جاڭا الەۋمەتتىك نىساندار سالۋ، شارۋالارعا قولجەتىمدى نەسيە بەرۋ جانە كاسىپكەرلىكتى قولداۋ ماسەلەلەرى تالدىقورعان قالاسىنداعى دوستىق ۇيىندە وتكەن كەزدەسۋدىڭ نەگىزگى تاقىرىپتارىنا اينالدى.

مەملەكەت باسشىسىنىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىن ىسكە اسىرۋعا ارنالعان بۇل جيىندا دەپۋتاتتىق كورپۋس پەن ۇكىمەت وكىلدەرى جەتىسۋ وبلىسىنىڭ جۇرتشىلىعىمەن كەزدەسىپ، جوسپارلانعان شارالاردى ءتۇسىندىرىپ، تۇرعىنداردىڭ ۇسىنىس-پىكىرلەرىن تىڭدادى.

كەزدەسۋگە قازاقستان رەسپۋبليكاسى قۇرىلتايىنىڭ دەپۋتاتى ەكاتەرينا سمولياكوۆا، قازاقستان حالىق كەڭەسىنىڭ مۇشەسى قايرات كەرەەۆ، اۋىل شارۋاشىلىعى ۆيتسە-ءمينيسترى نازگۇل حاتەپوۆا جانە قارجى ۆيتسە-ءمينيسترى داۋرەن تەمىربەكوۆ قاتىستى. باسقوسۋعا وڭىردەگى ەتنومادەني بىرلەستىكتەر مەن قوعامدىق ۇيىمداردىڭ وكىلدەرى دە جينالدى.

جيىندا جولداۋدا ايقىندالعان مىندەتتەردىڭ ءىس جۇزىندەگى ماڭىزىنا، اتاپ ايتقاندا، ينفراقۇرىلىمدى دامىتۋ، وتاندىق ءوندىرىستى قولداۋ جانە حالىقتىڭ ءومىر ءسۇرۋ ساپاسىن ارتتىرۋ ماسەلەلەرىنە ەرەكشە نازار اۋدارىلدى.

ەكاتەرينا سمولياكوۆا جاريالانعان جالپىۇلتتىق قۇرىلىس جىلى تەك جاڭا عيماراتتار سالۋمەن شەكتەلمەيتىنىن، ينفراقۇرىلىمدى جاڭعىرتۋدى جانە حالىققا قاجەتتى الەۋمەتتىك نىسانداردى سالۋدى قامتيتىنىن اتاپ ءوتتى.

– وڭىرلەرگە جاساعان ساپارلار بارىسىندا ءبىز بۇل قاجەتتىلىكتەردى ءوز كوزىمىزبەن كورىپ، تۇرعىنداردىڭ ءوز اۋزىنان ەستىپ ءجۇرمىز. كەيبىر جەرلەردە ەرەكشە قاجەتتىگى بار بالالارعا ارنالعان وڭالتۋ جانە تۇزەتۋ ورتالىقتارى قاجەت بولسا، ەندى ءبىر ەلدى مەكەندەردە بالالاردىڭ سپورتپەن شۇعىلدانۋىنا جاعداي جاسالماعان. سوندىقتان ءاربىر جاڭا نىساننىڭ ارتىندا ناقتى ماقسات تۇرۋى ءتيىس. ياعني قاجەتتى كومەكتىڭ قولجەتىمدىلىگىن ارتتىرۋعا، بالالاردىڭ جان-جاقتى دامۋىنا مۇمكىندىك جاساۋعا جانە حالىقتىڭ كۇندەلىكتى ءومىر ءسۇرۋ ساپاسىن جاقسارتۋعا باعىتتالادى، – دەدى دەپۋتات.

سونداي-اق دەپۋتات جەتىسۋ وبلىسىنداعى تۋريستىك ينفراقۇرىلىمدى دامىتۋ ماسەلەلەرىنە توقتالدى. ونىڭ ايتۋىنشا، پاراپلانەريزم الاڭىنا اپاراتىن جولعا قاتىستى وتىنىشتەردەن كەيىن اينالما جول سالۋ تۋرالى شەشىم قابىلدانعان. بۇدان بولەك، الاكول ماڭىنداعى جەتىسۋ مەن اباي وبلىستارىن بايلانىستىراتىن جولدىڭ پروبلەمالىق ۋچاسكەسىنە قاتىستى ءتيىستى جۇمىستار جۇرگىزىلۋدە.

