قازىرگى بيلىكتىڭ «بولاشاعى جوق اۋىل» دەگەنى مۇلدەم قاتە پىكىر. «بولاشاعى جوق اۋىل» بولۋشى ما ەدى. اۋىل دەگەندە ەڭ الدىمەن مەنىڭ كوز الدىما قالىڭ قازاق كەلەدى. بۇگىنگە دەيىن ۇلتىمىزدىڭ تەڭ جارتىسى اۋىلدى جەرلەردە تۇرىپ كەلدى جانە ءالى دە سوندا تۇرادى. تۋراسىن ايتاتىن بولسام، اۋىلدى قۇرتۋ – قازاقتى قۇرتۋ دەر ەدىم.

بۇگىنگى ورىسقۇل، ورىسشىل بيلىكتىڭ ءبىزدىڭ قازاققا تەرىس قاراعانىنا بيىل 23 جىل تولادى. وسى جىلدار ىشىندە قازاقتار تۇراتىن ەلدى مەكەندەر ازدى، توزدى. Cانالى تۇردە، قاساقانا اۋىلداردى قاراۋسىز قالدىردى. قازاقتىڭ ەڭ شۇرايلى دەگەن جەرلەرى تۇگەلدەي باسقا ءبىر كەلىمسەكتەرگە بەرىلگەن. مەنىڭ ەستۋىمشە، قازاقستانداعى جارامدى 25 ملن گەكتار جەردىڭ ناقتى قوجايىنى ءتورت-اق ادام ەكەن. ولار: شكولنيك، قايتىس بوپ كەتكەن مەتتە، تەرەششەنكو، ماسكەۋدىڭ بۇرىنعى مەرى لۋجكوۆتىڭ ايەلى، ت.ب.

ال، ءبىزدىڭ اۋىلدى جەرلەردە تۇراتىن قازاقتار سولاردىڭ جالدامالى قۇلدارى ىسپەتتى. قازاقستان جەرىنىڭ 70 پايىزى تەك مال شارۋاشىلىعىنا عانا ارنالعان. بىزدە سۋارمالى جەرلەر وتە تاپشى. ءبىر كەزدەگى 50 ميلليون باسقا جۋىق مالدان بۇگىندە تىگەرگە تۇياق قالماعان دەسە دە بولادى. مالى جوق قازاق – قايىرشى قازاق. بۇل اششى دا بولسا، اقيقات!

بۇگىندە اۋىلدى جەرلەردەگى قانداستارىمىزدىڭ 90 پايىزى جۇمىسسىز، قايىرشىلىقتىڭ الدىندا ازەر كۇن كەشۋدە. اۋىلدى جەرلەردەگى مادەنيەت وشاقتارى، ءتىپتى، ورتا ءبىلىم بەرەتىن مەكتەپتەردىڭ كوبى جابىلعان نەمەسە جابىلۋدىڭ از-اق الدىندا تۇر.

تۋراسىن ايتقاندا، جەر توزعان، ەل ازعان. بۇگىندە اۋىل حالقى تۇگەلگە جۋىق قالالى جەرلەرگە بوسۋدا. ەندى ازداعان جىلداردان كەيىن قازاقستانداعى اۋىل اتاۋلى قاڭىراپ بوس قالادى. ول بۇگىنگى ماسكەۋشىل، «ەۋرازياشىل» بيلىككە وتە ءتيىمدى. بوس قالعان جەرلەرگە ورەكەڭدەردى، كورشىمىز قىتايلاردى قونىستاندىرماق. بارار جەر، باسار تاۋى قالماعان ءبىزدىڭ قازاقتار قالا مەن اۋىلدىڭ ەكى ورتاسىندا بوسىپ ءجۇرىپ، تۋ-تالاقايى شىعادى.

توقسان اۋىز ءسوزدىڭ توبىقتاي  ءتۇيىنى، اۋىلدى قۇرتۋ – قازاقتى قۇرتۋمەن بىردەي دەگەن ءسوز. «بولاشاعى جوق» اۋىل دەگەن ءسوز تىركەسى، مىنە وسىدان شىققان...

جۇماش كوكبورى، اقىن

 Abai.kz