15 كوكەكتى قازاق ءباسپاسوزى عاشىقتار كۇنى دەپ ناسيقاتتاعالى بىرنەشە جىل بولدى. بىراق سوزدەن ارىعا بارماي ءجۇر. ءاۋ باستا "جاس الاشتىڭ" باستاماسىمەن ۆالەنتين كۇنىنە قارسى ناسيقات رەتىندە باستالعان. سوڭىع كەزدەرى "ۆالەنتيننىڭ" ءدامى كەتە باستادى، بىراق سودان ءبىزدىڭ عاشىقتىعىمىز كۇشەيىپ كەتپەي تۇر. بۇعان بىرنەشە سەبەپ بار:

1. اتالمىش كۇندى قوزى-كورپەش كۇنى دەگەنمەن، ول جىرعا دا قوزى مەن بايانعا دا بايلانىستىراتىن دايەك جوق. انشەيىن الماتىداعى كوكتەمنىڭ جاقسى كۇندەرى بولعاسىن الىنا سالعان.

2. بەلگىلەنگەن مەرەكەنىڭ اتريبۋتى، بەلگىسى، ءداستۇرى جوق...

ارينە، ماقساتىمىز «بۇيرەكتەن سيراق شىعارۋ» ەمەس، كەرىسىنشە كۇلكىگە قالماي، قۇندىلىقتى جالاڭ ەتپەي، دايەك پەن دەرەككە قۇرىپ، جالپىۇلتتىق قۋانىشقا اينالدىرۋدى كوزدەۋ عانا. قوزى مەن بايان اڭىزى باسقا تۇركىلەرگە دە ورتاق، ماسەلەن ساقالاردا دا بار. ءبىزدىڭ بۇل باستامامىز ولاردىڭ تانىمىن تۇيىققا تىرەپ، ساۋالدى كوبەيتۋى مۇمكىن...

ودان ارىگە بارماي-اق، وسى جەردەن توقتاپ، مىنا نارسەنى قوسا كەتكەندى ءجون كوردىك.

وسىدان بىرنەشە جىل بۇرىن قىز-جىبەك جىرىنىڭ 500 جىلدىعى اتالىپ ءوتتى، ول يۋنەسكو دەڭگەيىندە تىركەلدى. بۇل جىر قازاقتان باسقا تۇركىلەرگە تيەسىلى ەمەس، ناعىز قازاقى عاشىقتىق برەند! ال، باسقا عاشىقتىق داستاندارى مەن تاريحىنا وزگە تۇركىلەردىڭ تالاسى بار. ەكىنشىدەن، قازاقتى الەمگە العاش ايگىلەگەن ونەر دە وسى "قىز جىبەك" ءفيلمى. بۇل - اينىماعان رومەو-دجۋلەتتانىڭ دالالىق نۇسقاسى. قىزىعى سول، جىبەكتىڭ رولىنە قىز تاڭداۋ كاستينگى 1970 جىلى  19 مامىر كۇنى (مەرۋەرت وتەكەشوۆانىڭ ءالى كۇنگە دەيىن ەسىندە، ءوزىم حابارلاسىپ ارنايى انىقتاعام) وتكەن. مىنە، وسى كۇن - قازاق عاشىقتىق سەزىمىن ايگىلەۋگە، ناسيقاتتاۋعا لايىق كۇن ەمەس پە؟

راس، جىبەك پەن تولەگەن قوزى مەن بايان سەكىلدى بايانسىز ماحاببات ۇلگىسى، بىراق ونى باياندى ەتىپ، جالعاستىرىپ مەرۋەرت پەن قۇماندار ءالى ءتىرى جۇرگەن جوق پا؟ اتريبۋت تا، ميف تە، ءداستۇر دە تۇنىپ تۇر. ونىڭ ۇستىنە مامىر ايى قازاقتى بىلاي قويعاندا بار حالىق ءۇشىن ماحاببات ايى! وسى كۇندى تاڭداپ، بيىلدان باستاپ قولعا العان ابزال بولار ەدى.

حالقىمىزدىڭ مۇنداي كۇنگە سۇرانىسى دا اقتارلىق، قانشاما تۋىندى،ونەر، تانىم ماحابباتتى تاقىرىپ ەتكەن دەسەڭشى! وكىنىشكە مە،قۋانشىقا قاراي ما، اتالمىش كۇن ءالى قالىپتاسىپ ۇلگەرگەن دە جوق، جەكەلەگەن جۋرناليستەر مەن رەداكتسيالاردىڭ تالپىنىسىمەن جىل سايىن ناسيقاتتالىپ ءجۇر.ەڭ دۇرىسى، جۇرتتى ءارى-ءسارى قىلماي، بۇعان مادەنيەت مينيسترلىگى ارالاسىپ، ءوز ۇستانىمىن ناقتى شەشىممەن جاريا ەتكەنى نۇر ءۇستى نۇر بولار ەدى.

ەل Cەرىك

Abai.kz