17-18 قازاندا استانا قالاسىندا Qazaq Creative Hub الاڭىندا قاراعاندى وبلىسىنىڭ شىعارماشىلىق مۇمكىندىكتەرىن كورسەتەتىن «CREATIVE AIMAQ» جارمەڭكەسى ءوتتى.

ەلىمىزدىڭ شىعارماشىلىق الەۋەتىن تانىتۋ، وتاندىق برەند قالىپتاستىرۋ جانە اۆتورلىق ونىمدەردى ۇلكەن نارىققا شىعارۋدى كوزدەيتىن  ىس-شاراعا زەرگەرلەر، سۋرەتشىلەر، قولونەر شەبەرلەرى، بارلىعى – 55-تەن استام كرەاتيۆتى يندۋستريا وكىلى قاتىستى.

قاراعاندىلىق دەلەگاتسيانى باستاپ كەلگەن وبلىس اكىمىنىڭ ورىنباسارى الىبەك الدەنەي: «كرەاتيۆتى يندۋستريانى دامىتۋ تالانت پەن زياتكەرلىك الەۋەتتى ەل يگىلىگىنە پايدالانۋعا جول اشادى. مەملەكەت باسشىسى بۇل سالاعا ەرەكشە كوڭىل ءبولىپ، ونىڭ ەكونوميكالىق الەۋەتى زور ەكەنىن ايتقان. ەلىمىزدە قازىردىڭ وزىندە بۇل سالادا 160 مىڭعا جۋىق ادام ەڭبەك ەتەدى. ەندىگى مىندەت – دارىن يەلەرىنىڭ شىعارماشىلىعىن تابىس كوزىنە اينالدىرىپ، تۋعان ولكەسىندە كاسىبىن دوڭگەلەتۋىنە جاعداي جاساۋ»، – دەدى.

ەكى كۇنگە جالعاسقان شارا اياسىندا بەلگىلى سۋرەتشى، يادرولىق قارۋعا قارسى حالىقارالىق قوزعالىستىڭ بەلسەندىسى كارىپبەك كۇيىكوۆتىڭ «قايسار رۋح» جانە «جيزن بەز رۋك» كىتاپتارىنىڭ تانىستىرىلىمى ءوتتى. اۆتور ءوز ەستەلىكتەرىمەن بولىسە وتىرىپ، ادام ءومىرىنىڭ قادىرى، كەلەر ۇرپاق الدىنداعى جاۋاپكەرشىلىك تۋرالى وي قوزعايدى.

سونداي-اق، جارمەڭكەگە كەلگەن جۇرت نازارىنا تانىمال ديزاينەر گۇلنۇر جارىلحانوۆانىڭ ءسان توپتاماسى، ۇلتتىق ناقىشتاعى زەرگەرلىك اشەكەيلەر ۇسىنىلدى.

قالي بايجانوۆ اتىنداعى كونتسەرتتىك بىرلەستىك ونەرپازدارى باعدارلامانى ءان-كۇيمەن ورنەكتەدى. كەلۋشىلەر ساندىك-قولدانبالى ونەر تۋىندىلارىن تاماشالاپ قانا قويماي، شەبەرلىك ساباقتارىنا قاتىسىپ، قولونەردىڭ قىر-سىرىن ۇيرەندى. قاراعاندىلىق كرەاتورلار جاساندى ينتەللەكتكە نەگىزدەلگەن جوبالارىن، ۇشقىشسىز باسقارىلاتىن قۇرىلعىلاردىڭ مۇمكىندىگىن شارا قوناقتارىنا كورسەتتى.

وسىلايشا «CREATIVE AIMAQ» قاراعاندىنىڭ شىعارماشىلىق كەلبەتىن ءار قىرىنان تانىتتى: مۇندا اتادان قالعان ونەر دە، بۇگىنگى بۋىننىڭ تىڭ ىزدەنىستەرى دە كورىنىس تاپتى. كرەاتيۆتى جارمەڭكە قاتىسۋشىلاردىڭ شىعارماشىلىق ىزدەنىستەرىنە سەرپىن بەرىپ، كاسىپكەرلىك بايلانىستارىن كەڭەيتۋگە جول اشتى.

Abai.kz