10-نشى ءساۋىر كۇنى تالانتتى اقىن، سۇڭعىلا ادەبيەتتانۋشى، الەمنىڭ ادەبيەتى، مادەنيەتى، تاريحىنىڭ اسقان بىلگىرى ءامىرحان بالقىبەكتى تۋعان ولكەسى – وڭتۇستىك قازاقستان وبلىسى، شاردارا قالاسى اقتىق ساپارعا شىعارىپ سالدى.

اقىندى باقيعا شىعارىپ سالۋ قارالى جيىنىنا وبلىستىڭ اتقامىنەر ازاماتتارى، ەلدىڭ ءار تۇكپىرىنەن اقىننىڭ ادەبيەتتەگى زامانداستارى، جاس قالامگەرلەر توپ-توبىمەن كەلىپ، ءامىرحان بالقىبەكتىڭ اڭىراپ قالعان اناسىنا، وتباسى، تۋعان-تۋىس، ەل-جۇرتىنا كوڭىل ايتتى.

شاردارا قالاسىنىڭ ورتالىق مەشىتىندە وتكەن قارالى جيىندا «قالامگەر-مەديا» ورتالىعىنىڭ ديرەكتورى جاناربەك ءاشىمجان اشتى. كەزەگىمەن ءسوز العان قازاقستان جازۋشىلار وداعى باسقارما توراعاسىنىڭ ورىنباسارى اقىن مارالتاي رايىمبەكۇلى، بەلگىلى سىنشى، «الاش» ادەبي سىيلىعىنىڭ يەگەرى امانگەلدى كەڭشىلىكۇلى، وڭتۇستىك قازاقستان وبلىسى اكىمدىگىنىڭ ءباسپاسوز حاتشىسى ءارى وبلىس اكىمى اپپاراتى باسشىسىنىڭ ورىنباسارى بەرىك ءۋالي، اقىن، «جاس قازاق ءۇنى» گازەتىنىڭ باس رەداكتورى قازبەك يسا سىندى ازاماتتار ءامىرحان بالقىبەكتىڭ قازاق ادەبيەتىندەگى ەرەكشە ورنىنا توقتالدى.

44-ءنشى كوكتەمىندە جارىق دۇنيەگە قوش ايتقان اقىندى سول كۇنى قاباعىن اشپاي جاۋىنداتىپ، ارۋاقتى ۇلىن جوقتاپ جاتقانداي جىلاپ تۇرعان شاردارا اسپانىمەن قوسىلىپ، ەل-جۇرتى مەن قالامداستارى قابىرعالارى سوگىلە، ەگىلىپ جەر قوينىنا تاپسىردى.

زاپىران
ءامىرحان بالقىبەكتىڭ قازاسىنا

ەگىلە بەرەم، ەگىلە بەرەم،
ەسىمدى ءبىر ءسات جيا الماي.
كوزىمنەن جاس بوپ توگىلەدى ولەڭ،
ارناسىن تاۋىپ قۇيا الماي...

بىلەمىن، ەرتەڭ تۇرەگەلەم ەپتەپ،
ءنان سويىل تيگەن جانىم قان...
— جىلاۋىق ولەڭ كىمگە كەرەك؟ — دەپ،
ۇرسۋشى ەدىڭ عوي، ءامىرحان.

«ەتەگىن جاسقا تولتىرا قالاتىن،
اقىن با اقىن قىز-كەۋدە؟
كەرەكسە، كىسى ولتىرە الاتىن
شايىرلار كەرەك بىزدەرگە!

ۇمىتپايىقشى، ءبىز — تارپاڭ جۇرتپىز،
جاراتقان اللا اقىن عىپ،
قارا ولەڭدەگى «سپارتاندىقپىز»،
ءبىرىمىز جۇزگە تاتىرلىق.

نايزادان تاپتى مۇرات بابامىز،
بۇكتىرىپ تىزە بار ەلدى.
باتىسقا ءبىز دە، ءتۇبى، اتتانارمىز،
جاۋلاۋعا جىرمەن الەمدى!

شىڭدارعا سۇيرەپ بيىك، مىقتى ارمان،
داڭقى ءۇشىن پاتشا-ولەڭنىڭ،
حاس اقىن، استە، قيىندىقتاردان،
قورىقپاۋى كەرەك!» — دەگەن كىم...

جۇرگەن ءبىر جەرىڭ جيىن، كوكەم-اي،
«لايىق ۇل ەڭ عاسىرعا!»
ولە سالۋ دا قيىن با ەكەن-اي،
ءومىر عوي — قيىن، راسىندا...

ءور اعىس ەدىڭ، بايقالماي تىندىڭ...
كۇرمەلىپ ءتىلىم، ۋاي، اللا-اي.
«جاقسى ءولىپسىڭ...» — دەپ ايتا الماي تۇرمىن،
اتامىز حاكىم ابايداي...

باۋىرجان باباجانۇلى
9.04.2014