قازاقستاندا قىرعىزستاندىق ەكى ستۋدەنتتىڭ كەنەسارى حان تۋرالى ايتقان سوزدەرىنە بايلانىستى قىلمىستىق ءىس قوزعالدى. بۇل تۋرالى بۇعان دەيىن قۇقىق قورعاۋ ورگاندارىنا بويجەتكەندەردىڭ سوزىنە «قۇقىقتىق باعا بەرۋدى» تالاپ ەتىپ ارىزدانعان ادۆوكات مەيىرمان شەكەەۆ مالىمدەدى.

شەكەەۆتىڭ ايتۋىنشا، اتالعان دەرەك بويىنشا قىلمىستىق ءىس تىركەلىپ، سوتقا دەيىنگى تەرگەۋ امالدارى باستالدى.

«ۇلتتىق بولمىسىمىزعا، مۇددەمىزگە نەمەسە اتا-بابامىزدىڭ رۋحىنا ءتيىسۋ نامىسىمىزدى تاپتايتىنىن ەسكەرتكىم كەلەدى. كەنەسارى بولسىن، باسقا دا اتا-بابالارىمىزدىڭ ۇرپاقتارى بۇگىنگى تاڭدا ورتامىزدا ءومىر ءسۇرىپ جاتىر»، – دەدى ادۆوكات.

سونىمەن قاتار ول بۇل وقيعاعا بولا تۇتاس ءبىر حالىقتى كىنالاماۋعا شاقىردى.

«جامان ۇلت بولمايدى، جامان ادام بولادى»، – دەپ اتاپ ءوتتى ول.

ەستەرىڭىزدە بولسا، قىركۇيەك ايىنىڭ ورتاسىندا ينتەرنەتتە استانادا اكادەميالىق ۇتقىرلىق باعدارلاماسى بويىنشا ءبىلىم الىپ جاتقان بىشكەكتىڭ ەكى ستۋدەنتىنىڭ تىكەلەي ەفيردە كەنەسارى حان تۋرالى قورلايتىن سوزدەر ايتقان ۆيدەوسى تاراعان ەدى. ولاردىڭ ءبىرى قىرعىزستاندا «ونىڭ باس سۇيەگىنەن شاراپ ىشەدى» دەگەن مازمۇندا مالىمدەمە جاساعان.

بۇل ۆيدەو قازاقستان مەن قىرعىزستاننىڭ الەۋمەتتىك جەلىلەرىندە كەڭىنەن تاراپ، قوس ەلدىڭ دە جۇرتشىلىعى اراسىندا ۇلكەن رەزونانس پەن نارازىلىق تۋدىردى. ەفيرگە قاتىسقان باسقا پايدالانۋشىلار بويجەتكەندەردىڭ سوزدەرىن بىردەن ايىپتاپ، بۇل ۆيدەونى قىرعىزستان ەلشىلىگىنە جولدايتىندارىن جەتكىزگەن.

وقيعا ورىن العان كۇنى-اق ستۋدەنتتەر ۆيدەوۇندەۋ جاريالاپ، كوپشىلىكتەن كەشىرىم سۇرادى. ولار شەكتەن شىعىپ كەتكەندەرىن مويىنداپ، قازاقستان ازاماتتارى مەن قىرعىز حالقىنان كەشىرىم ءوتىندى. سونداي-اق بويجەتكەندەردىڭ ايتۋىنشا، بلوگەر ولارعا ارانداتۋشىلىق سيپاتتاعى سۇراقتار قويعان. الايدا ولار بۇل جاعدايدى ءوز سوزدەرىن اقتاپ الۋ ءۇشىن پايدالانبايتىندارىن اتاپ ءوتتى.

Abai.kz