قازاقستاننىڭ اۋىلدىق جەرلەرىندە تۇراتىن تالانتتى بالالار كاسىبي دەڭگەيدە ونەر كورسەتىپ، يتاليانىڭ Sanremo قالاسىندا وتەتىن يتاليان ءانىنىڭ 77-فەستيۆالى اياسىندا ساحناعا شىعۋ مۇمكىندىگىنە يە بولۋ ءۇشىن باق سىنايدى.

«Auyl Art Fest» حالىقارالىق ۆوكالدىق بايقاۋى — اۋىل بالالارى مەن جاسوسپىرىمدەرىنىڭ شىعارماشىلىق قابىلەتىن اشۋعا باعىتتالعان الەۋمەتتىك جوبا. بايقاۋعا وتىنىمدەر art.auyl.kz سايتى ارقىلى 2026 جىلعى 15 قازان مەن 1 جەلتوقسان ارالىعىندا قابىلدانادى.

قازاقستاندا اۋىلدىق جەرلەردە تۇراتىن بالالار مەن جاسوسپىرىمدەردى قولداۋعا باعىتتالعان «Auyl Art Fest» حالىقارالىق ۆوكالدىق بايقاۋى باستالدى. جوبانىڭ باستى ماقساتى — جاس ورىنداۋشىلاردىڭ تالانتىن اشۋعا، كاسىبي باعالاۋدان وتۋىنە جانە ءىرى مادەني ورتالىقتاردان شالعايدا تۇرسا دا، ۇلكەن ساحناعا جول اشۋىنا مۇمكىندىك بەرۋ.

شاعىن اۋىلدا تۇراتىن بالا ءۇشىن كاسىبي مۋزىكالىق ونەرگە جول تابۋ ءاردايىم وڭاي ەمەس. ارنايى مۋزىكالىق ءبىلىم الۋ، بايقاۋلارعا قاتىسۋ جانە ساحنادا ونەر كورسەتۋ مۇمكىندىكتەرى كەيدە گەوگرافيالىق قاشىقتىق پەن ينفراقۇرىلىمنىڭ شەكتەۋلى بولۋىنا بايلانىستى قولجەتىمسىز بولۋى مۇمكىن. «Auyl Art Fest» وسى كەدەرگىلەردى ازايتىپ، بالانىڭ تالانتىنا تۇرعىلىقتى جەرىنە قاراماستان نازار اۋدارۋعا جانە قولداۋ كورسەتۋگە باعىتتالعان.

جوبانىڭ باستاماشىسى — «Di Canto Italiano» اكادەمياسىنىڭ جەتەكشىسى، وپەرا ءانشىسى، ديريجەر ءارى قازاق ۇلتتىق ونەر ۋنيۆەرسيتەتىنىڭ اعا وقىتۋشىسى باتىرجان سماقوۆ. بايقاۋ بالالار شىعارماشىلىعىن قولداۋدى، كاسىبي ۆوكالدىق ىرىكتەۋدى جانە حالىقارالىق مادەني ىنتىماقتاستىقتى ۇشتاستىرادى.

بايقاۋعا قازاقستاننىڭ اۋىلدىق جەرلەرىندە تۇراتىن 7 مەن 18 جاس ارالىعىنداعى بالالار مەن جاسوسپىرىمدەر قاتىسا الادى. ءوتىنىم بەرۋ ءۇشىن قاتىسۋشى ءوزى تاڭداعان ءاندى ورىنداپ، بەينەجازباسىن ونلاين فورماتتا جىبەرۋى قاجەت. مۇنداي فورمات ەلىمىزدىڭ ءار وڭىرىندەگى جاس ۆوكاليستەرگە العاشقى كەزەڭدە باسقا قالاعا بارماي-اق، ءوز قابىلەتتەرىن كورسەتۋگە مۇمكىندىك بەرەدى.

بايقاۋ بىرنەشە كەزەڭنەن تۇرادى. وتىنىمدەر قابىلداۋ جانە ونلاين ىرىكتەۋ 2026 جىلعى 15 قازاننان 1 جەلتوقسانعا دەيىن جالعاسادى. ونلاين جارتىلاي فينال 6–21 جەلتوقسان ارالىعىندا وتەدى. ال فينال مەن گالا-كونتسەرت استانا قالاسىندا 2027 جىلعى قاڭتاردىڭ باسىندا ۇيىمداستىرىلادى. ەكى جەڭىمپازدىڭ ەسىمى گالا-كونتسەرتتە جاريالانادى.

