بيىلدان باستاپ قازاق ەلى 18 مامىردى «تۇركى جازۋى» كۇنى رەتىندە مەرەكەلەيتىن بولادى. قازاقستان رەسپۋبليكاسى پارلامەنتىنىڭ شەشىمىمەن 18 مامىر «تۇركى جازۋى كۇنى» دەپ جاريالاندى. ۇكىمەت تە بۇل شەشىمدى رەسمي تۇردە بەكىتتى.بۇل بىلە-بىلگەنگە ۇلكەن تاريحي ءمانى بار وقيعا. وسى ۋاقىتقا شەيىن «مادەنيەتى بولماعان، جازۋ-سىزۋدى ءبىز ۇيرەتتىك» دەپ مەنمەنسىپ كەلگەندەردىڭ كومەيىنە قۇم قۇيىلارى ءسوزسىز. تورتكۇل دۇنيەگە وزدەرىن تانىتىپ، «ماڭگىلىك ەل» بولۋدى كوكسەگەن باتىر بابالاردىڭ تەرەڭ دە تاعىلىمدى تاريحىن تاسقا وشپەستەي ەتىپ قاشاپ جازعانى - تۇركى حالىقتارىنىڭ دا ولمەس وركەنيەت قالىپتاستىرعانىنىڭ ءبىر عانا كورىنىسى بولسا كەرەك. وسى ەرەكشە كۇنگە وراي تۇركى اكادەمياسىنىڭ مۇرىندىق بولۋىمەن الدا تاعى ءبىر ۇلكەن حالىقارالىق ءىس-شارا وتپەكشى. مامىردىڭ 19-20 كۇندەرى استانا قالاسىندا «تۇركى جازۋى» اتتى حالىقارالىق فورۋم باستالادى. تۇركى الەمى ءۇشىن ەرەكشە ماڭىزدى عىلىمي جيىنعا تۇركيا، ءازىربايجان، قىرعىزستان جانە وزگە دە تۇركىتىلدەس ەلدەردەن كورنەكتى عالىمدار مەن قوعام قايراتكەرلەرى، ديپلوماتتار كەلمەك. ال قازاقستان جاعىنان مينيسترلەر، پارلامەنت دەپۋتاتتارى مەن ءبىر توپ عالىمدار قاتىسادى. بۇگىن بارشا تۇركىنىڭ قارا شاڭىراعى – قازاق بايتاعىندا باستالعان ۇلى مەرەكە ۇزاماي تۇگەل تۇركىنىڭ ورتاق مەيرامىنا اينالارىنا سەنىم مول. مەرەكەلەرىڭىز قۇتتى بولسىن! 

تۇركى اكادەمياسىنىڭ ءباسپاسوز قىزمەتى

اباي-اقپارات