الماتى قالاسىنىڭ المالى اۋداندىق سوتىندا سانجار بوقاەۆتىڭ ءىسى بويىنشا كۋاگەرلەردەن جاۋاپ الۋ جالعاسىپ جاتىر. جاڭا ايعاقتار ءبىر عانا اۆتوشەرۋدى ۇيىمداستىرۋ ءۇشىن ەكى ءتۇرلى كەلىسىمشارت جاساۋ سحەماسىنىڭ ءىس جۇزىندە قالاي جۇمىس ىستەگەنىن ايقىن كورسەتەدى.

2018 جىلى «قازترانسگاز ونىمدەرى» جشس-ءنىڭ كورپوراتيۆتىك دامۋ جانە اكتيۆتەردى باسقارۋ دەپارتامەنتىنىڭ ديرەكتورى قىزمەتىن اتقارعان تالعات ارىستانباەۆ ءىس-شارانى شىن مانىندە «We Can» كومپانياسى، ونىڭ ديرەكتورى جۇلدىز ارتىقباەۆا ارقىلى ۇيىمداستىرعانىن راستادى. كۋاگەردى ونىمەن بوقاەۆتىڭ ءوزى تانىستىرعان.

ارىستانباەۆتىڭ ايعاقتارىنان شىعاتىن نەگىزگى قورىتىندى: ول «We Can» كومپانياسىمەن جۇمىس ىستەگەن، ال ەكىنشى «BM Trust» فيرماسىن مۇلدە بىلمەيدى. سونداي-اق، كۋاگەر بوقاەۆتىڭ جيەنى، «BM Trust» اتىنان وكىلدىك ەتكەن ماديار قالمەنوۆتىڭ اۆتوشەرۋگە قاتىستى جۇمىس كەڭەستەرىنە قاتىسقانىن ەسىنە تۇسىرە المادى. بۇل ايعاقتار مەملەكەتتىك ايىپتاۋشىنىڭ نۇسقاسىن تولىق راستايدى: بارلىق ناقتى جۇمىستى ءبىر مەردىگەر اتقارعان، ال ەكىنشى كومپانيا ىسكە تەك فورمالدى تۇردە تارتىلعان.

كاسىپوداقتىڭ «BM Trust» شوتتارىنا اۋدارعان اقشاسىنىڭ ناقتى قايدا جۇمسالعانىن تاعى ءبىر كۋاگەر – ايدا نارىشكينا ءتۇسىندىردى. ول سوتتا وسى كومپانياعا «Stalex» ماركالى قولمەن باسقارىلاتىن ۆالتسوۆكا ستانوگىن 500 مىڭ تەڭگەگە ساتقانىن راستادى.

البەتتە، مۇنداي جابدىقتى ساتىپ الۋ اۆتوشەرۋدىڭ جوبالىق-سمەتالىق قۇجاتتاماسىنا ەش قاتىسى جوق. بۇل جايت پروكۋروردىڭ بۇعان دەيىن ايتقان ۇستانىمىمەن تولىق سايكەس كەلەدى: تەرگەۋ نۇسقاسى بويىنشا، «BM Trust» ارقىلى شىعارىلعان كاسىپوداق قاراجاتىن زاڭداستىرۋ ءدال وسى ستانوكتار مەن سانجار بوقاەۆتىڭ جەكە جيھاز بيزنەسىنە ارنالعان تەحنيكانى ساتىپ الۋ ارقىلى جۇزەگە اسىرىلعان.

Abai.kz