الماتى قالاسىنىڭ ماڭىندا جاڭا اۋەجاي سالىنادى دەپ حابارلايدى "قازاقپارات".

بۇل تۋرالى الماتىدا وتكەن ايماقتىق جيىن بارىسىندا الماتى وبلىسى اكىمىنىڭ ورىنباسارى اماندىق باتالوۆ ءمالىم ەتكەن.

ونىڭ ايتۋىنشا، جاڭا اۋەجاي ءۇشىن الماتى قالاسىنان 54 شاقىرىم جەردە ورنالاسقان جەتىگەن كەنتى ماڭىندا 2 مىڭ گەكتارعا جۋىق جەر تەلىمى بەلگىلەنىپ قويىلعان.

«بۇل شەشىم كولىك جانە كوممۋنيكاتسيا مينيسترلىگىنىڭ ۇسىنىسىمەن قابىلداندى. ونداعى ماقسات - ۇشاقتاردىڭ ۇشۋى مەن الماتى قالاسى تۇرعىندارىنىڭ قاۋىپسىزدىگىن قامتاماسىز ەتۋ. بۇل اۋەجاي سونىمەن قاتار ترانزيتتىك قىزمەت تە اتقاراتىن بولادى. جاقىن ورنالاسقان تەمىرجولدار، اۆتوكولىك جولدارى، ەلەكتر قۋاتىنىڭ كوزدەرى جانە سۋ رەسۋرستارى كولىك تاسىمالداۋ ماسەلەسىن شەشۋگە جانە اۋەجايدىڭ جۇمىسىن قامتاماسىز ەتۋگە سەپتىگىن تيگىزەدى» - دەدى الماتى وبلىسى اكىمىنىڭ ورىنباسارى. 

ەستەرىڭىزگە سالا كەتەيىك، بۇگىنگى تاڭدا الماتى ماڭىندا حالىققا ءتورت اۋەجاي قىزمەت كورسەتەدى. ولاردىڭ ەڭ ۇلكەنى - الماتى قالاسىندا، ال قالعان كىشىگىرىم ءۇش اۋەجاي بورالداي، بايسەركە جانە وسى جەتىگەن كەنتىندە ورنالاسقان.

اباي-اقپارات