مۇقان يساحان. شۇعا قۇراۋعا كەلەدى. زيالىلار قۇراق كورپە بولا الا ما؟

رۋحاني بىرتۇتاستىقتى قالاي قامتاماسىز ەتەمىز دەگەندى ويلانسام، اپامنىڭ قىزىلدى-جاسىلدى شۇعانى ادىپتەپ، ىشىنە ماقتا سالىپ، قۇراق كورپە جاساعانى ەسىمە تۇسەدى. جوق، ويعا ورالعان مىسال دۇرىس ەمەس سياقتى. شۇعا قۇراۋعا كەلەدى، بىراق ءبىزدىڭ ءبىرىن-ءبىرى كاپىرگە شىعاراتىن زيالىلارىمىز ۇلت مۇددەسى ءۇشىن باستارى بىرىگىپ، حالقىنا توسەنىش قۇراق كورپە بولا الا ما؟ ءاي قايدام؟ قۇبىلاسى بولەك-بولەك بولعان سوڭ، اركىم ءوز توعايىنا قاراپ ۇليدى عوي. ءبىرى اراب، ءبىرى تۇرىك، ءبىرى پۋشتۋن بولىپ ىڭىرسىعاندا، قارا حالىق ولاردان قايتىپ وپا تابادى؟ ءاسىلى، ارقايسىسى ءبىر-ءبىر جاماعاتتىڭ سويىلىن سوعىپ، بىرلىگىمىزگە وسى اقىندار، جازۋشىلار، ونەر ادامدارى جارىقشاق ءتۇسىردى. مىنا شىققىر كوز ولاردىڭ دۇنيەلىك باس پايدانى ويلاپ، ءبىرىنشى بوپ ۇلتتىق مۇددەنى اياق-استى ەتە سالاتىنىن تالاي كوردى. بىراق، بۇل جازعاندار ۇياتتان جۇرداي عوي. جوعالتقان ۇپايىنىڭ ورنىن سول ۇلتتىق مۇددەنى قايتادان بەت-پەردە عىپ تولتىرۋعا تىرىسىپ-باعادى. وعان دا تالاي كۋا بولدىق. ەڭ بولماسا، وزدەرىن كۇناھار بىلاي تۇرسىن، كىنالى دە سەزىنبەيدى عوي، شىركىندەر. وسىندايدا توقاش بەردياروۆ اعامىزدىڭ: "اقىن-جازۋشىلاردىڭ ىشىندە ساتقىندار كوبەيىپ كەتتى، ەندى ءۇشىنشى دۇنيەجۇزىلىك سوعىس ەرتە باستالسا ەكەن، ءبىرازىنىڭ سازايىن بەرەتىن" دەگەن ءسوزى ەسىمە تۇسەدى. ءيا، قازاقياعا تازارتۋ جۇمىستارىن جۇرگىزەتىن مەزگىل جەتكەن سياقتى...

Facebookتەگى جەكە پاراقشاسىنان الىندى.