدىڭ جەڭىمپازدارى انىقتالدى.

Abai.kz