رەسپۋبليكا كۇنىنە جانە تاۋەلسىزدىكتىڭ 35 جىلدىعىنا وراي جەتىسۋ وبلىسىنىڭ ءار تۇكپىرىندەگى 43 تۋ تۇعىرىندا مەملەكەتتىك تۋ كوتەرىلدى. ءىس-شارالار قازاقستاندىق ءپاتريوتيزمدى، جالپىۇلتتىق بىرلىكتى جانە ازاماتتىق بىرەگەيلىكتى نىعايتۋعا باعىتتالعان.

تالدىقورعان قالاسىندا «قىران ەلىم – قازاقستان» اتتى مەملەكەتتىك تۋدى سالتاناتتى كوتەرۋ ءراسىمى «جاستار» ساياباعىنداعى ورتالىق تۋ تۇعىرىنىڭ جانىندا ءوتتى. ءىس-شاراعا وبلىس جانە قالا باسشىلىعى، ارداگەرلەر، زيالى قاۋىم وكىلدەرى، قۇقىق قورعاۋ ورگاندارىنىڭ قىزمەتكەرلەرى، اسكەري قىزمەتشىلەر، جاستار مەن قالا تۇرعىندارى قاتىستى. جالپى، سالتاناتتى شاراعا مىڭعا جۋىق ادام جينالدى.

قالا تۇرعىندارى جەرلەستەرىن رەسپۋبليكا كۇنىمەن قۇتتىقتادى:

– 25 قازاندا بۇكىل ەلىمىز بولىپ رەسپۋبليكا كۇنىن اتاپ وتەمىز. بۇگىن وتباسىمىزبەن بىرگە مەملەكەتتىك تۋدى سالتاناتتى تۇردە كوتەرۋ راسىمىنە قاتىستىق. بۇل جۇرەككە ەرەكشە اسەر سىيلاپ، ەلىڭە، حالقىڭا دەگەن ماقتانىش پەن قۋانىش سەزىمىن ۇيالاتاتىن تاعىلىمدى ءسات بولدى.

– بارشاڭىزدى رەسپۋبليكا كۇنىمەن شىن جۇرەكتەن قۇتتىقتايمىن! ەلىمىز ءۇشىن ماڭىزدى بۇل ۇلتتىق مەرەكە تاۋەلسىزدىگىمىزدى نىعايتۋعا، بىرلىك پەن كەلىسىمدى بەكەمدەۋگە ۇلكەن ىقپال ەتەدى. ءبىز، جاستار، ەلىمىزدىڭ ودان ءارى دامىپ، وركەندەۋى ءۇشىن بار كۇش-جىگەرىمىزدى سالامىز.

– تالدىقورعان تۇرعىندارىمەن قوسا بارشا جەرلەستەرىمدى وسى ايتۋلى مەرەكەمەن قۇتتىقتايمىن. ەلىمىزدە ءاردايىم بەيبىتشىلىك پەن بەرەكە-بىرلىك ورناسىن. كوك تۋىمىز ءاردايىم بيىكتە جەلبىرەي بەرسىن!

وسى كۇنى كوكسۋ جانە سارقان اۋداندارىنداعى جاڭادان ورناتىلعان 3 تۋ تۇعىرىمەن قوسا 42 ەلدى مەكەندەگى تۋ تۇعىرلارىندا تاعى 42 مەملەكەتتىك تۋ كوتەرىلدى.

اتاپ وتسەك، بيىل وڭىردە مەملەكەتتىك رامىزدەر كۇنىنە جانە تاۋەلسىزدىكتىڭ 35 جىلدىعىنا وراي «35 اۋىل – 35 تۇعىر» اكتسياسى اياسىندا تۋ تۇعىرلارى ورناتىلعان بولاتىن.

Abai.kz