قازاقستاندىق كەدەنشىلەر اراسىندا پاراقورلىق دەرەكتەرى وزبەكستانمەن شەكارادا ءجيى انىقتالادى. قىتايمەن شەكارادا دا زاڭبۇزۋشىلىقتار بار. بۇل تۋرالى قارجى ءمينيسترى ءمادي تاكيەۆ قۇرىلتايدا وتكەن بريفينگتە مالىمدەدى.

بريفينگتە جۋرناليستەر قارجى مينيسترلىگىنىڭ باسشىسىنان 2026 جىلدىڭ باسىنان بەرى سىبايلاس جەمقورلىق قىلمىستارى ءۇشىن قانشا كەدەن قىزمەتكەرى جاۋاپقا تارتىلعانىن سۇرادى. ءمادي تاكيەۆ ناقتى سانىن اتاي المادى.

– مۇنداي دەرەكتەر بار. قازاقستاننىڭ وزبەكستانمەن شەكاراسىندا دا، قىتايمەن شەكاراسىندا دا كەزدەسەدى. ەڭ كوبى – وزبەكستان باعىتىندا. مىسالى، شەكارادان جەدەل ءوتۋ ءۇشىن پارا بەرۋ فاكتىلەرى بار، بىراق قازىر ءتارتىپ ورناتىپ جاتىرمىز، – دەدى مينيستر.

تاكيەۆتىڭ ايتۋىنشا، بيلىك مۇنداي زاڭبۇزۋشىلىقتارمەن تسيفرلاندىرۋ ارقىلى كۇرەسۋگە تىرىسىپ جاتىر. اتاپ ايتقاندا، تاسىمالداۋشىلارعا شەكارادان ءوتۋدى الدىن الا جوسپارلاپ، ەلەكتروندى كەزەككە جازىلۋعا مۇمكىندىك بەرەتىن KazCargo جۇيەسى قولدانىلادى.

مينيستر قىتايدان كەلە جاتقان جۇرگىزۋشى وتكىزۋ پۋنكتىنە جەتەتىن ۋاقىتىن ەسەپتەپ، ەلەكتروندى كەزەكتەن الدىن الا ورىن الا الاتىنىن ءتۇسىندىردى.

Abai.kz