مۇحتار شاحانوۆ انكارا جۇرتىمەن كەزدەستى
انادولىعا ات باسىن تىرەگەن حالقىمىزدىڭ ارداقتى ۇلى، اقيىق اقىن مۇحتار شاحانۇلى انكارادا جۇرتشىلىقپەن جۇزدەسۋ وتكىزدى. كەلىستى كەزدەسۋ، اسىرەسە تۇركيا رەسپۋبليكاسىندا ءبىلىم الىپ جۇرگەن جالىندى جاستاردىڭ رۋحاني ومىرىندە ايرىقشا ورىن الدى.
«انكارا قازاق جاستارى» بىرلەستىگىنىڭ ۇيىتقى بولۋىمەن ۇيىمداستىرىلعان جۇزدەسۋگە تۇركى الەمىنىڭ تۇتاستىعى ءۇشىن تەر توگىپ جۇرگەن قوعام جانە قالام قايتاركەرلەرى مەن عالىمدار، مەملەكەتتىك ەمەس ۇيىمدار مۇشەلەرى جانە دە اقىننىڭ وتتى جىرلارىمەن تاربيەلەنگەن بىلىمگەر جاستار قاتىستى.
ارداقتى عالىم، چانكايا ۋنيۆەرسيتەتىنىڭ ۇلاعاتتى ۇستازى ماحير ناكيپ مىرزا باسقوسۋدى رەسمي تۇردە اشىپ، مۇحتار اعامىزدىڭ تۇركى دۇنيەسىنىڭ رۋحانياتى مەن الەمدىك وزىق وي كەڭىستىگىندەگى وزىندىك ورنىنا كەڭىنەن توقتالدى. «تۇركى الەمى زيالىلار وداعىنىڭ» توراعاسى رەتىندە دە مۇحتار شاحانۇلىنىڭ تاريحي سەبەپتەرمەن اراسى اجىراعان تۋىستاستاردىڭ تۇتاستىعىنا زور ۇلەس قوسىپ، ورتاق رۋحانياتىمىزعا ۇلكەن ولجا سالاتىنىنا كامىل سەنەتىنىن جەتكىزدى.
مۇحتار شاحانۇلى ءوز كەزەگىندە قازىرگى تاڭداعى وزەكتى ماسەلەلەردى اۋقىمدى تالداپ، ولاردى شەشۋ جولدارىن كەڭىنەن ءتۇسىندىردى. كۇرەسكە تولى ءومىر جولىنىڭ بەل-بەلەستەرىنەن تاعىلىمدى تۇستارىن ءتىرىلتىپ، ەستى ەستەلىكتەر ايتتى. كەسەك جىرلارىن شابىتتانا وقىپ، قوردالى ماسەلەلەر تۋراسىندا قويىلعان ساۋالدارعا تۇششىمدى جاۋاپتار بەردى.
سازگەرلىك قىرى كوپ ايتىلا بەرمەيتىن مۇحتار اعامىزدىڭ «قازىرگى شىنشىلدىق ولشەمى» اتالاتىن سياسى كەپپەگەن جاڭا ءانى كەزدەسۋ بارىسىندا ورىندالىپ، جۇرتشىلىق كوڭىلىنە ۇيالاعان تىڭ تۋىندى ءان الەمىنە قانات قاقتى.
كەزدەسۋ قورىتىندىسىندا مۇحتار شاحانۇلىنا جاھاندانۋ داۋىرىندە وسكەلەڭ ۇرپاقتى رۋحسىز قيراتقىش كۇشتەردەن ايبىندى كۇرەسكەر رەتىندە قورعاۋداعى كوشباسشىلىعى مەن قاجىرلى قايراتكەرلىگى جانە دە جاستاردى وتانشىلدىق رۋحتا تاربيەلەۋ ىسىنە قوسقان اسا زور ۇلەسى ءۇشىن ۇيىمداستىرۋشىلار تاراپىنان العىس حات تاپسىرىلدى. سونىمەن قاتار، جۇزدەسۋگە جيىلعان جۇرتشىلىقتىڭ ايرىقشا قۇرمەتىنىڭ بەلگىسى رەتىندە قادىرمەندى قوناقتىڭ يىعىنا وقالى شاپان جابىلىپ، سىي-سياپات جاسالدى.
كورنەكتى مەملەكەت جانە قوعام قايراتكەرى، ارقالى اقىن مۇحتار شاحانۇلىمەن وتكەن جارقىن جۇزدەسۋ جۇرەكتەرگە جول تارتتى جانە دە جۇرتشىلىق ۇلكەن بۇلاقتان سارقىلماس ءنار الىپ، شالقار شابىتپەن تارقاستى.
مىرزاحان بايبولوۆ،
گازي ۋنيۆەرسيتەتىنىڭ دوكتورانتى
