الماتى قالاسىنىڭ المالى اۋداندىق سوتىندا سانجار بوقاەۆ پەن وزگە دە ايىپتالۋشىلارعا قاتىستى قىلمىستىق ءىس بويىنشا كەزەكتى سوت وتىرىسى باستالدى. ولارعا الاياقتىق، قىلمىستىق جولمەن الىنعان اقشانى زاڭداستىرۋ، ۇرلىق، اعاشتاردى زاڭسىز كەسۋ جانە كورىنەۋ جالعان اقپارات تاراتۋ ايىپتارى تاعىلعان.

بۇگىنگى سوتتىڭ قارساڭىندا «قازترانسگاز» اق باس ديرەكتورىنىڭ بۇرىنعى قارجى جانە ەكونوميكا جونىندەگى ورىنباسارى داير كۋشەروۆ پەن «We Can» جشس ديرەكتورى جۇلدىز ارتىقباەۆادان جاۋاپ الىندى. ولاردىڭ ايعاقتارى ميلليونداعان تەڭگەگە جاسالعان شارتتاردىڭ ءمان-جايىنا، مەردىگەرلەردى تاڭداۋ تارتىبىنە، جۇمىستاردىڭ ءىس جۇزىندە ورىندالۋىنا جانە قاراجاتتىڭ كەيىنگى قوزعالىسىنا قاتىستى بولدى.

اتاپ ايتقاندا، داير كۋشەروۆ حالىقارالىق اۆتوشەرۋدى قارجىلاندىرۋ ماسەلەسى كاسىپوداق كوميتەتىنىڭ تاراپىنان قول جيناۋ ارقىلى سىرتتاي ماقۇلدانعانىن ايتتى، بۇعان قوسا سمەتالار دا ەش تەكسەرىلمەگەن. ونىڭ سوزىنشە، «BM Trust» جانە «We Can» جشس-لارىن تارتۋدى بوقاەۆتىڭ ءوزى ۇسىنعان، ال باسقا مەردىگەرلەر قاراستىرىلماعان. كوميتەت مۇشەلەرى بوقاەۆقا سەنىم ارتقانىمەن، كومپانيالاردىڭ ءبىرىنىڭ ونىڭ جيەنىنىڭ اتىنا راسىمدەلگەنىنەن حابارسىز بولعان.

اۆتوشەرۋدى ۇيىمداستىرۋدىڭ ءمان-جايىن «We Can» جشس ديرەكتورى جۇلدىز ارتىقباەۆا تولىعىراق باياندادى. ونىڭ ايتۋىنشا، «We Can» كومپانياسىنىڭ قۇرىلۋىنا تىكەلەي بوقاەۆ اتسالىسقان. بۇعان دەيىن ول ارتىقباەۆانى «BM Trust» كومپانياسىنا جۇمىسقا ورنالاستىرعان، كەيىن «قازترانسگازدىڭ» تەندەرلەرىنە قاتىسۋ ءۇشىن جەكە كومپانيا تىركەۋدى تاپسىرعان. كومپانيانى تىركەۋگە قاجەتتى مەكەنجايدى دا ءوزى بەرگەن. ال شارتتاردى ورىنداۋ جانە ورىندالعان جۇمىستاردى راسىمدەۋ ماسەلەلەرىن ارتىقباەۆا تىكەلەي بوقاەۆپەن كەلىسىپ وتىرعان.

كۋاگەردىڭ مالىمدەۋىنشە، ونىڭ كومپانياسى قازاقستان اۋماعىنداعى ءىس-شارانى وتكىزۋ جونىندەگى مىندەتتەمەلەرىن 38 ملن تەڭگەلىك شارت اياسىندا ءوز كۇشىمەن ورىنداعان. ول جۇمسالعان شىعىنداردى راستايتىن قارجىلىق قۇجاتتار مەن تۇبىرتەكتەردى سوتقا ۇسىنعان.

سونىمەن قاتار، كۋاگەر بوقاەۆتىڭ جيەنىنىڭ اتىنا راسىمدەلگەن «BM Trust» جشس-مەن جاسالعان سوماسى 40 ملن تەڭگەدەن اساتىن ەكىنشى شارتتىڭ بار ەكەنىن بۇرىن بىلمەگەنىن ايتتى. ارتىقباەۆانىڭ سوزىنشە، بۇل كومپانيا ءىس-شارانى ۇيىمداستىرۋعا مۇلدە قاتىسپاعان. ونىڭ ۇستىنە، «BM Trust» سمەتاسىندا كورسەتىلگەن كەيبىر شىعىنداردى «We Can» جشس بۇعان دەيىن-اق تولەپ قويعان.

بۇدان بولەك، ارتىقباەۆا بوقاەۆتىڭ ءوتىنىشى بويىنشا جۇرگىزىلگەن قارجىلىق وپەراتسيالار تۋرالى دا مالىمدەدى. اتاپ ايتقاندا، كۋاگەردىڭ جەكە بانك كارتاسىنا بوقاەۆتىڭ «Art romance» جيھاز بيزنەسىنىڭ كليەنتتەرىنەن دەپ ايتىلعان 9 ملن تەڭگەدەن استام قاراجات تۇسكەن. كەيىن ول بۇل اقشانى قولما-قول اقشاعا اينالدىرىپ، بوقاەۆقا بەرگەنىن ايتتى. سونداي-اق، ارتىقباەۆا «BM Trust» جشس-نەن تۇسكەن 1,5 ملن تەڭگەنى قولما-قول اقشاعا اينالدىرۋ جانە باسقا كومپانيانىڭ ەسەپشوتىنا اقشا اۋدارۋ جاعدايلارىن دا باياندادى.

ونىڭ جاۋابىنان كەيىن بوقاەۆتىڭ ادۆوكاتتارى سوتتان ءۇزىلىس جاريالاۋدى سۇرادى. ءبىراز ۋاقىتتان سوڭ سوت وتىرىسى قايتا جالعاسىپ، قورعاۋ تاراپى كۋاگەردەن جاۋاپ الۋدى جالعاستىردى.

Abai.kz