كەزدەسۋدىڭ ماڭىزدى بولىگى اۋىل شارۋاشىلىعىن دامىتۋعا ارنالدى. اۋىل شارۋاشىلىعى ۆيتسە-ءمينيسترى نازگۇل حاتەپوۆا وتكەن جىلى وسىمدىك شارۋاشىلىعىن جەڭىلدەتىلگەن قارجىلاندىرۋعا ءبىر تريلليون تەڭگە بولىنگەنىن جەتكىزدى. بۇل قولداۋ شارۋالارعا ەگىس جانە ەگىن جيناۋ ناۋقاندارىنا دايىندالۋعا، قاجەتتى ماتەريالدار ساتىپ الۋعا، تەحنيكانى جاڭارتۋعا مۇمكىندىك بەرەدى.

– ەندىگى مىندەت – اۋىل شارۋاشىلىعى تاۋارىن وندىرۋشىلەرگە ينۆەستيتسيالىق ماقساتتارعا ارنالعان ۇزاق مەرزىمدى قارجىلاندىرۋدىڭ قولجەتىمدىلىگى. بۇل رەتتە ناقتى وڭىرلەر ءۇشىن ەرەكشە ماڭىزى بار نىساندارعا باسىمدىق بەرىلەدى، – دەدى نازگۇل حاتەپوۆا.

ۆيتسە-مينيستر جەتىسۋداعى قانت قىزىلشاسىن وڭدەۋ ماسەلەسىنە دە توقتالدى. بيىل وڭىردە 13,5 مىڭ گەكتار القاپقا قانت قىزىلشاسى ەگىلگەن. ءونىمدى جاڭعىرتۋدان وتكەن كوكسۋ جانە اقسۋ قانت زاۋىتتارى قابىلداۋدا. ال اقسۋ زاۋىتىنىڭ تابيعي گازعا قوسىلۋى وندىرىستىك شىعىنداردى ازايتىپ، ءونىمنىڭ وزىندىك قۇنىن تومەندەتۋگە ىقپال ەتەدى.

سونىمەن قاتار جۇگەرى ەگىستىگىن ۇلعايتۋ جانە ونى تەرەڭ وڭدەۋ باعىتىنداعى مۇمكىندىكتەر تالقىلاندى. جامبىل وبلىسىندا قىتايلىق ينۆەستورلارمەن بىرلەسىپ قۇرىلعان كاسىپورىن جەتىسۋ شارۋالارى ءۇشىن قوسىمشا وتكىزۋ نارىعىن قالىپتاستىرماق.

نازگۇل حاتەپوۆا ءسۇتتى مال شارۋاشىلىعىن قولداۋ شارالارىنا دا توقتالدى. ونىڭ مالىمەتىنشە، جەڭىلدەتىلگەن قارجىلاندىرۋ اياسىندا جۇزدەن استام تاۋارلى-ءسۇت فەرماسىن قۇرۋ جوسپارلانسا، سونىڭ 71-ءى پايدالانۋعا بەرىلگەن. سونداي-اق اۋىل شارۋاشىلىعىن تسيفرلاندىرۋ، سۋبسيديا الۋ راسىمدەرىن جەڭىلدەتۋ جانە قاعازباستىلىقتى ازايتۋ ماسەلەلەرى قوزعالدى.

جيىندا جالپىۇلتتىق قۇرىلىس جىلى جەرگىلىكتى كاسىپكەرلەر ءۇشىن دە جاڭا مۇمكىندىكتەر اشاتىنى ايتىلدى. جاڭا نىسانداردىڭ قۇرىلىسى قۇرىلىس ماتەريالدارىنا، جابدىقتار مەن كولىك قىزمەتتەرىنە سۇرانىستى ارتتىرىپ، قوسىمشا جۇمىس ورىندارىن قۇرۋعا جانە بيۋدجەت تۇسىمدەرىن ۇلعايتۋعا ىقپال ەتەدى. سونىمەن بىرگە جوبالاردىڭ جۇزەگە اسىرىلۋىنا قوعامدىق باقىلاۋ جۇرگىزۋدىڭ ماڭىزدىلىعى اتاپ ءوتىلدى.

وسىلايشا، دوستىق ۇيىندە وتكەن كەزدەسۋدە پرەزيدەنت جولداۋىندا ايقىندالعان مىندەتتەر ءوڭىردىڭ ناقتى قاجەتتىلىكتەرىمەن ۇشتاستىرا وتىرىپ تالقىلاندى. بۇل رەتتە الەۋمەتتىك قىزمەتتەردىڭ قولجەتىمدىلىگىن ارتتىرۋ، كاسىپكەرلىكتى قولداۋ جانە اۋىل شارۋاشىلىعىن دامىتۋ باعىتىنداعى ناقتى ناتيجەلەر حالىقتىڭ ءال-اۋقاتىن جاقسارتۋدىڭ ماڭىزدى كورسەتكىشتەرى بولماق.

Abai.kz