الماتىدا شىڭعىس ايتماتوۆ ورتالىعى اشىلدى
«تۇران» ۋنيۆەرسيتەتىندە كورنەكتى قىرعىز جازۋشىسى، الەم ادەبيەتىنىڭ كلاسسيگى شىڭعىس ايتماتوۆ اتىنداعى ورتالىق پەن قالامگەردىڭ ءبيۋستىن سالتاناتتى تۇردە اشۋ ءراسىمى ءوتتى. جاڭا ورتالىق جازۋشىنىڭ مۇراسىن زەرتتەۋگە جانە قازاقستان مەن قىرعىزستان اراسىنداعى ىنتىماقتاستىقتى نىعايتۋعا باعىتتالعان ءبىلىم بەرۋ، عىلىمي جانە مادەني جوبالاردى بىرىكتىرەتىن الاڭعا اينالادى.
سالتاناتتى ءراسىم شىڭعىس ايتماتوۆتىڭ گۋمانيستىك يدەيالارى مەن شىعارماشىلىق مۇراسىن دارىپتەۋگە ارنالعان «ادامعا ەڭ قيىنى – كۇن سايىن ادام بولۋ» اتتى ءىس-شارا اياسىندا ۇيىمداستىرىلدى. وعان قازاقستان مەن قىرعىزستاننىڭ ديپلوماتيالىق وكىلدەرى، جازۋشىلار، عالىمدار، مادەنيەت قايراتكەرلەرى، جوعارى وقۋ ورىندارىنىڭ باسشىلارى، وقىتۋشىلار مەن ستۋدەنتتەر قاتىستى.
ورتالىقتى قۇرۋ باستاماسىن قىرعىز رەسپۋبليكاسىنىڭ الماتى قالاسىنداعى باس كونسۋلى جەڭيشبەك اسانقۇلوۆ كوتەردى. جوبانى «تۇران» ۋنيۆەرسيتەتىنىڭ رەكتورى راحمان الشانوۆ قولدادى. ونى جۇزەگە اسىرۋعا الماتى قالاسىندا تۇراتىن قىرعىز دياسپوراسىنىڭ وكىلدەرى ەلەۋلى ۇلەس قوستى.
قۇرمەتتى قوناقتاردىڭ قاتارىندا قازاقستان رەسپۋبليكاسى سىرتقى ىستەر مينيسترلىگىنىڭ الماتى قالاسىنداعى وكىلدىگىنىڭ باسشىسى جانىبەك ءابدىراشوۆ، قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ، جازۋشىنىڭ تۋىسى ءارى شىڭعىس ايتماتوۆ قورى پرەزيدەنتىنىڭ كەڭەسشىسى اسانبەك احماتوۆ، سونداي-اق ەكى ەلدىڭ عىلىمي جانە شىعارماشىلىق زيالى قاۋىم وكىلدەرى بولدى.
ءىس-شارا بارىسىندا قىرعىز ۇلتتىق «ماناس» تەاترىنىڭ ديرەكتورى نۇربەك تالانتبەكوۆ شىڭعىس ايتماتوۆ ءبيۋستىنىڭ اۆتورى، ءمۇسىنشى نادىربەك جەەرەنچيەۆكە قىرعىز رەسپۋبليكاسىنىڭ مادەنيەت، اقپارات جانە جاستار ساياساتى ءمينيسترى ميربەك مامبەتاليەۆتىڭ قۇتتىقتاۋىن تابىستادى. سونىمەن قاتار مۇسىنشىگە مينيسترلىكتىڭ ناگراداسى بەرىلدى.
قوناقتارعا جازۋشىنىڭ ءومىرى مەن شىعارماشىلىعىنا ارنالعان بەينەروليك كورسەتىلدى. كەزدەسۋگە قاتىسۋشىلار شىڭعىس ايتماتوۆ مۇراسىنىڭ تۇركى الەمى مادەنيەتىندەگى ورنى مەن جالپىادامزاتتىق ماڭىزى تۋرالى وي ءبولىستى. باعدارلاما مۋزىكالىق جانە ادەبي قويىلىمدارمەن جالعاستى. سالتاناتتى بولىمنەن كەيىن ۋنيۆەرسيتەت كىتاپحاناسىندا ورتالىقتىڭ اشىلۋ ءراسىمى ءوتتى.
شىڭعىس ايتماتوۆ ورتالىعى عىلىمي كونفەرەنتسيالار، دارىستەر، ادەبي كەزدەسۋلەر، كورمەلەر جانە بىرلەسكەن مادەني-ءبىلىم بەرۋ جوبالارى وتكىزىلەتىن الاڭ بولماق. ورتالىق قىزمەتىندە جازۋشىنىڭ شىعارمالارىن زەرتتەۋگە، جاستاردىڭ كىتاپ وقۋعا قىزىعۋشىلىعىن ارتتىرۋعا جانە ستۋدەنتتەردى ورتالىق ازيا حالىقتارىنىڭ مادەني مۇراسىمەن تانىستىرۋعا ەرەكشە كوڭىل بولىنەدى.
ورتالىقتىڭ اشىلۋى قازاقستان مەن قىرعىزستان اراسىنداعى مادەني جانە عىلىمي ىنتىماقتاستىقتى دامىتۋداعى ماڭىزدى قادام بولدى. ادامنىڭ قادىر-قاسيەتى، ادامگەرشىلىك تاڭداۋ، تاريحي جادى جانە بولاشاق ۇرپاق الدىنداعى جاۋاپكەرشىلىك ماسەلەلەرىن ارقاۋ ەتكەن شىڭعىس ايتماتوۆ شىعارماشىلىعى باۋىرلاس ەكى حالىقتىڭ ورتاق رۋحاني كەڭىستىگىندە ەرەكشە ورىن الادى.
«تۇران» ۋنيۆەرسيتەتى الداعى ۋاقىتتا دا مادەنيەتارالىق ديالوگتى دامىتۋعا، تاتۋ كورشىلىك قاتىناستاردى نىعايتۋعا جانە تۇركى الەمىنىڭ كورنەكتى تۇلعالارىنىڭ ادەبي مۇراسىن ساقتاۋعا باعىتتالعان باستامالاردى قولداي بەرەدى.
Abai.kz