قادىرلى وقىرمان، XXI عاسىردا حالىققا اقپارات تاراتۋدا پورتالدار مەن الەۋمەتتىك جەلىلەردىڭ ۇستەمدىگىنىڭ ۇدەۋىنە بايلانىستى ءار باعىتتا، ءار سالادا كۇن ساناپ سايتتاردىڭ قاتارى مولايىپ جاتقانىن ءسىز بەن بىزگە ءمالىم. وسى ۇردىسكە ىلەسىپ سول سايتتار قاتارىندا www.kazbilim.kz اتتى جاڭا پورتالدىڭ جۇمىسىن باستاپ وتىرمىز.

“قازاقتىڭ تاعدىرى، كەلەشەكتە ەل بولۋى دا مەكتەبىنىڭ قانداي نەگىزدە قۇرىلۋىنا بارىپ تىرەلەدى. مەكتەبىمىزدى تازا، بەرىك ءھام ءوز جانىمىزعا (قازاق جانىنا) ۇيلەسەتىن نەگىزدە قۇرا بىلسەك، كەلەشەگىمىز ءۇشىن تايىنباي-اق سەرتتەسۋگە بولادى”. بۇل – ماعجان جۇماباەۆتىڭ ءسوزى. بارشا الاشتىڭ يدەياسى، كەشەگى كەڭەستىك كەساپات زاماندا سول ءاليحان بوكەيحان، احمەت بايتۇرسىنۇلى، مىرجاقىپ دۋلاتوۆتارداي الاش قايراتكەرلەرى  ساياسات ساحناسىنداعى قيان-كەسكى كۇرەستە جۇرسە دە، وقۋلىق جازىپ، مەكتەپتەر اشۋ مەن ۇستازدىق جولدى ۇمىت قالدىرماپ ەدى.   بۇل كۇنى شە؟

ال، بۇگىن جىلىنا ءبىر مينيستر اۋىستىرىپ، كۇنىنە ءبىر رەفورما جاساپ جاتسا دا ءبىلىم بەرۋ ءىسىنىڭ ولقىلىعى شاش-ەتەكتەن.  بۇدان بۇرىن ءارتۇرلى باسىلىم مەن سايت بەتتەرىندە تام-تۇمداپ وسى سالانىڭ اۋىر جاعدايىنىڭ استىن سىزىپ كورسەتىپ، ازاماتتىق پىكىرىمىز بەن ۇسىنىسىمىزدى ورتاعا سالىپ جۇردىك. سودان تۋعان قوعامدىق پىكىر بۇل جۇمىسپەن جۇيەلى اينالىسۋ كەرەكتىگىن كورسەتتى. بۇل وسى سايتتىڭ ومىرگە كەلۋىنە تۇرتكى بولدى.

ءبىزدىڭ ماقسات – قۇرعاق سىناپ-مىنەۋ ەمەس، ءبىزدىڭ ماقسات – ءبىلىم سالاسىندا سان قاتپارلى قىردى اشىپ، ۇستازدىڭ ءۇنىن ەستىرتىپ، وقۋشىنىڭ ويىمەن ورتاقتاسىپ، اتا-انا ارمان-تىلەگىن جەتكىزۋ. ۇلىلارمىزدىڭ ۇلتتىڭ عىلىم-ءبىلىمى تۋرالى بۇگىن دە، ەرتەڭ دە سىنى كەتپەيتىن سىرلى ويلارىنا قايتارا سوعىپ، زامانا ۇنىنە قاراي جاڭعىرتا جار سالماقپىز. سول ارقىلى قوعام مەن بيلىككە، ءبىلىم سالاسىنىڭ تىزگىنىن ۇستاعاندار مەن ۇلتىم دەگەن ۇلدارعا وسى سالانىڭ قالتارىستا جاتقان اششى اقيقاتتارىن جەتكىزىپ، قوعامنىڭ نازارىن بارىنشا مەكتەپكە بۇرۋ.

«ەل مەن ەلدى، ۇلت پەن ۇلتتى، حالىق پەن حالىقتى تەڭەستىرەتىن نارسە – ءبىلىم» دەگەن مۇحتار اۋەزوۆتىڭ ىزگى ويىن باسشىلىققا الا وتىرىپ، سالانىڭ سان قاتپارىن اشا كورسەتىپ، مامانداردىڭ دا كەلەلى كەڭەستەرىن جەتكىزىپ، سالانىڭ ۇزدىكتەرىنىڭ ۇلگىسىن دە ۇرپاققا ونەگە ەتپەك نيەتىمىز بار.

“حالىق تۇزەلۋىنىڭ ءۇمىتى جاستاردا. سوندىقتان، جاستاردىڭ قالاي وقىپ، قالاي تاربيەلەنۋى بارىنەن بۇرىن ەسكەرىپ، بارىنەن جوعارى قويىلاتىن جۇمىس”،- دەگەن ەدى وتكەن عاسىردا ۇلت ۇستازى احمەت.  سول جاستاردىڭ بۇگىنگى تاربيەلەنۋى مەن ءبىلىم الۋىنا وزىندىك وي تولعامىمىزدى ورتاعا سالىپ، بۇگىنگى ۇرپاقتىڭ ەرتەڭگى كەلەشەگى ءۇشىن الاڭدايتىن جاقتارىمىزدى العا سالىپ سىنىمىزدى تۇزەتسەك، ءمىنىمىز تۇزەلەر.

الەمنىڭ ەكىنشى ۇستازى ءابۋ ناسىر ءال-فارابي ەسكەرتكەن «تاربيەسىز بەرىلگەن ءبىلىم – ادامزاتتىڭ قاس جاۋى»، دەگەن ءسوزىن بەرىك ۇستانىپ، تاربيەمەن ءتالىمدى ۇشتاستىرساق، ءبىزدىڭ ۇرپاقتىڭ الىمى مەن دارىنى تالاي ەلدى تاڭداي قاقتىرارى ءسوزسىز ەدى. الەمنىڭ ەكىنشى ۇستازى تۋىلعان حالىقتىڭ ۇرپاعى ۇساق بولماسى انىق ەدى.

سول ءۇشىن اباي اتامىزدىڭ سوزىمەن ايتساق: “بىلىمدىدەن شىققان ءسوز، تالاپتىعى بولسىن كەز”. ءبىز ورتاعا دانەكەر بولا الساق – ماقساتتىڭ ورىندالعانى.

قادىرلى، وقىرمان! سايت الاڭىندا ءبىلىم سالاسىنا بايلانىستى وزەكتى دەپ ساناعان ويلارىڭىزعا ورىن بەرەمىز. ۇلت بولاشاعىنا ايتار ويلارىڭىز بولسا مارحاببات.

باس رەداكتور: اياتجان احمەتجان

اباي-اقپارات