قازاقستان رەسپۋبليكاسى مادەنيەت مينيسترلىگى 2014 جىلعى 10 ساۋىردە استانا قالاسىنداعى ۇلتتىق اكادەميالىق كىتاپحانادا تىلدەردى قولدانۋ مەن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسى اياسىندا 2014 جىلى شىعارىلاتىن «ابايتانۋ الىپپەسى»، «دانالىق الىپپەسى»، «ەلەكتروندى قازاق ءۇي» جانە باسقا دا ينتەراكتيۆتى ونىمدەردىڭ تۇساۋكەسەر ءراسىمىن وتكىزەدى.

تۇساۋكەسەر ءراسىمى مادەنيەت ءمينيسترى ا.مۇحامەديۇلىنىڭ قۇتتىقتاۋ سوزىمەن اشىلادى.

         شاراعا مادەنيەت مينيسترلىگىنىڭ جاۋاپتى قىزمەتكەرلەرى، قازاقستان رەسپۋبليكاسى پارلامەنتىنىڭ دەپۋتاتتارى، فيلولوگ-عالىمدار، ەلىمىزگە تانىمال قوعام قايراتكەرلەرى، اقىن-جازۋشىلار، بۇقارالىق اقپارات قۇرالدارى وكىلدەرى جانە وقىرمان قاۋىم قاتىسادى.

شارا اياسىندا بارلىق شىعارىلعان ونىمدەردىڭ كورمەسى ۇيىمداستىرىلادى.

         تۇساۋكەسەردىڭ ىشىندە «ۇلاس-ەلەكترون»جشس-نىڭ العاشقى ءونىمى «ەلەكتروندى قازاق ءۇي» جوباسى دا بار. ول – ءيىسى قازاقتىڭ يگىلىگىنە جارايتىن تاڭداۋلى زاماناۋي تاربيە قۇرالى. كيەلى قازاق ءۇيدىڭ كىشىرەيتىلگەن نۇسقاسىنا بەسىك جىرى، ەرتەگىلەر، بالالار اندەرى، حالىق جانە حالىق كومپوزيتورلارىنىڭ ءان-كۇيلەرى، تەرمە-تولعاۋلار، وتانشىلدىق رۋحتاعى اندەر، ابايدىڭ 45 قارا ءسوزىن قامتىعان 1200 مازمۇن ەنگىزىلگەن. ول – بابالارىمىزدىڭ بىزگە جەتكەن باي رۋحاني مۇرالارىن بۇگىنگى جانە كەلەشەك ۇرپاققا جالعايتىن ءداستۇرلى ۇلگىدەگى زاماناۋي ەلەكتروندى قۇرال. ادەبيەتىمىز بەن مادەنيەتىمىزدىڭ، ءداستۇرلى دۇنيەتانىمىمىز بەن مۋزىكالىق مۇرامىزدىڭ جاۋھارلارىن جالپاق جۇرتقا ناسيحاتتايتىن ۇلتتىق ءونىمنىڭ تاربيەلىك، تاعىلىمدىق قىزمەتى باسىم، ساپاسى جوعارى دەڭگەيدە، مازمۇنى باي، ءار سالانىڭ جىلىگىن شاعىپ، مايىن ىشكەن كاسىبي، مايتالمان  ماماندارىنىڭ كەڭەسى نەگىزىندە دايىندالعان. ول ءار قازاقتىڭ تىلدىك، سوزدىك قورىن مولايتىن، ۇلتتىق مۋزىكاعا دەگەن ىقىلاسىن ارتتىرىپ، رۋحىن كوتەرىپ، تانىمىن ارتتىرادى. رۋحاني بايلىعىمىزعا دەگەن ازاماتتىق قۇرمەتىمىزدى جاڭا ساتىعا كوتەرەدى.

ۇيىمداستىرۋشى: قر مادەنيەت مينيسترلىگى

«ەلەكتروندى قازاق ءۇي» جوباسىنىڭ اۆتورى: عالىمبەك قىزىربەكۇلى

جاۋاپتى رەداكتورى: جارقىن سالەنۇلى

ورنى مەن ۋاقىتى: ۇلتتىق اكادەميالىق كىتاپحانا، استانا، 10 ءساۋىر، 2014 جىل

ABAI.KZ