سوڭعى ۋاقىتتا تاياۋ شىعىستاعى گەوساياسي جاعدايدىڭ ۋشىعۋى الەمدىك ەنەرگەتيكالىق نارىققا ايتارلىقتاي ىقپال ەتۋدە.

اسىرەسە، مۇناي تاسىمالىنىڭ نەگىزگى كۇرەتامىرى سانالاتىن ورمۋز بۇعازى ماڭىنداعى شيەلەنىس قارا التىن باعاسىنىڭ شارىقتاۋىنا تۇرتكى بولىپ، قازاقستان سياقتى ەكسپورتەر ەلدەرگە قوسىمشا ەكونوميكالىق ديۆيدەندتەر اكەلۋدە.

قازاقستان رەسپۋبليكاسىنىڭ ەنەرگەتيكا ۆيتسە-ءمينيسترى ەرلان اقكەنجەنوۆ ومان سۇلتانى حايسام بەن تاريك ءال سايدپەن وتكەن كەزدەسۋدىڭ كۋلۋارىندا جۋرناليستەرگە بەرگەن سۇحباتىندا قازىرگى نارىقتىق كونيۋنكتۋراعا باعا بەردى. ونىڭ ايتۋىنشا، قازاقستان مەن ومان مۇنايىنىڭ وتكىزۋ نارىقتارى مۇلدەم بولەك: وتاندىق مۇنايدىڭ باسىم بولىگى ەۋروپاعا باعىتتالسا، ومان ءوز ءونىمىن نەگىزىنەن قيىر شىعىس ەلدەرىنە جونەلتەدى.

«ومان تۋرالى ايتساق، ءبىزدىڭ مۇناي باعىتتارىمىز قيىلىسپايدى. دەسە دە، الەمدەگى گەوساياسي احۋال مەن ورمۋز بۇعازى ماڭىنداعى جاعداي مۇناي باعاسىنىڭ وسۋىنە تىكەلەي ىقپال ەتۋدە. ارينە، قازاقستان بۇدان قوسىمشا پايدا كورىپ وتىر، بۇل – داۋسىز فاكت»، – دەپ اتاپ ءوتتى ەرلان اقكەنجەنوۆ.

ورمۋز بۇعازى – جاھاندىق ەنەرگەتيكالىق قاۋىپسىزدىك ءۇشىن ەڭ وسال ءارى ستراتەگيالىق ماڭىزى جوعارى ايماق. الەمدەگى مۇناي مەن سۇيىتىلعان تابيعي گاز (ستگ) جەتكىزىلىمدەرىنىڭ بەستەن ءبىر بولىگى ءدال وسى تەڭىز وتكەلى ارقىلى جۇزەگە اسادى.

بيىلعى جىلى تەڭىز تاسىمالىندا ورىن العان كەدەرگىلەر مەن ۇزىلىستەر شيكىزات قۇنىنىڭ كۇرت قۇبىلۋىنا سەبەپ بولدى. سونىڭ سالدارىنان Brent ماركالى مۇنايدىڭ باعاسى باررەلىنە 100 اقش دوللارىنان اسىپ ءتۇستى.

Abai.kz