قاتىسۋشىلاردىڭ ونەرىن قازاقستاننىڭ بىلىكتى پەداگوگتەرى مەن ەڭبەك سىڭىرگەن قايراتكەرلەرىنەن قۇرالعان كاسىبي قازىلار القاسى باعالايدى. قازىلار القاسى جاس ورىنداۋشىلاردىڭ ۆوكالدىق قابىلەتىن، مۋزىكالىق سەزىمىن جانە ساحنالىق دايىندىعىن ەسكەرەدى. قازىلار القاسى مۇشەلەرىنىڭ ەسىمدەرى ۇيىمداستىرۋشىلار تاراپىنان قوسىمشا جاريالانادى.

بايقاۋدىڭ باستى جۇلدەسى — يتاليانىڭ Sanremo قالاسىندا وتەتىن يتاليان ءانىنىڭ 77-فەستيۆالى اياسىندا ونەر كورسەتۋ مۇمكىندىگى. جەڭىمپازداردىڭ يتالياعا ساپارى 2027 جىلعى 14–20 اقپان ارالىعىنا جوسپارلانعان. بۇل جاس ورىنداۋشىلار ءۇشىن حالىقارالىق ساحنالىق تاجىريبە جيناۋعا، يتاليانىڭ مۋزىكالىق مادەنيەتىمەن تانىسۋعا جانە شەتەلدە قازاقستان اتىنان ونەر كورسەتۋگە مۇمكىندىك بەرەدى.

باتىرجان سماقوۆ — «قازاقستاننىڭ 100 جاڭا ەسىمى» جوباسىنىڭ جەڭىمپازى، يتاليا جۇلدىزى وردەنىنىڭ كاۆالەرى، يۋنەسكو-نىڭ «بەيبىتشىلىك ءۇشىن ونەرپاز» اتاعىنىڭ يەگەرى، حالىقارالىق بايقاۋلاردىڭ لاۋرەاتى جانە احمەت بايتۇرسىنۇلى اتىنداعى التىن مەدالدىڭ يەگەرى. 2022–2024 جىلدارى قازاق ۇلتتىق ونەر ۋنيۆەرسيتەتىنىڭ حالىقارالىق ىنتىماقتاستىق جانە شىعارماشىلىق قىزمەت دەپارتامەنتىن باسقارعان.

ونىڭ كاسىبي تاجىريبەسىندە حالىقارالىق مۋزىكالىق جوبالاردى ۇيىمداستىرۋ جانە جۇزەگە اسىرۋ باعىتىنداعى جۇمىستار بار. ولاردىڭ قاتارىندا دۋبايدا وتەتىن Jumeirah Sounds, انتالياداعى AkDeniz Sounds Competition, ۆەنەتسياداعى بەنەدەتتو مارچەللو كونسەرۆاتورياسىمەن بايلانىستى Suoni di Venezia جانە پەزاروداعى روسسيني كونسەرۆاتورياسىمەن بايلانىستى Suoni di Pesaro جوبالارى بار.

Global Music Partnership ۇيىمىنىڭ قاتىسۋىمەن جۇزەگە اسقان Global Music New York جوباسى اياسىندا نيۋ-يوركتەگى كارنەگي-حوللدا جانە بىرىككەن ۇلتتار ۇيىمىنىڭ شتاب-پاتەرىندە كونتسەرتتەر ۇيىمداستىرىلعان. سونىمەن قاتار، 2024 جانە 2025 جىلدارى باتىرجان سماقوۆ قازاقستان مەن يتاليانىڭ سانرەمو قالاسىنداعى مۋزىكالىق باستامالاردى بىرىكتىرگەن Sanremo Junior Kazakhstan تەلەۆيزيالىق شوۋ-جوباسىنىڭ كوركەمدىك جەتەكشىسى بولدى.

حالىقارالىق مادەني ىنتىماقتاستىق سالاسىنداعى وسى تاجىريبە جاڭا بايقاۋدىڭ كاسىبي نەگىزدەرىنىڭ بىرىنە اينالدى. دەگەنمەن، «Auyl Art Fest» جوباسىنىڭ باستى نازارىندا — بالا جانە ونىڭ مۋزىكالىق قابىلەتىن دامىتۋ مۇمكىندىگى. جوبا اۋىلدىق جەرلەردە تۇراتىن جاس ورىنداۋشىلاردىڭ ونەرىن كەڭ اۋديتورياعا تانىتۋعا، ولارعا قولداۋ كورسەتۋگە جانە شىعارماشىلىق تۇرعىدان وسۋىنە جول اشۋعا باعىتتالعان.

قاتىسۋشىلاردىڭ بىرىنە بايقاۋ العاشقى ۇلكەن ساحنالىق تاجىريبە بولسا، ەكىنشىسىنە كاسىبي ونەر جولىنداعى ماڭىزدى قادام بولۋى مۇمكىن. ال ەكى جەڭىمپاز ءۇشىن بۇل يتالياداعى حالىقارالىق ساحنادا ونەر كورسەتۋگە مۇمكىندىك بەرەدى.

Abai.kz